Dirkiesdorp-plaasaanval: Vrou sterf ook

Die vrou wat Saterdag saam met haar man op hul plaas naby Dirkiesdorp in Mpumalanga oorval en erg aangerand is, is Dinsdag in die vroeë oggendure in die hospitaal dood.

Sers. Gerald Sedibe, woordvoerder van die polisie, het bevestig Charlotte Giddy (55) het omstreeks 02:00 aan haar beserings beswyk.

Maroela Media het vroeër berig Charlotte se vriend, Johannes van Zyl, se liggaam is Saterdag in die huis ontdek nadat hy vermoedelik met krukke doodgeslaan is. Volgens Sedibe is Charlotte ook erg aangerand en aangetref met erge kopbeserings en ernstige swelling aan haar gesig.

Sedibe kon nie bewerings dat die aanvallers Charlotte gemartel het deur die senings in haar hakskene af te sny, bevestig nie.

ʼn Swazilandse burger is Saterdag kort ná die aanval in hegtenis geneem en sal Dinsdag in die hof verskyn. Sedibe het gesê volgens die polisie se inligting was die verdagte ʼn werknemer van die paartjie.