Retief se twiet
Retief het nadat die Proteas die eendagreeks oor Engeland beklink het, getwiet: “Suid-Afrika tot oorwinning gedra deur twee wit Afrikaners . . . politici en mediakommentators neem kennis . . . vir wat dit werd is.” Dit het gevolg nadat kaptein AB de Villiers en David Wiese die wenlopies geslaan het.
Haroon Lorgat, uitvoerende hoof van KSA, het gesê die twiet was “onsensitief en uiters teleurstellend”. “AB de Villiers het die ontevredenheid wat die twiet vir die Protea-span veroorsaak het aan my oorgedra.”
“Enigiemand wat die spel van krieket en veral die Proteas verstaan, sal weet dat die oorwinning moontlik gemaak is deur ’n groot spanpoging. Ons is bevoorreg en baie trots om ’n diverse groep van spelers te hê wat soos één speel.”
KSA het gesê hy neem kennis dat Retief intussen om verskoning gevra het vir die twiet. “Haai, almal. Ek vra onvoorwaardelik om verskoning indien ek julle ontstel het. Dit was ʼn lomp manier om die Suid-Afrikaanse gesprek te betree. Ons is almal een. Jammer,” het Retief later getwiet.