Foto: Pexels

Nog ʼn boer is Dinsdag op ʼn plaas net buite Fochville in Gauteng doodgeskiet.

Willie Barnard is na ʼn hospitaal gehaas nadat hy geskiet is, maar het op pad daarheen aan sy wonde beswyk.

Maroela Media verneem twee mans het omstreeks 12:30 op die plaas vir werk kom vra, waarna Barnard hulle weggewys het. Die mans het glo later teruggekeer waarna ʼn rusie ontstaan en Barnard geskiet is.

Leander Venter van ER24 het aan Maroela Media gesê een van die boere in die distrik het met Barnard in sy bakkie na ʼn hospitaal gejaag. “ER24 van Vanderbijlpark het hulle langs die pad gekry, maar die gewonde man het reeds aan sy wonde beswyk,” het Venter gesê.

Tinus van Zyl, hoof van CPI-sekuriteit wat na die toneel ontbied is, het aan Maroela Media gesê hulle is deur bure na die plaas ontbied.

“Ons mense is op die toneel [en] daar is reeds twee verdagtes vas – ons honde-eenheid soek na nog moontlike verdagtes,” het Van Zyl gesê. Volgens hom is daar talle omstanders wat help op die toneel.

Volgens kol. Lungelo Dlamini, provinsiale woordvoerder van die polisie, het die voorval gebeur toe die twee aanvallers glo vir plaaswerkers vir water gevra en die werkers hulle na die huis geneem het om vir hulle water te kry. “[Die aanvallers] het toe net losgebrand. ʼn 63-jarige boer is doodgeskiet,” het Dlamini gesê.

Hy het bevestig dat twee verdagtes reeds vasgetrek is, maar gesê daar is nog geen vuurwapen opgespoor nie

Volgens Ian Cameron, hoof van AfriForum gemeenskapsveiligheid, was daar in die afgelope 48 uur ses plaasaanvalle waartydens drie mense gesterf het. Maroela Media het vroeër berig Barry Baars se liggaam is vanoggend op ʼn plaas tussen Ficksburg en Rosendal in die Vrystaat aangetref nadat hy doodgeskiet is.

Kobus en Louisa Koekemoer in die Pretoria-hooggeregshof (31 Oktober 2017). Foto: Phillip Bruwer

Morris Aronowitz de Beer, ʼn paramedikus verbonde aan die Hartbeespoort-nooddienste, het Dinsdagoggend in die Pretoria-hooggeregshof vertel wat hy waargeneem het die dag toe Poppie van der Merwe se lewelose lyfie meer as ‘n jaar gelede by ʼn hospitaal in Brits, Noordwes, ingebring is.

Poppie se ma en stiefpa, Louisa (46) en Kobus Koekemoer (44), staan tereg vir die moord op die driejarige kleuter. Hul verhoor het Maandag begin.

“Ek was Dinsdag 25 Oktober 2016 aan diens. Ons was die middag by die Brits- provinsiale hospitaal en het by ongevalle gewag vir inligting oor ʼn pasiënt,” het De Beer aan regter Bert Bam gesê.

“ʼn Manlike persoon [Kobus Koekemoer] het deur die glasdeur ingekom met ʼn kind in sy arms en hy het om hulp geroep. Dit het gelyk of die kind dood is, sy het nie beweeg nie. Ek het die kind gevat en na ʼn bed in die ongevalle-eenheid geneem.”

Hy het gesê hy het vir ʼn hartklop gesoek en geen hartklop gevoel nie. Die kleuter het ook nie asem gehaal nie. De Beer het dadelik begin om noodhulp op Poppie toe te pas en het vir Koekemoer gevra wat gebeur het. Koekemoer het glo geantwoord dat sy net ophou asemhaal het.

“Die kind het net ʼn broekie aangehad en nie ʼn hemp nie. Ek het haar lyfie ondersoek en het orals blou kolle en ʼn knop aan haar kop gesien. Sy het maer gelyk. Ek het hom gevra waar al die knoppe en kneusplekke vandaan kom, want dit het nie vir my normaal gelyk vir ʼn kind van daardie ouderdom nie,” het De Beer gesê.

Koekemoer het glo geantwoord sy het die blou kolle tydens die jaagtog na hospitaal opgedoen, toe sy teen die binnekant van die bakkie gestamp het.

De Beer het getuig toe hy Poppie se mond wou oopmaak om mond-tot-mond-asemhaling toe te pas, was haar kakebeen reeds styf, wat ʼn aanduiding was dat sy reeds tot twee ure dood kon wees. “Sy het glad nie bygekom nie. Ek het aanhou noodhulp doen. Die dokter het ingekom en gesê ek moet ophou, die kind is dood.”

Volgens De Beer het hy vir Louisa saam met ʼn klein seuntjie sien staan. Hy het nie met haar gepraat nie. Hy het kort daarna by die seuntjie gekniel en hom gevra wat gebeur het. “Hy het net gesê sy wou nie eet nie.”

Poppie van der Merwe. Foto: Verskaf

De Beer het getuig hy is opgelei om te weet dat ʼn kneusplek nie kan vorm as daar nie bloeddruk of bloedvloei is nie.

Adv. Lana Augustyn, Kobus se regsverteenwoordiger, het De Beer onder kruisverhoor uitgevra oor Koekemoer se toestand die betrokke aand. “Hy was redelik paniekbevange toe hy ingekom het en toe ek met noodhulp begin het hy begin rustig raak,” het De Beer geantwoord.

Oor Louisa se toestand het hy gesê sy het net daar gestaan en nie enige tekens van “stres” gewys nie. Augustyn het gesê dit is haar instruksies dat Poppie in die voertuig beserings opgedoen het toe daar noodhulp op haar toegepas is.

Adv. Adrian Nel, vir Louisa, het dit aan De Beer gestel dat Louisa in ʼn totale toestand van skok was, want sy het gehoor haar kind is dood.

Dr. Richard Gumbu, die dokter wat die dag van Poppie se dood aan diens was in die ongevalle eenheid van die Brits-hospitaal, is daarna geroep om te getuig.

Gumbu het getuig hy het Poppie omstreeks 17:00 dood verklaar. Hy het gesê hy het slegs enkele van haar beserings in sy verslag gemeld. “Daar was baie meer wat nie aangeteken is nie, want daar was te veel en ek was besig met ander gevalle.”

