Twee sterf, 16 beseer toe taxi en motor bots

Twee mense is dood en minstens 16 ander beseer tydens ʼn botsing tussen ʼn motor en minibus-taxi op William Nicol-rylaan in Johannesburg Saterdagoggend.

Chitra Bodasing, woordvoerder van ER24, het gesê toe paramedici op die toneel opdaag, het talle beseerdes oor die toneel versprei gelê nadat hulle vermoedelik uit die taxi geslinger is. Sommige passasiers was steeds in die voertuie vasgekeer.

“Daar was ongelukkig niks wat vir een volwassene en een kind gedoen kon word nie en hulle is op die toneel dood verklaar,” het Bodasing gesê. Brandweerbeamptes het gehelp om ander passasiers uit die wrakke los te sny. Hulle is op die toneel behandel en na verskillende hospitale gehaas.

“Die polisie was op die toneel om die ongeluk te ondersoek,” het Bodasing gesê.