Argieffoto Foto: SAPD, Facebook
ʼn Polisiebeampte van KwaZulu-Natal is noodlottig gewond nadat hy Saterdag ʼn man in hegtenis wou neem wat na bewering drie vroue van R110 000 se stokvel-geld beroof het.
Brig. Jay Naicker, provinsiale polisiewoordvoerder, het gesê die beampte, ao. Niren Ramsaroop (40), en sy kollegas was op roetinepatrollie in die sakesentrum van Empangeni toe hulle deur drie vroue genader is wat beweer het hulle is deur twee mans van hul stokvel-geld beroof wat hulle pas in ʼn bank onttrek het.
“Ramsaroop het kort daarna die verdagte man opgespoor en hom aangekeer, maar die verdagte het in die proses ʼn vuurwapen uitgepluk en die beampte in sy bors geskiet,” het Naicker gesê.
Ramsaroop kon daarin slaag om die 41-jarige verdagte terug te skiet voordat hy aan sy wond beswyk het. Dié verdagte is in hegtenis geneem en onder polisiebewaking na ʼn hospitaal geneem. Die ander verdagte kon daarin slaag om met die geld te ontsnap en is steeds soek.
Die polisie het op ʼn vuurwapen, waarvan die reeksnommer afgevyl is, beslag gelê. Die vuurwapen sal vir ballistiese toetse gestuur.
Lees meer oor onlangse polisiemoorde op Maroela Media.