Argieffoto
ʼn 30-jarige man van Empangeni in KwaZulu-Natal wat sy 10-jarige stiefboetie verkrag het, is vandeesweek tot lewenslange tronkstraf gevonnis.
Die verkragting het in Mei verlede jaar plaasgevind.
“Die slagoffer het geslaap toe die verdagte sy kamer betree het,” het kol. Jay Naicker, woordvoerder van die polisie, in ʼn verklaring gesê. “Die man het sy stiefboetie aangesê om nie te skree nie, en het hom verkrag.”
Die kind het sy ma twee dae later van die verkragting vertel en sy het ʼn saak by die polisie aanhangig gemaak.
Die provinsiale polisiekommissaris, Mmamonnye Ngobeni, het die vonnis verwelkom. “Ons hoop dat die vonnis ʼn sterk boodskap aan alle seksuele oortreders sal stuur,” het sy gesê. “Ons sal seker maak dat hulle in hegtenis geneem word en lewenslank agter tralies sit.”