Argieffoto
Altesaam 440 motoriste wat onder die invloed van alkohol bestuur het, is die afgelope naweek in Johannesburg in hegtenis geneem.
Supt. Wayne Minnaar, woordvoerder van die Johannesburgse Metropolisie, het gesê die polisie het geen genade betoon aan motoriste wat onder die invloed van alkohol agter die stuur ingeskuif het nie. “Motoriste wat hulle aan dronk- of roekelose bestuur skuldig maak, sal nie geduld word nie,” het hy gesê.
Die beskuldigdes sou Maandag in verskeie howe in die stad verskyn.
Minnaar het gesê 41 bestuurders wat hulle aan spoedoortredings skuldig gemaak het, is ook in hegtenis geneem. Onder dié bestuurders is ʼn 33-jarige man wat in sy BMW M5 op die N3 teen 212 km/h gejaag het. Die beweerde oortreder se verweer toe verkeersbeamptes hom in hegtenis neem, was dat “ʼn BMW ʼn kragtige enjin het”, het Minnaar gesê.
Minnaar het gesê die hoofoorsaak van ongelukke is hoë spoed en voertuie wat ander padgebruikers verbysteek wanneer dit onveilig is.