Die kroon. Foto: Twitter
Twaalf skoonhede het vanjaar meegeding om die titel van Mej. Suid-Afrika 2016 en sy is Saterdagaand tydens ʼn glansgeleentheid by Carnival City in Johannesburg gekroon.
Die glansvrou wat die kroon van 2015 se titelhouer, Liesl Laurie (24), gaan oorneem, is Ntandoyenkosi Kuneni (23) van Mpumalanga.
Kuneni het tydens die top-5-uitklopronde die beoordelaars se guns gewen deur op die vraag-en-antwoordsessie oor wat haar ʼn trotse Suid-Afrikaanse vrou maak, te antwoord dat sy deel is van die nalatenskap van die nagenoeg 20 000 vroue wat in 1956 na die Uniegebou gestap het om te betoog oor die regte van vroue, wat aanleiding gegee het tot Vrouedag.
Elizabeth Molapo (23) van Bloemfontein is as die eerste prinses gekroon, met Tayla Skye (21) van Johannesburg as die tweede prinses.
