ʼn Foto van die verdagte wat van veiligheidskameras af bekom is. Foto: SAPD
Twee verdagtes wat aangekeer is in verband met die diefstal van miljoene rande uit ʼn kluis in die Pretoria-kantoor van die Staatsveiligheidsagentskap (SSA), het Vrydag in die hof verskyn.
Die twee verdagtes het glo R50 miljoen se buitelandse valuta uit die kluis gesteel.
Brig. Hangwani Mulaudzi, woordvoerder van die Valke, het gesê “dié twee sal waarskynlik eers Maandag vir borgtog aansoek doen”.
Die verdagtes is vasgetrek nadat die polisie beeldmateriaal van kringtelevisiekameras uitgereik het. “Die ondersoek na die rooftog is in ʼn gevorderde stadium,” het Mulaudzi gesê.
Die diefstal het vermoedelik op 26 Desember plaasgevind, maar is eers die volgende dag ontdek.