Polisieman doodgeskiet toe hy rowers agternasit

ʼn Polisiebeampte van Siloam naby Louis Trichardt in Limpopo is Maandagaand koelbloedig doodgeskiet toe hy gewapende rowers agternagesit het.

Kol. Ronel Otto, woordvoerder van die polisie, het gesê die beampte was ʼn 52-jarige adjudant-offisier wat by die Siloam-polisiestasie gevestig was. Die beampte was besig om saam met ʼn kollega die pad tussen Siloam en Thohoyandou te patrolleer waar talle voorvalle van gewapende roof by besighede die afgelope tyd plaasgevind het.

“Hulle het inligting ontvang van ʼn verdagte voertuig in die omgewing en nadat hulle die voertuig opgemerk het, het hulle dit agternagesit,” het Otto gesê. “Die verdagte voertuig het afgedraai op ʼn grondpad en toe die polisiemotor agternakom, is skote afgevuur. Die adjudant-offisier is geskiet en is op die toneel dood.”

Otto het gesê die verdagtes se voertuig is later verlate elders in die gebied gevind. Niemand is nog in verband met die voorval in hegtenis geneem nie.

Die naam van die polisiebeampte sal bekendgemaak word sodra sy naasbestaandes van sy dood ingelig is.