Gumbu het gesê hy het daarna met die ouers gepraat. Koekemoer het die meeste van die praatwerk gedoen en Louisa het net dan en wan geknik. “Die man het eers gesê hulle het haar pak gegee en dat sy toe haar bewussyn verloor het. Toe ek vir hulle sê ons moet die polisie betrek, want dit was nie ʼn natuurlike dood nie, het hulle hul storie aangepas deur te sê sy het televisie gekyk en was moeg en het toe haar bewussyn verloor. Hulle het toe gesê hulle het haar geskud om haar wakker te kry en het koue water oor haar gegooi,” het hy gesê.

Volgens hom het Louisa hartseer en emosioneel gelyk en Koekemoer was “ontspanne”.

Augustyn het onder kruisverhoor aangevoer Koekemoer gaan ontken dat hy gesê het hy het Poppie pakslae gegee en het hy buite die huis in die tuin gewerk toe Louisa hom geroep het toe Poppie haar bewussyn verloor het.

Gumbu het gesê hy het nog nie gesien dat ʼn kind dié soort beserings aan ʼn bors opdoen as ʼn volwasse, wat nie weet wat hy doen nie, noodhulp probeer toepas.

Die saak duur voort.

Lees die vorige berigte oor Poppie van der Merwe op Maroela Media.

Pieter Verster (Foto: Facebook)

Die 14-jarige seun van Stellenbosch in die Wes-Kaap wat Dinsdagoggend ernstige beserings opgedoen het in die huisbraak waarin sy pa gesterf het, het probeer om sy gesin te beskerm deur die aanvallers met ʼn gholfstok te takel.

Maroela Media het vroeër berig die man, wat intussen as Piet Verster geïdentifiseer is, is deur twee gewapende mans oorval terwyl hy en sy vrou geslaap het. Nadat ʼn stoeiery tussen lede van die gesin en die aanvallers ontstaan het, is die man doodgeskiet en sy seun, JP, gewond.

Harold Verster, uitvoerende hoof van die Cheetahs en Piet se oom, het Dinsdag aan Maroela Media gesê die gesin is “erg geskok en getraumatiseerd” ná die skielike verlies van ʼn man en pa.

“Ons kan nog nie sin maak van die voorval nie,” het Verster gesê. “Die een oomblik is alles nog normaal en die volgende oomblik is dit ʼn warboel. Dis verskriklik wat gebeur het en hulle is baie erg getraumatiseerd.”

Volgens Verster het die verdagtes Piet in sy slaap oorval. Hy sê hulle het hom met ʼn mes aangeval waarna ʼn stoeiery tussen hom en die aanvallers ontstaan het. Piet het glo enkele oomblikke nadat die stoeiery ontstaan het inmekaargesak.

“JP het die rumoer gehoor en op die stoeiery afgestorm met ʼn gholfstok. Hy het die verdagtes met ʼn gholfstok bygedam, en hulle het hom ook aangeval. Hy is in die gesig geslaan én met die mes in die gesig gesteek. JP het daarin geslaag om sy ma en sy jonger broer se lewe te red – ons weet nie wat sou gebeur het as hy nié teen hulle baklei het nie,” het Verster gesê.

Verster sê Adele, Piet se vrou, het glo in die straat afgehardloop en om hulp geskree. “Ons is nie seker presies hoe die voorval afgespeel het nie omdat ons nie self daar was nie en hulle maar nog baie geskok is. Ons is dankbaar dat hulle ongedeerd is, maar ons harte is seer dat Piet oorlede is. Hy was ʼn wonderlike jong man met ʼn passie vir sy gesin. Hy sou enigiets vir hulle doen – daarom het hy hulle teen dié aanval probeer beskerm,” sê hy.

Hy sê die polisie is steeds op die toneel en het reeds ʼn ondersoek begin. Forensiese deskundiges is ook op die toneel om bewyse te versamel.

Verster sê Adele en haar driejarige seun Retief probeer om “onder die omstandighede kop bo water te hou” maar gaan in dié stadium op JP se herstel fokus.

JP was teen Dinsdagmiddag steeds in ʼn Wes-Kaapse hospitaal. Dit is nie bekend of hy ʼn operasie ondergaan het nie.

John en Bina Cross. Foto: Verskaf

WAARSKUWING: Die inhoud van die berig is grafies van aard en kan sensitiewe lesers en kinders ontstel.

Die dogter van John en Bina Cross, die bejaarde egpaar wat meer as 17 jaar gelede wreed op hul plaas in die Gravelotte-omgewing in Limpopo gemartel en vermoor is, sal Woensdag teen haar ouers se moordenaars in hul paroolaansoek getuig.

Ephraim Mokwena en Michael Malamela, wat destyds elk tot 50 jaar tronkstraf gevonnis is, sal Woensdag in ʼn hof in Thohoyandou verskyn om vir parool aansoek te doen.

Lita Fourie, die Cross-egpaar se dogter, het aan Maroela Media gesê sy is verlede week deur die owerhede gebel en versoek om die paroolverrigtinge by te woon. “Ek sal beslis hulle paroolaansoek teenstaan. Ek het reeds vir die persoon van korrektiewe dienste wat my gebel het gesê dit dra glad nie my goedkeuring weg dat hulle vrygelaat word nie,” het sy gesê.

“Hulle is gewoontemisdadigers en in my oë sal hulle nooit verander nie. Die kans dat hulle weer gaan moor, is baie goed. As jy so baie met plaasaanvalle te doen het soos ek, weet jy ʼn mens is nooit weer dieselfde ná so ʼn aanval nie. Jou hele lewe word vir ewig daardeur beïnvloed. Hulle is misdadigers en dit is hoe ek hulle altyd sal sien.”

Fourie het ná die moord op haar ouers die Tabita-organisasie begin, ʼn organisasie wat ondersteuning aan die slagoffers van plaasaanvalle bied.

Maroela Media het vroeër berig John (78) en Bina (76) is op 16 April 2000 aangeval toe hulle die middag omstreeks 15:00 van die kerk af tuis gekom het. Mokwena en Malamela het reeds die oggend by die huis ingebreek en die egpaar ingewag. Malamela het voorheen vir die Cross-egpaar gewerk.

Mokwena en Malamela het tydens die aanval, wat ongeveer vyf uur lank geduur het, kookwater oor Bina uitgegooi en haar drie keer geskiet. Sy het egter nie onmiddellik gesterf nie, maar het op die vloer bly lê waar sy doodgebloei het.

John is aanvanklik een keer in sy bobeen geskiet en herhaaldelik geslaan en geskop. Hy is kort daarna nog ʼn keer met ʼn .22-geweer geskiet. Hy is later in die bad vasgemaak, waar ʼn spuitkraan gebruik is om vuurwarm water in sy keel af te spuit. Volgens Fourie het ʼn nadoodse ondersoek getoon dat die water John inwendig erg gebrand het en dat sy maag vol water was. Hy is uiteindelik met ʼn .303-geweer in die bad doodgeskiet.

