Argieffoto (Foto: dechatorn, Pixabay)
President Jacob Zuma het Donderdag gesê die regering is nog nie gereed om die droogte, wat ʼn groot deel van die land teister, as ʼn nasionale ramp te verklaar nie.
Zuma het tydens ʼn antwoordsessie in die parlement gesê die regering doen alles in sy vermoë om boere en gemeenskappe in die droogtegeteisterde provinsies by te staan, maar slegs Noordwes, Limpopo, KwaZulu-Natal en die Vrystaat is tot dusver as rampgebiede verklaar.
“Die regering het die betrokke areas as rampgebiede verklaar en maatreëls word nou toegepas,” het hy aan LP’s gesê. “As mense sê dit is nie genoeg nie, is dit hul siening. Dit is nie as ʼn nasionale ramp verklaar nie. Wanneer daardie oomblik aanbreek, sal ons dit verseker doen.”
Zuma het gesê die regering het geld opsy gesit om die betrokke gemeenskappe en boere te help. “Ondersteuning aan plase sluit die aankoop van voer vir vee, vervoer van voer en water en hulpbronne vir boorgate.”
Hy het gesê geld word ook opsy gesit om watertenkers vir munisipaliteite aan te koop wat die betrokke gemeenskappe met water kan help.