Argieffoto
Andrew Trench, redakteur van News24, het in ʼn kommentaarstuk op News24 aangekondig dat 24.com op Vrydag 11 September by “internasionale nuusleiers sal aansluit deur ʼn belangrike verandering te implementeer oor hoe ons kommentare op ons webtuiste hanteer”.
Volgens Trench volg die besluit om die kommentaarfunksie af te skakel na maande se interne debat en gesprekke. “Die eindresultaat van die debatte is dat ons besluit het ons wil graag eerder geken word aan die kwaliteit van ons inhoud as vir ons kommentare.”
Trench het gesê talle kommentators dring daarop aan om die grense van vryheid van spraak wat daar in Suid-Afrika geniet word, te verskuif. “Kommentare dryf mettertyd tot haatspraak in die ergste vorm, en in die beste gevalle is die kommentaar dikwels besaai met vooroordeel. Interessante en goed oorweegde kommentare verdrink in ʼn kakofonie van beledigings deur die minderheid gebruikers.”
Volgens Trench sal die kommentaarfunksie by verstek afgeskakel word, maar sal News24 van hul redaksionele diskresie gebruik maak om die funksie op sekere artikels weer aan te skakel. Trench het gesê lesers sal aangemoedig word om op die MyNews24-platform hul insette te lewer.
Prof. Anton Harber, professor in joernalistiek en mediastudie aan die Universiteit van die Witwatersrand, het in reaksie hierop gesê hy kan verstaan dat News24 van die “misbruik en haatspraak” in sy kommentaarafdeling wil ontslae raak, maar dat dit ook beteken daar word van “goeie, interessante en innemende kommentaar” ook ontslae geraak.
“Gehore verwag toenemend om deel te neem en nie as passiewe ontvangers van die nuus op te tree nie. Deelname wat in een of ander vorm toegelaat word, het ʼn integrale deel geword in die bou van ‘n verhouding met gehore. Buitendien moet ons openbare debat en betrokkenheid by die nuus aanmoedig.”
Susan Lombaard, uitvoerende hoof van Maroela Media, ondersteun Harber se standpunt: “Vir ons is die kommentaarfunksie op Maroela Media juis dit wat van ons meer as net ʼn mediaplatform maak – dit beteken ons is ʼn aanlyngemeenskap waar mense kan saamgesels, en nie net ʼn eenrigting-kommunikasiekanaal soos koerante van ouds nie,” het sy gesê. “Daar is natuurlik uitdagings rondom die bestuur van kommentaar en lesersdeelname, maar uitdagings is nie iets waarvoor ons skrik nie. Inteendeel – dit skep vir ons die ruimte om ʼn strategie te ontwikkel waarmee ons leserskommentaar bestuur sodat dit ʼn sinvolle tweerigtinggesprek word. Lesers gebruik ook dikwels ons kommentaarfunksie om vir ons opvolgnuuswenke oor ʼn storie te gee, wat lei tot beter beriggewing en die skep van ʼn kultuur waar lesers voel ons luister na wat hulle wil sê.”
Volgens Harber kan dit wel “moeilik en duur” wees om aanlyndeelname te bestuur. “Internasionale publikasies eksperimenteer met maniere om dit te doen – soos voordeel te gee vir diegene wat konsekwent die beste bydraes lewer, of die gebruik van betroubare lesers as moderators – en hierdie maatreëls sal baie meer wenslik wees as om alle kommentaar af te sny. Wanneer een persoon die parlement ontwrig, wil jy daardie persoon verwyder en nie die parlement in geheel sluit nie. Ek vrees hulle doen laasgenoemde en dit is jammer.”