Mokwena en Malamela het vuurwapens, juweliersware en verskeie huishoudelike items geroof voordat hulle met die egpaar se motor op die vlug geslaan het. Hulle is die volgende oggend in hegtenis geneem.

Fourie het Dinsdag gesê sy glo nie ʼn brief wat Mokwena en Malamela later vanuit die gevangenis aan haar geskryf het en waarin hulle om verskoning vra vir hul dade, was opreg bedoel nie. “Hulle het dit net geskryf omdat daar vir hulle gesê is om dit te skryf. Dit was soos ʼn CV opstel. Dit was nie opreg bedoel nie,” het sy gesê.

“Tydens die verhoor het een van die speurders vir Michael [Malamela] in die hof gesê hy gaan baie lank sit vir wat hy gedoen het. Toe antwoord hy: ‘But at least I’m alive’. Daar is geen berou by hom vir wat hy gedoen het nie.”

Zandile Mabunda, kommunikasiebestuurder van die Thohoyandou-gebied van die departement van korrektiewe dienste (DKD), het vroeër aan Maroela Media bevestig dat Mokwena en Malamela in aanmerking kom om voor die korrektiewe toesig- en paroolraad te verskyn. Sy het gesê volgens departementele beleid mag sy egter nie spesifieke besonderhede van individuele oortreders bekendmaak nie.

Prof. Danie Goosen, voorsitter van die FAK, by die gedenkplaat wat in die tuin van die NG-gemeente Lyttelton in Centurion onthul is ter herdenking van Reformasie 500. Foto: Verskaf.

Skole, kerke en die gemeenskap is onontbeerlik vir die voortbestaan van ʼn kultuur, maar as gesinne nie gesond is nie kan nie een van hierdie aspekte werklik bly voortbestaan nie.

Dit was van die stellings wat deurentyd as tema opgeduik het by die FAK se leierskapskonferensie wat Dinsdag in Lyttelton net buite Pretoria gehou is. ʼn Uitgesoekte groep Afrikaner-kultuurorganisasies het tydens die konferensie saam besin oor die toekoms van dié kultuur.

Dr. Callie Opperman, emeritus predikant van die Gereformeerde Kerk Windhoek-Suid, het ʼn interessante kykie gee na die Afrikanergemeenskap in Namibië.

Volgens Opperman is alle steun vir Afrikaans en Afrikanerbewegings byna onmiddellik onttrek nadat Namibië in 1990 onafhanklik geword het. Daar is ook besluit om Afrikaner-kultuurorganisasies met Suid-Afrikaanse verbintenis “nek om te draai”.

Indien daar nog ʼn groot genoeg groep leerders was kon jonger kinders in hulle moedertaal onderrig word, maar van gr. 4 tot matriek is die staatskole in die land ook heeltemal verengels.

“Skielik het ons niemand in die regering gehad nie en niemand het meer simpatie vir Afrikaans gehad nie. Dit was ʼn skok vir die kultuur in Namibië want ons was eintlik voorheen bederf.

“Die positiewe wat daaruit gespruit het, is dat daar ouers na vore gekom het wat gesê het hulle kinders moet in Afrikaans onderrig word. Mense het skole begin stig en op sommige plekke het skooltjies van 20 tot 30 kinders ontstaan. Uiteindelik was daar 5 000 kinders in Afrikaanse private skole. Jong mense het ook in kleiner dorpies gaan woon waar hulle kinders van gr.1 tot matriek kan skool gaan en so het die gemeenskap nie net verouder nie.

Die individueel gestigte skole kon egter nie net op hulle eie in Namibië bly voortbestaan nie. So is ʼn vereniging vir Christelike Afrikaanse onderwys gestig. Volgens Opperman is dit ʼn forum wat vir skole geleentheid bied om te kan beplan.

Hy het gesê 27 jaar ná onafhanklikwording is daar opnuut in die land sterk belangstelling in moedertaalonderrig, en is daar ʼn nuwe ontvanklikheid daarvoor.

Opperman het boonop nog ʼn suksesverhaal, die Netwerk vir Afrikanerbelange, met die gehoor gedeel. Die netwerk het die bates van verskeie kultuurorganisasies wat ontbind het bymekaar getrek en is deesdae die “stukrag vir Afrikaners” in Namibië.

“Vanuit Namibië kan ek vir julle sê daar is hoop, ʼn roepingsbewustheid, visie en talle jong mense wat by die toekoms van Afrikaners betrokke is,” het hy bygevoeg.

ʼn Uitgesoekte groep Afrikaner-kultuurorganisasies het tydens die FAK se leierskapkonferensie Dinsdag in Centurion saam besin oor die toekoms van dié kultuur. Foto: Verskaf.

Dr. Danie Langner, besturende direkteur van die FAK, het gesê kultuurorganisasies kan hoop vir Afrikaners skep deur ʼn gemeenskapsgesentreerde selfdoenbenadering wat weg van staatsafhanklikheid beweeg.

“Bly getrou in die bediening van die Woord, gaan terug na die skool, versorg jou mense en sorg dat hulle blyplek het,” het hy gesê.

Langner het die kultuurorganisasies aangemoedig om na hulle “historiese DNS te kyk om te sien waar hulle kulturele kapitaal kan ontsluit en dit eietyds kan toepas”.

Hy het die NG-gemeente Lyttelton as voorbeeld voorgehou waar die kerk deesdae ʼn skool vir 90 leerders bedryf, asook woonstelle vir jong werkende mense en konferensiefasiliteite aangebou het en ʼn maatskaplike fasiliteit geskep het vir kinders wat nie noodwendig in ʼn kinderhuis geplaas kan word nie.

Konferensiegangers het na afloop van die geleentheid ook deelgeneem aan ʼn boomplantseremonie ter herdenking van die 500 jaar sedert Martin Luther sy 95 stelling aan Wittenberg se kerkdeur vasgespyker. Luther se optrede het eindelik tot ʼn skeuring in die kerk gelei en tot die ontstaan van Evangeliese-Lutherse kerke en ander Protestantse denominasies.

Argieffoto

Twee mans, onderskeidelik 24 en 27 jaar oud, is in hegtenis geneem in verband met die moord op ʼn 63-jarige man van Centurion.

