Steve Biko-hospitaal Foto: pah.org.za
ʼn Kraamsaalmatrone by die Steve Biko-hospitaal in Pretoria is met onmiddellike effek geskors weens bewerings van rassisme teen haar.
Steve Mabona, woordvoerder van die Gautengse departement van gesondheid, het Woensdag aan Maroela Media gesê susters wat aan die matrone ondergeskik is, het onder meer gekla dat sy die k-woord gebruik om na hulle te verwys.
“Daar is ook klagtes van viktimisasie teen haar gelê. Die klagtes is Vrydag aanhangig gemaak en die departement het besluit om haar te skors hangende die uitkoms van ʼn dringende ondersoek oor die beweringe,” het Mabona gesê.
Mabona het gesê die hospitaal het ʼn ondersoekspan aangestel om die ondersoek te hanteer en die waarheid van die bewerings te toets.
Qedani Mahlangu, die Gautengse LUR van gesondheid, het die ondersoek bevestig en gesê geen vorm van rassisme sal in enige van die departement se fasiliteite geduld word nie.