‘Rykes se belasting moet studentefooie betaal’

Sanco (die SA National Civic Organisation) het Vrydag voorgestel dat rykdombelasting ingestel word om studente-onderrig te befonds. Die voorstel volg op pres. Jacob Zuma se aankondiging Vrydagmiddag dat daar geen verhoging in tersiêre instellings se 2016-fooie sal wees nie.

Jabu Mahlangu, SANCO nasionale woordvoerder, het gesê volgens onlangse statistiek verdien 530 000 mense gemiddeld R1.2 miljoen ʼn jaar. “As rykdomsbelasting van 2% verhaal word, sal R12 miljard ingesamel word om gratis onderrig mee te befonds,” het hy gesê.

Mahlangu het studente ook aangemoedig om die proses waaroor tydens die vergadering met Zuma ooreengestem is, kans te gee om geïmplementeer te word. Die organisasie het gesê die regerende party is toegewyd tot beter onderrig en minder ongelykhede.

“Die ANC se 2015 hoofraad het ook hul kommer uitgespreek oor universiteitsfooie wat te hoog is en gesê die regering moet ʼn manier vind om dit te reguleer,” het hy gesê.

Zuma het vroeër gesê ʼn presidensiële taakspan wat aangestel is om die befondsingskwessie te ondersoek, sal ook kyk na ander kwessies soos gratis onderrig, onafhanklikheid van tersiêre instansies, rassisme en studenteverblyf.

Zuma se aankondiging kon egter nie daarin slaag om ʼn groep oproerige studente te laat bedaar nie. Kort ná die aankondiging het geweld weereens by die Uniegeboue losgebars, toe polisiebeamptes met klippe bestook is, ʼn polisievoertuig aan die brand gesteek is en skokgranate en rubberkoeëls deur die polisie afgevuur is.