Konst. Tumisang Moloto, polisiewoordvoerder, het Dinsdag aan Maroela Media gesê die man se liggaam is Maandag teen 11:30 by sy huis in die Brazzaville-nedersetting in Atteridgeville aangetref.

“Die slagoffer se vriend het op sy liggaam afgekom toe hy na die man se woning is om daar besoek af te lê. Hy het die slagoffer op die vloer aangetref en dadelik die polisie ontbied,” het Moloto gesê. “Die man se huis was geplunder en die slagoffer het beserings aan sy bolyf gehad. Hy is deur paramedici op die toneel dood verklaar.”

Die polisie het inligting en leidrade opgevolg wat later dieselfde dag tot die verdagtes se inhegtenisnemings in Brazzaville gelei het.

“Die motief agter die moord is nog nie bekend nie en word ondersoek.”

Die Atteridgeville-polisie ondersoek ʼn saak van moord.

Phomolo Maoba. Foto: Via Facebook

Tugstappe word teen ʼn student aan die Noordwes-Universiteit (NWU) gedoen nadat sy vermoedelik te midde van Maandag se landswye Swart Maandag-optogte ʼn gewraakte inskrywing op Facebook gemaak het.

“Om swart te dra sal niks help nie, want julle sal vermoor word nes jul baas Terreblanche” (sic) – lui ʼn inskrywing in Engels wat skynbaar Maandag op Phomolo Maoba se Facebook-blad verskyn het.

Talle sosialemediagebruikers het dié opmerking met verontwaardiging ontvang, dit as rassisties bestempel en van die NWU geëis om stappe te doen aangesien sy aan dié instelling se Potchefstroom-kampus studeer. Sommige gebruikers het ook met haatspraak en dreigemente gereageer.

Prof. Fika Janse van Rensburg, adjunkvisekanselier van die Potchefstroom-kampus van die NWU, het Dinsdag bevestig die NWU is bewus van die eienaar van die Facebook-blad se uitlating en nodige maatreëls word getref, “soos wat ons in al sulke gevalle doen”.

“Ek en die student was in gesprek. Sy word aangekla en die verhoor sal spoedig plaasvind. Dit is nou belangrik dat die vuur wat sy aangesteek het, nie verder gestook word nie,” het Janse van Rensburg gesê.

“Ek vra dus van almal om verantwoordelik kommentaar te lewer en die dissiplinêre proses sy gang te laat gaan.”

Maoba het intussen verskoning gevra vir die plasing: “Swart Maandag-boere. Ek is so jammer vir elke ongeskikte kommentaar wat ek geplaas het. Dit is nie reg vir enigeen om dit te plaas nie. Ek is innig jammer.”

Janse van Rensburg het gesê kommentaar in reaksie op Moaba se plasing gaan ook ondersoek word.

‘n Skermskoot van die uitlating.

Argieffoto

Twee verdagtes is in hegtenis geneem in verband met die moord op ʼn onderwyseres van Mahikeng in Noordwes wie se ontbinde liggaam verlede week gevind is.

Maroela Media het vroeër berig die onderwyseres, Thulisile Ngwenya (56), is verlede Sondag as vermis aangemeld.

“Ngwenya was ʼn onderwyseres aan die Lekoko Primary School buite Mahikeng en is verlede Saterdagoggend vir die laaste keer gesien toe sy na ʼn bank in die dorp gegaan het,” het kapt. Yvonne Maqoboza gesê. “Haar voertuig, ʼn Mazda CX3, is later verlate naby die taxistaanplek op die dorp opgespoor.”

Die polisie het vermoed sy is ontvoer voordat sy vermoor is. ʼn Herder het Woensdag op Ngwenya se liggaam in bosse naby die Lorwaneng-nedersetting afgekom.

“ʼn Toegewyde span speurders in samewerking met die misdaadintelligensie-eenheid het ʼn deurbraak gemaak met die inhegtenisneming van twee verdagtes. Hulle is Maandag in Johannesburg in hegtenis geneem.”

Die polisie het tydens die inhegtenisnemings op Ngwenya se selfoon beslag gelê.

Die verdagtes, onderskeidelik 50 en 51 jaar oud, sal na verwagting Woensdag in die Mmabatho-landdroshof verskyn op aanklagte van moord en ontvoering.

Fikile Mbalula. Foto: ANA

Die burgerregte-organisasie AfriForum het Dinsdag Fikile Mbalula, minister van polisie, daarvan beskuldig dat hy ’n fabriseerder en verspreider van fopnuus is en dat die minister “meer besorgd is oor sy eie politieke agenda as oor die publiek se veiligheid”.

Dit spruit uit ’n verklaring deur Bongani Mkongi, adjunkminister van polisie, waarin mense wat vir die prioritisering van plaasmoorde vra as ondersteuners van Isis en die Ku Klux Klan en as “Hitler Fascist Mafia” uitgekryt word, gepaard met verskeie boodskappe wat Mbalula op sosiale media versprei.

Mkongi se verklaring is glo intern onder polisielede gesirkuleer. Mkongi skryf verder: “The racist attack by Afri-Forum [sic] against the Minister of Police Hon Fikile Mbalula are in the same paradigm as those of PW Botha and DF Malan regime [sic] who attempted to demonise OR Tambo and urinate on the blood and sweat of Umkhonto we sizwe [sic] when they were fighting for political and economic freedom in their lifetime.” Hy beweer verder dat AfriForum vlae verbrand het.

Ernst Roets, adjunk- uitvoerende hoof van AfriForum, het gesê dat die departement van polisie op die voorpunt van fopnuus is. “Mbalula en Mkongi is blatant besig om leuens te versprei en hul gevolgtrekkings daarop te baseer. Dit is vir ons baie duidelik dat die departement van polisie só verstrengel geraak het in sy eie politieke agenda dat die veiligheid van die publiek, en van boere in besonder, geensins op die prioriteitslys is nie. Gister is Bokkie Potgieter, ’n bejaarde boer, op sy plaas in Vryheid vermoor. Mbalula kan egter nie die moord veroordeel en plaasmoorde prioritiseer nie, aangesien hy te besig is om foto’s van vlae te google,” het hy gesê.

Roets het bevestig dat geen vlae by enige van AfriForum se aksies gister vertoon is nie. Foto’s van vlae wat tans op sosiale media versprei word, met die bewering dat dit Maandag vertoon is, is ook reeds as vals ontbloot.

Roets voeg by dat die minister en adjunkminister se bewerings slegs om een van twee redes kan plaasvind. “Dit kan óf wees dat misdaadintelligensie so onbekwaam is dat hulle hulself glo, óf dat die departement van polisie doelbewus fopnuus versprei om ’n vreedsame protesaksie te diskrediteer om hul eie onbekwaamheid te verdoesel.”

