Suid-Afrikaanse vlag
President Jacob Zuma sal Maandag, op Menseregtedag, die land se nasionale boodskap by die Moses Mabhida-stadion in Durban, KwaZulu-Natal lewer.
Die presidensie het in ʼn verklaring gesê Menseregtedag vind vanjaar plaas onder die tema, “Suid-Afrika verenig teen rassisme”.
“Die Menseregtedag-vieringe wil alle Suid-Afrikaners aan die opofferinge herinner wat gemaak is tydens die struggle vir vryheid en om die prestasie van vryheid en demokrasie in 1994 te vier,” lui die verklaring. “Die President het Menseregtedag 2016 aangewys as ʼn nasionale dag teen rassisme, en as ʼn basis om ʼn langtermynprogram te begin wat sal bou op ʼn nierassige samelewing.”
Menseregtedag word in die land gevier as ʼn gedagtenis aan die Sharpeville-slagting op 21 Maart 1960 toe inwoners van Sharpeville en burgers van dwarsoor die land betoog het teen pasboekwette. Polisiebeamptes het tydens die betoging 69 persone by Sharpeville doodgeskiet en talle ander is in ander dele van die land dood.