ANC-LUR Nancy Sihlwayi. Foto: www.ecprov.gov.za
Die Menseregtekommissie gaan versoek word om Nancy Sihlwayi, die regerende party se LUR van maatskaplike ontwikkeling in die Oos-Kaap, vir rassisme en menseregteskendings te ondersoek.
Die DA sal na verwagting Maandag die klag indien. “Sihlwayi se onlangse opdrag aan haar personeel om kinders op grond van hul ras uit te sluit van ʼn jeugprogram wat die regering aangebied het, is niks anders as suiwer rassisme nie,” het Veliswa Mvenya, voorsitter van die DA in die Oos-Kaap, Sondag gesê. Sy het verwys na ʼn onlangse jeugkamp vir minderbevoorregtes in Port Alfred. Sihlwayi het glo opdrag gegee dat geen wit kinders na dié kamp genooi mag word nie.
“Sihlwayi se rassisme skei die jeug op grond van ras en ontmasker die ANC as ʼn organisasie wat nie werk aan ʼn nierassige toekoms vir Suid-Afrika nie.” Mvenya het gesê as LUR van maatskaplike ontwikkeling het Sihlwayi gewys: As die ANC die kans kry, sal die party besluit watter rasse toegang tot sekere geleenthede kry.
Die DA het verlede week ʼn beroep op die ANC gedoen om hom van dié “rassisme” te onttrek, maar die ANC het dit tot dusver nie gedoen nie. Die DA het Sihlwayi reeds by die Oos-Kaapse wetgewer se etiese komitee verkla oor die kwessie.