“’n Mens sou hoop dat hulle eerder met dieselfde ywer as waarmee hulle AfriForum nou aanval, misdaad en geweld sou aanvat,” het Roets gesê.

Argieffoto: Kent Williamson

Drie boere is Dinsdag in Suid-Afrika vermoor.

“Hoewel inligting nog min is, het ons bevestiging gekry dat ʼn opkomende jong boer vanmiddag in die Griekwastad-omgewing doodgeskiet is,” het Marius Muller, nasionale operasionele koördineerder van AfriForum, Dinsdagaand aan Maroela Media gesê.

Die boer is na bewering omstreeks 17:00 glo deur een van sy plaaswerkers geskiet, waarna dié sy bakkie gesteel en weggejaag het. Die werker het glo ʼn ongeluk met die voertuig gehad en is in hegtenis geneem.

Die boer se naam kan nog nie bekend gemaak word voordat sy naasbestaandes van sy dood in kennis gestel is nie. Die motief vir die moord is nog nie bekend nie.

Maroela Media het navraag by die Noord-Kaapse polisiewoordvoerder gedoen en wag nog vir amptelike terugvoer.

Dié derde moord op ʼn plaas op 31 Oktober 2017 volg skaars ʼn dag nadat duisende Suid-Afrikaners landswyd die strate ingevaar het om teen plaasmoorde te betoog. Die Swart Maandag-optogte het gevolg ná die moord op Joubert Conradie (47), ʼn druiweboer van die Klapmuts-omgewing in die Wes-Kaap. Chris Loubser, ʼn vriend van Conradie, het daarna in ʼn hartroerende video ʼn beroep op die publiek gedoen om Maandag swart aan te trek ter ondersteuning van die land se boere.

Maroela Media het vandag berig ʼn boer is teen 12:30 op ʼn plaas net buite Fochville in Gauteng doodgeskiet. Willie Barnard is na ʼn hospitaal gehaas nadat hy geskiet is, maar het op pad daarheen aan sy wonde beswyk.

Volgens kol. Lungelo Dlamini, provinsiale polisiewoordvoerder van Gauteng, het die voorval plaasgevind toe die twee aanvallers glo vir plaaswerkers vir water gevra en die werkers hulle na die huis geneem het om vir hulle water te kry. “Die aanvallers het toe net losgebrand. ʼn 63-jarige boer is doodgeskiet,” het Dlamini gesê.

Dit volg nadat Barry Baars (55) se liggaam vanoggend op ʼn wildsplaas tussen Ficksburg en Rosendal in die Vrystaat aangetref is.

Kol. Thandi Mbambo, provinsiale woordvoerder van die polisie, het aan Maroela Media gesê Baars se werknemers het omstreeks 09:00 op sy liggaam afgekom waar dit in komberse toegedraai was.

“Ons voorlopige ondersoek dui daarop dat daar met ʼn klein kluis in die kombuis gepeuter is, maar niks is daaruit gesteel nie. ʼn Groot kluis in die slaapkamer is oop aangetref met die sleutel steeds in die deur. Daar was vuurwapens en weermagklere in dié kluis,” het Mbambo gesê.

Die Ficksburg-polisie ondersoek ʼn saak van moord.

Henri van Breda. Foto: ANA

Henri van Breda het Dinsdag in die Wes-Kaapse hooggeregshof getuig hy het nie sy ouers en ouer boer vermoor nie en ook nie gepoog om sy jonger suster, Marli, te vermoor nie.

Van Breda beweer ʼn aanvaller met ʼn byl, geklee in ʼn balaklawa en handskoene, het sy gesin in Januarie 2015 in hul huis in die De Zalze-landgoed in Stellenbosch aangeval. Hy voer aan hy het nie sy gesin vermoor nie.

Van Breda se getuienis, op dag 54 van die verhoor, is regstreeks uitgesaai nadat regter Siraj Desai besluit het hy “is huiwerig om uitsonderings te maak wat die media se grondwetlike reg op vryheid van spraak” sal beïnvloed. Die verdediging het vroeër aangevoer Van Breda sukkel met hakkel en regstreekse uitsending van sy getuienis kan dus ʼn negatiewe invloed op hom hê.

Van Breda, wat Woensdag 23 jaar oud word, het baie ongemaklik gelyk toe sy getuienis begin en kort-kort sweet van sy voorkop gevee. Daar was egter geen teken van hakkel nie en ná ʼn kort verdaging het hy teruggekom en kalmer gelyk gedurende die res van sy getuienis.

Van Breda het aan die hof gesê hulle was ʼn hegte gesin wat dit geniet het om tyd saam deur te bring, veral gedurende vakansies. Hy het in sy getuienis metodiese stellings wat in sy pleitverduideliking gemaak is, herhaal.

Toe Van Breda se regsverteenwoordiger hom gevra het hoekom hy nie sy pa, ma en broer probeer help het nie, het hy gesê: “Ek was net bang. Ek kan nie onthou wat deur my kop gegaan het nie. Ek het beslis nie helder gedink nie. Ek was net baie bang.”

Soms kon hy nie sekere besonderhede onthou nie, maar hy kon wel die presiese posisies van sy hande aandui toe hy met die aanvaller gestoei het. Sy geheue oor die struweling met die aanvaller was presies.

Van Breda het beweer hy kon “nogal maklik” die byl by die aanvaller afneem waarna hulle oor die mes gestoei het wat tot die beserings aan sy arms en bolyf gelei het. Die staat voer aan hierdie wonde is self toegedien.

Susan Galloway, senior staatsaanklaer, het haar kruisondervraging begin deur aan Van Breda uit te wys dat hy nie hakkel nie. “Ek het daarop gefokus om nie te hakkel nie. Ek het gesweet,” het hy aan die hof gesê.

Sy het hom gevra hoekom hy nie die eerste getuie vir die verdediging is wat getuig nie, soos normaalweg gedoen word en geïmpliseer hy pas sy getuienis aan by dit wat hy in die hof gehoor het. Van Breda het gesê hy volg sy regsverteenwoordiger se advies.

Galloway het toe aangevoer Van Breda het nie ʼn probleem gehad om regdeur die verhoor na foto’s van die misdaadtoneel te kyk nie. “Ek stem nie saam nie. Ek het na die foto’s gekyk en dit nie geniet nie,” het Van Breda geantwoord.

