Argief. Foto: ER24
ʼn Vrou en kind is dood en drie ander beseer nadat ʼn motor Donderdagaand verskeie kere naby Newcastle in KwaZulu-Natal gerol het.
Volgens Chitra Bodasing, woordvoerder van ER24, het die ongeluk op die N11 tussen Newcastle en Ladismith plaasgevind. “Dit blyk dat die bestuurder beheer oor die voertuig verloor het, waarna dit gerol het,” het Bodasing gesê.
Volgens Bodasing is die vrou en kind uit die voertuig geslinger. “Hulle is op die toneel dood verklaar.”
ʼn Man, vrou en meisie is na ʼn nabygeleë hospitaal geneem vir geringe beserings.
Die oorsaak van die ongeluk is nog onbekend.