‘NGV sal billike mediese sorg vir almal verseker’

Die doel van die nasionale gesondheidsorgversekering (NGV) is om te verseker dat bekostigbare en billike mediese sorg aan almal in Suid-Afrika beskikbaar is en nie net aan diegene wat dit kan bekostig nie.

Dit was die boodskap van dr. Aquina Thulare van die departement van gesondheid tydens die jaarlikse kongres van die Suid-Afrikaanse Mediese Vereniging (SAMV) in Johannesburg. Sy het ’n sleutelrol in die gebied van beleid- en wetgewende ontwikkeling sowel as die ontwikkeling van die inwerkingstellingsplan vir die NGV.

“Suid-Afrika se gesondheidsorgstelsel is hoogs gefragmenteer en ongelyk. Wat menslike hulpbronne betref, is die mediese beroep hoogs ongebalanseerd in die rigting van die private sektor. Meer as 60% van die armste mense in Suid-Afrika het die grootste behoefte aan gesondheidsorg, maar kry die minste van die gesondheidstelsel,” het Thulare gesê.

Sy het gesê juis daarom word die NGV in werking gestel aangesien dit regverdigheid en billikheid in gesondheidsorg in Suid-Afrika tot gevolg sal hê én verseker dat gesondheidsorg beskikbaar is vir diegene wat dit die meeste nodig het.