Galloway het verskeie kwessies geopper wat sy aanvoer nie sin maak nie, waaronder hoekom die familie se hond, Sasha, nie daardie aand geblaf het nie. Van Breda het gesê Sasha het “ʼn toeval soortgelyk aan ʼn beroerte” gehad kort nadat hulle vanaf Australië na Suid-Afrika teruggekeer het. Die moontlikheid bestaan dat medikasie haar “swak” gemaak het.

Galloway het ook bevraagteken hoekom sy ma en suster op hul gemak daarmee sou wees om net in moulose hempies en onderklere te gaan ondersoek instel het. Van Breda het geantwoord hy sou nie van hulle verwag om in die middel van die somer japonne aan te trek nie.

Galloway het daarna deur die verskillende vlakke van veiligheid by die landgoed gegaan en bevraagteken hoe inbrekers heeltemal ongesiens by die huis, geleë in ʼn sentrale gebied, ingekom het. “Hulle het daarin geslaag om ʼn huis in die landgoed te kies waarvan die agterdeur oopgelaat is. So, daar is maklike toegang tot die huis en dan verander alles. Hulle verwyder nie waardevolle eiendom wat baie duidelik [in die huis] sigbaar is nie. Een mens gaan by die trappies op en val die gesin aan.”

“Dit is wat ek gesien het,” het Van Breda geantwoord. “Uit die bewyse is daar ʼn redelike moontlikheid dat iemand toegang gehad het tot ʼn ingangskaart om by die landgoed in te kom.”

Galloway het Van Breda gevra of hy die verskil verstaan tussen ʼn “moontlikheid” en ʼn “redelike moontlikheid”.

“Redelike,” het hy met ʼn effens grynslag geantwoord.

Lees alle vorige berigte oor Henri van Breda op Maroela Media.

Argieffoto

Suid-Afrika se uitgebreide werkloosheidkoers het in die derde kwartaal van 2017 tot ʼn rekordhoogte van 36,8% gestyg.

Statistieke Suid-Afrika het Dinsdag gesê 92 000 werksgeleenthede is in dié kwartaal geskep, teenoor 33 000 werksoekers wat die mark betree het. Dit het daartoe gelei dat die amptelike werkloosheidkoers onveranderd gebly het op 27,7%.

Volgens StatsSA se kwartaallikse arbeidsmagpeiling (QLFS), is dit steeds 0,6% hoër in vergelyking met dieselfde tydperk verlede jaar.

Die meeste bedrywe het kwartaal-tot-kwartaal-werkskeppingsgroei aangeteken, afgesien van vervaardiging, konstruksie en landbou wat onderskeidelik indiensnemingsafnames van 50 000, 30 000 en 25 000 getoon het. Die grootste afname in die werkloosheidkoers in provinsies is in die Vrystaat (afname van 2,6%), Limpopo (afname van 1,7%) en Mpumalanga (afname van 1,6%) waargeneem.

Die land se uitgebreide werkloosheidkoers wat mense insluit wat werk gesoek, maar moed verloor en ophou soek het, het met 0,2% tot 36,8% gestyg.

StatsSA het gesê mense met ʼn onderrigvlak laer as matriek dra 57,4% tot die werkloosheidkoers by. Jeug (mense tussen 15 en 34 jaar oud) is steeds weerloos in die arbeidsmark met ʼn werkloosheidsyfer van 38,6%, wat 10,9% hoër as die nasionale gemiddeld is.

Die vyf beskuldigdes in die hof. Foto: SAPD

Vyf gevangenes wat verlede week uit ʼn maksimumsekuriteitgevangenis ontsnap en kort daarna weer in hegtenis geneem is, het Dinsdag in die Louis Trichardt-landdroshof in Limpopo verskyn.

Jabulani Mahlangu, Ntshengedzeni Manukha, Ntshavheni Munyai, Chris Faku en Justice Makamu is vyf van sewe gevangenes wat Donderdagaand ná ʼn oproer uit die Kutama Sinthumule-tronk ontsnap het. Brig Motlafela Mojapelo, woordvoerder van die polisie, het gesê die saak teen die vyf beskuldigdes is tot 23 November uitgestel vir nadere ondersoek.

Intussen het Phathutshedzo Funky Mugwena (20) en Netshiluwani Tshifhiwa Alycate (32) ook Dinsdag in die landdroshof verskyn. Mugwena en Alycate word daarvan aangekla dat hulle vier van die ontsnapte gevangenes skuiling gegee het. Mojapelo het gesê die twee is op borgtog van R1 000 elk vrygelaat en moet weer op 23 November in die hof verskyn.

Maroela Media het vroeër berig tronkbewaarders by die Kutama Sinthumule-tronk het glo verlede week begin staak en die gevangenes het munt geslaan uit die situasie. “Hulle het op ʼn verwoestingstog gegaan, voorwerpe aan die brand gesteek en skade aan die eiendom aangerig. Tydens die chaos het sewe gevangenes ontsnap,” het Mojapelo gesê.

Faku (37), wat skuldig bevind is op aanklag van roof met verswarende omstandighede, is net ʼn dag ná die ontsnapping aangekeer. Mahlangu en Munyai, wat onderskeidelik tronkstraf uitdien op aanklagte van verkragting en moord, is Saterdag aangekeer. Manukha (37) van Thohoyandou, die vierde verdagte wat in hegtenis geneem is, is Saterdagmiddag in Waterval buite Louis Trichardt vasgetrek. Makamu (27) is Sondag in Musina in hegtenis geneem.

Die twee oorblywende gevangenes, Nyota Raphael (30) en Phathutshedzo Nemadodzi (34), is steeds op vrye voet.

Owerhede op die toneel waar ʼn bakkie in ʼn fietspaadjie in Manhattan in New York City ingejaag het (31 Oktober 2017). Foto: AP Photo/Bebeto Matthews

Agt mense is dood nadat ʼn bakkie Dinsdagmiddag in ʼn fietspaadjie in Manhattan in die stad New York ingejaag het in ʼn aanval wat as terreur bestempel word.

ʼn 29-jarige man het met ʼn gehuurde bakkie in die fietspaadjie afgery waarna die bakkie teen ʼn skoolbus gebots het. Die verdagte het met twee handwapens uit die bakkie gespring voordat hy deur die polisie geskiet en hospitaal toe geneem is.

CNN berig die verdagte is intussen as Sayfullo Habibullaevic Saipov geïdentifiseer. Hy is van Oezbekistan afkomstig en woon al sedert 2010 in die VSA. Verskeie mediabronne het berig ʼn nota wat in die bakkie gevind is, het gelui die aanval is uitgevoer in die naam van die Islamitiese Staat (Isis).

