Studentebetogings (Oktober 2015) (Foto: verskeie bronne, sosiale media)
Geweld en intimidasie by Suid-Afrikaanse universiteitskampusse is onaanvaarbaar het Jeff Radebe, minister in die presidensie, Donderdag gesê en bygevoeg optrede wat onderrig onderbreek en onredelike eise wat gestel word, is teenproduktief.
Radebe het joernaliste toegespreek na Woensdag se kabinetsvergadering waartydens die stand van die ekonomie onder meer bespreek is.
“Die regering is daartoe verbind om gratis tersiêre onderrig te verskaf aan studente wat akademies daarvoor in aanmerking kom. Dit sal egter binne die regering se begroting moet plaasvind,” het Radebe gesê.
Volgens Radebe moet die regering ook R2,3 miljard aan universiteite gee vir die 0%-klasgeldverhoging wat pres. Jacob Zuma vir 2016 aangekondig het.
“Ons gaan ook R2 miljard meer aan die nasionale finansiële hulpskema vir studente (NSFAS) beskikbaar stel vir studente wat weens geldtekorte nie hul studies kan voltooi nie,” het Radebe gesê.
Die regering beoog ook om R2,5 miljard aan 71 753 studente beskikbaar te stel in die vorm van lenings om by universiteite te studeer.
Suid-Afrika is hierdie week opnuut geruk deur oproer by universiteitskampussekampusse in Gauteng veral.