Argieffoto
Sowat R1 miljoen is Dinsdagoggend gesteel nadat ʼn SBV-veiligheidsbeampte deur twee gewapende mans in Hazyview in Mpumalanga beroof is terwyl hy geld in ʼn kitsbank gelaai het.
Volgens brig. Selvy Mohlala, provinsiale polisiewoordvoerder, het twee mans, geklee in SBV-uniforms, die veiligheidswag genader terwyl hy geld in ʼn Nedbank-kitsbank gelaai het.
“Hulle het ʼn geweer op hom gerig en die kontant wat hy gelaai het, gesteel. ʼn Medepligtige het in ʼn wit Audi vir sy makkers gewag en al drie het in dié voertuig van die toneel gevlug,” het Mohlala gesê.
Geen skote is gevuur nie en niemand is tydens die voorval beseer nie.
Die polisie ondersoek ʼn saak van gewapende roof.