Bill de Blasio, burgemeester van New York, het gedurende ʼn mediakonferensie gesê die voorlopig beskikbare inligting oor die voorval dui op ʼn terreuraanval. “Ons weet tot dusver van agt onskuldige mense wat hul lewe verloor het en meer as 12 is beseer,” het hy gesê.

Owerhede op die toneel waar ʼn bakkie in ʼn fietspaadjie in Manhattan in New York City ingejaag het (31 Oktober 2017). Foto: AP Photo/Bebeto Matthews

Andrew Cuomo, goewerneur van New York, het gesê daar is geen bewyse tans dat die terreuraanval deel van ʼn groter plan is nie. Volgens Cuomo is daar geen voortdurende of bykomende gevaar vir New York City ná die bakkievoorval nie.

Chen Yi, ʼn Uber-bestuurder, het die aanval sien gebeur. “Ek het baie bloed daar gesien. Baie mense het op die grond gelê,” het Yi gesê.

Eugene Duffy, ʼn sjef by ʼn plaaslike restaurant, het gesê: “Talle polisiebeamptes het hier aangekom en hulle het nie geweet wat gebeur nie. Mense het geskree. Vroue het so hard as wat hulle kon, geskree.”

Polisiebeamptes het die strate rondom die westelike rand van Manhattan al langs die Hudson-rivier afgesper en beamptes is vinnig deur die buurt ontplooi terwyl mense voorberei het vir Halloween-feestelikhede, waaronder die groot jaarlikse optog (parade) deur Greenwich Village.

Christopher Panayiotou, Sinethemba Nenembe en Zolani Sibeko in die hof (26 Oktober 2017). Foto: Raahil Sain/ANA

Christopher Panayiotou gaan moontlik sy lot op sy 31ste verjaarsdag aanhoor wanneer regter Dayalin Chetty na verwagting sy uitspraak Donderdag in die Port Elizabeth-hooggeregshof sal lewer.

Chetty het ná die slotbetoë Dinsdag laat hoor dat hy sy uitspraak binne die volgende twee dae sal lewer.

Dit is in dié stadium nog onduidelik hoe lank die uitspraak sal duur omdat daar ʼn magdom bewyse is wat opgesom moet word.

Verlede jaar het die Panayiotou-familie sy verjaarsdag met koek en wegneemetes in die polisie se aanhoudingselle gevier.

Panayiotou, Sinethemba Nenembe en Zolani Sibeko staan tereg op aanklagte wat verband hou met die sameswering om Jayde Panayiotou te ontvoer en vermoor op 21 April 2015. Die moordverhoor het verlede jaar Mei begin.

Peter Daubermann, vir die verdediging, het aangevoer die feit dat Nenembe, Sibeko en die ontslape vermoedelike huurmoordenaar Siswe Vumazonke met mekaar kommunikeer het, is nie aanduidend van die inhoud van daardie gesprekvoering nie.

“Daar is geen bewyse voor hierdie hof oor die verhouding tussen Nenembe, Sibeko en Vumazonke en waaroor hulle met mekaar gekommunikeer het nie,” het Daubermann gesê.

Daubermann het aangevoer die staat steun bloot op omstandigheidsgetuienis en gebruik “bespiegeling en opgemaakte scenario’s” wanneer dit by sy kliënte [Nenembe en Sibeko] kom.

Daubermann het beklemtoon daar is geen bewyse wat aandui dat Sibeko bewus was van die sameswering nie.

“Daar is nie bewyse wat Nenembe en Sibeko in die motor waarmee Jayde ontvoer is, “plaas” nie. Selfs al bevind die hof Sibeko het saam met Vumazonke en Nenembe gereis na Jayde se woning op 15 en 16 April in die Toyota Etios, beteken dit nie hy het ingestem om enige misdaad te pleeg nie,” het Daubermann gesê.

Hy het bygevoeg indien Sibeko aanvanklik aan die uitvoering van die moord deelgeneem het, het hy hom duidelik daarvan gedistansieer deur sy samewerking te beëindig. Die staat het nie op die klagstaat beweer dat Sibeko teenwoordig was op 21 April 2015 toe Jayde buite haar huis ontvoer is nie.

Hy het verder aangevoer die staat se getuies wat die selfoonrekords van die beskuldigdes moes ontleed, is nie kundiges op dié gebied nie. Die staat het ʼn selfoondata-ontleder ingespan om te probeer bewys dat Nenembe en Sibeko aandadig was aan Jayde se moord deur die ligging en beweging van hul selfone op verskillende tye in die tydperk nét voor Jayde se moord te meet.

Daubermann het melding gemaak van wetenskaplike hulpbronne en prof. RP Coutts aangehaal oor hoekom die staat se selfoondata-ontleders glo nie as betroubaar geag kan word nie.

“Thereza Botha het self erken sy is nie ʼn kenner op die gebied van selfoonnetwerke nie en is dus nie opgelei om enige mening oor die ligging of beweging van die betrokke selfone te lug nie.”

Die saak is tot Donderdag uitgestel.

Willem Woux. Foto: Facebook

ʼn Rusie het glo daartoe gelei dat ʼn boer van die Griekwastad-distrik in die Noord-Kaap Dinsdagmiddag op sy plaas doodgeskiet is.

Brig. Mohale Ramatseba, woordvoerder van die polisie, het gesê die 35-jarige boer is omstreeks 15:00 op die plaas Bonteheuwel doodgeskiet. Die polisie het nie die naam van die boer bekendgemaak nie, maar Marius Muller, nasionale operasionele koördineerder van AfriForum, het die boer as Willem Woux geïdentifiseer.

Volgens Ramatseba het Woux ʼn hewige rusie met ʼn 32-jarige plaaswerker gehad wat daartoe gelei het dat Woux met ʼn .22-geweer in sy bors geskiet is. Ná die skietery het die werker in Woux se Ford Ranger-bakkie gevlug. “Die verdagte het ook ʼn 26-jarige man geskiet wat in die hospitaal opgeneem is vir behandeling,” het Ramatseba gesê.

Hy het gesê die polisie is ontbied en het die verdagte agternagesit. Die verdagte het beheer oor die bakkie verloor en dit het omgeslaan. Hy het daarna te voet probeer vlug en die polisie het hom in hegtenis geneem.

“Daar is op die geweer beslag gelê. Die vuurwapen se reeksnommer is afgevyl,” het Ramatseba gesê. Die verdagte sal binnekort in die plaaslike landdroshof verskyn op aanklagte van moord en poging tot moord.

