Argieffoto: SAPD/Facebook
Maj. Pelonomi Makau, woordvoerder van die polisie, het gesê die 64-jarige man, sy 24-jarige dogter en haar 14-jarige niggie was by hul huis in die Magogwe Tar-nedersetting naby Potchefstroom toe drie mans omstreeks 19:00 by die huis ingebreek het. Die verdagtes het die man, wat glo ʼn taxi-eienaar is, van agter in die kop en rug geskiet voordat hulle sy dogter in haar rug geskiet het.
“Die verdagtes het na bewering vyf selfone en ʼn onbekende hoeveelheid geld gevat voordat hulle op die vlug geslaan het,” het Makau gesê. “Die niggie is ongedeerd gelaat en kon na die bure hardloop om hulp te kry.”
Makau kon nie bevestig of die moord met taxi-geweld verband hou nie en het gesê die motief vir die misdaad sal deel vorm van die ondersoek. Niemand is nog in verband met die voorval in hegtenis geneem nie.
Die polisie het ʼn beroep gedoen op mense met meer inligting om die ondersoekbeampte by 079 897 1910 of die Mmabatho-polisisestasie by 018 3877 500 te bel.