Die webdomein www.propuk.co.za mag nie meer deur die Pro-Puk-groep gebruik word nie.
Dit is die beslissing wat die Suid-Afrikaanse Instituut vir Intellektuele Eiendomsreg (SAIIPL) en die .za-Domeinnaam-owerheid pas gemaak het. Dié besluit volg op die SAIIPL se beslissing in September dat die Pro-Puk-groep wel die webdomein www.propuk.co.za mag gebruik. Die Noordwes-universiteit (NWU) het teen dié beslissing geappelleer.
“Kragtens die gemenereg besit die NWU reeds vir dekades, selfs voor die samesmelting toe die universiteit nog die PU vir CHO was, ʼn alleen- en gevestigde reg op die gebruik van die naam Puk. Die suksesvolle appèl is dus ʼn duidelike boodskap aan buite-partye en persone om nie enige universiteitshandelsmerke te gebruik wat die NWU se regte beskerm nie,” het die NWU in ʼn verklaring gesê.
Die Pro-Puk-groep se webtuiste is in samewerking met die Solidariteit Beweging gestig. Dirk Hermann, bestuurshoof van Solidariteit, het intussen die NWU daarvan beskuldig dat hy oudstudente se stem oor die NWU probeer stilmaak.
“Die klagte teen die groep oudstudente by die za.Domeinnaam-Owerheid en die SAIIPL is ʼn sensuurtegniek. Sosiale media sensuur werk deesdae net nie meer nie. In die lig van die klag van die NWU teen sy eie oudstudente se webblad, het ons besluit om ʼn nuwe webblad te registreer, www.ek’s-‘n-puk.co.za. Oudstudente gaan ook aangemoedig word om foto’s van hul studentedae, graadsertifikate of enige ander foto’s wat wys dat hulle trotste Pukke is, op die webblad te plaas. Ons Pro-Puk-veldtog gaan nou nog groter wees.”
Die NWU het intussen gesê hy is verplig om sy meer as 28 handelsmerkregistrasies, insluitend Puk, Pukke en Pukkie, te beskerm. “Nadat hierdie appèl geslaag het, verkry NWU nou verdere regsadvies om teen ander individue en instansies wat ook wederregtelik die naam PUK gebruik, op te tree.”