Argieffoto
ʼn Man, glo in sy 30’s, is Dinsdagoggend dood toe hy op die R554 in Eikenhof, suid van Johannesburg, van sy fiets afgestamp is.
“Die man het leweloos langs die pad, ʼn paar meter van sy fiets af, gelê,” het Russel Meiring, woordvoerder van ER24, gesê. Die man het reeds aan sy beserings beswyk voor paramedici by die toneel opgedaag het. “Hy is op die toneel dood verklaar.”
Die bestuurder van die ligtemotorvoertuig, wat ook in die ongeluk betrokke was, het geringe beserings opgedoen. “Paramedici het hom behandel voor hy na ʼn nabygeleë hospitaal geneem is vir verdere behandeling.”
Plaaslike owerhede ondersoek die oorsaak van die ongeluk.
