Argieffoto
Bongani Mnguni (28) van Tsakane is vandeesweek in die hooggeregshof in Pretoria skuldig bevind aan ses aanklagte van verkragting, ontvoering, roof, aanranding met die doel om ernstig te beseer en moord. Mnguni moes Vrydag weer verskyn vir vonnisverrigtinge, maar het nie opgedaag nie.
Regter Jody Kollapen het die saak uitgestel tot ná teetyd in die hoop dat Mnguni teen daardie tyd opgespoor sal word, maar die hof kon steeds nie vasstel waar hy is nie. Dit is nie duidelik waarom Mnguni nie in polisie-aanhouding was nie. Die saak is tot Woensdag uitgestel.
Mnguni het vroeër vandeesweek ter versagting van vonnis gesê hy kan nie verstaan waarom hy skuldig bevind is nie, want hy het aan die hof verduidelik hy het nie die vroue verkrag nie. Hy het gesê die vroue het hom geld geskuld en toe hulle hom nie kon terugbetaal nie, het hulle hom seks as terugbetaling aangebied.
Volgens ʼn hofbeampte sal die vonnisuitspraak volgende week in sy afwesigheid gedoen word, as hy weer nie opdaag nie.