Woux is die derde boer wat Dinsdag op ʼn plaas vermoor is. Willie Barnard is omstreeks 12:30 op ʼn plaas buite Fochville in Gauteng geskiet. Hy is na ʼn hospitaal gehaas, maar het op pad daarheen aan sy wonde beswyk. Barry Baars (55) se liggaam vroeër Dinsdagoggend op ʼn wildsplaas tussen Ficksburg en Rosendal in die Vrystaat aangetref. Daar was ʼn skietwond aan sy ken.

Ian Cameron, hoof van gemeenskapsveiligheid by AfriForum, het Woensdag aan Maroela Media gesê daar was tot dusver vanjaar altesaam meer as 350 plaasaanvalle en 74 plaasmoorde.

‘n Swart Maandag-optog in Pretoria. Foto: Facebook

As jare lange rubriekskrywer vir Maroela Media en lid van AfriForum via vroulief se sake-onderneming, moes die uwe met verbystering toesien watter etikette deur minstens twee ministers en ’n adjunkminister vir hom omgehang word. Hieronder tel Isis en die KKK, en ’n string lelike dinge soos rassisme. Dít terwyl ’n advertensie van AfriForum Jeug feitlik daagliks op ’n plaaslike radiostasie speel waarin beklemtoon word dat dié organisasie nie rasseklassifikasie voorstaan nie.

AfriForum en Maroela Media is albei deel van die Solidariteit Beweging, waarvan ook Helpende Hand en die FAK deel is. Ook hulle word onregstreeks betrek. Hulle sou deur deelname of simpatie met Swart Maandag op ’n manier OR Tambo en Umkonte we Siswe geminag het. Dat die byeenkomste wel deur gebed en oproepe om versoening gekenmerk is, word verswyg.

Adj.min. Bongani Mkongi, min. Fikile Mbalula se regterhand, het duidelik verbaal die kluts kwytgeraak toe hy vir sy ewe breedsprakerige minister in die bresse probeer tree het.

Nathi Mthetwa, minister van kultuur en vorige minister van polisie, het sy gebruiklike onderrok oor plaasaanvalle duidelik laat uithang. Waar hy tevore protesaksie in enige vorm deur AfriForum as “goedkoop propaganda” afgemaak het, was hy weer op sy stukke deur ook die fopnuus oor die verbrand van vlae as feite op te dis.

Die kern van die beskuldigings, as min. Mbalula se effens meer gebalanseerde mening ingewerk word, is dat ’n groep onverantwoordelike mense die ou landsvlag na (van) die saamtrekke geneem het, en dat die nuwe landsvlag ook by van die saamtrekke verbrand is.

Mense het die kuberruimte ingespan om die bewerings van die ou landsvlag verder te versprei. Heel gepas noem Netwerk24 hulle vandag in die hoofartikel “internet-trolle” en voeg by dat hulle nou reeds daarvoor bekend is. Netwerk24 meld selfs dat ’n Johannesburgse dagblad in die slaggat getrap het om so ’n foto te plaas as sou die ou vlag by die Swart Maandag-saamtrek vertoon gewees het, terwyl dit ’n ou foto is.

‘n Swart Maandag-optog in Pretoria. Foto: Facebook

Verskeie instansies wys daarop dat die Swart Maandag-geleentheid nie deur hulle gereël is nie, maar deur ’n Stellenbosse student en plaasmeisie, wat onderweg van die huis na die universiteit by die Conradies se plaas by Klapmuts verbygery het.

AfriForum was wel in volle solidariteit. Volgens verskeie leiers van AfriForum was daar geen vlae by van hul saamtrekke nie. Fopnuus het klaarblyklik ’n belangrike rol gespeel om die verhoudinge tussen die ministers en AfriForum te vertroebel.

Mbalula het baie onlangs aangedui dat ’n taakspan, hoofsaaklik met die samewerking van Agri-SA, saamgestel is wat sal lei tot ’n soort spesiale reaksiemag op grondvlak wat spesifiek op plaasaanvalle sal fokus. Agri-SA het opgewonde en positief daarop reageer. Dit sal jammer wees as die Swart Maandag-gebeure (veral gelaai met fopnuus) dié inisiatief laat ontspoor.

Dit mag natuurlik wees dat Mbalula sedert sy aankondiging oor die taakmag deur kollegas aangespreek is, en dat hy ’n verskoning gesoek het om hom daaruit te wikkel. Toe Swart Maandag nie die vandalisme en chaos oplewer wat Suid-Afrikaanse betogings gewoonlik kenmerk nie, is fopnuus bygewerk.

Dit is baie belangrik dat enigeen wat weer ’n soortgelyke gebeurtenis wil beplan, dit in oorleg met die vernaamste rolspelers sal moet doen. Dit moet behoorlik georganiseer word. Die uwe het al tevore self agterop ’n bakkie as deel van ’n optog teen plaasmoorde deur Bethlehem se strate gery, en bra skaapagtig gevoel soos die publiek die prosessie toetende lawaaimakers geamuseerd aangekyk het. Dit het geblyk die byeenkoms is deur twee regse kerke gereël en die res van die gemeenskap is doelbewus nie geken nie.

Dit moet oorweeg word om ’n alternatief vir die ontwrigting van verkeer te vind – in elk geval die omvang wat dit plek-plek Maandag aangeneem het. Mbalula het reeds verskerpte wetstoepassing beloof. Die groot gevaar is egter dat sulke optrede die simpatie van die publiek kan laat verbeur.

Mbalula en Kie gebruik die argument dat daar baie ander moorde in die land ook voorkom, en lê veral klem op babas en jong kinders wat tragies weggeruk word wanneer hulle op speelterreine in die kruisvuur van bendes beland. Of jong meisies wat ontvoer, verkrag, vermoor en tussen die duine weggegooi word.

‘n Swart Maandag-optog in die Wes-Kaap.

Uit kerkgeledere kom daar ’n “verwyt” dat die slagting van babas in die vorm van aborsies uit die openbare gewete verdwyn.

Die Swart Maandag word verwyt asof dit onsimpatiek teenoor hierdie ander tragedies staan.

Miskien sal dit ’n goeie idee wees om die volgende optog te kombineer met belange- en drukgroepe wat hierdie sake dryf. Selfs die polisie kan genooi word om hul protes teen vermoorde kollegas hierby te voeg. Sou dit suksesvol wees (dit is te betwyfel of die wetstoepassers ’n ogie oor die omvang van so iets sal kan hou), sal die boere nie weer verwyt kan word dat hulle die lewe van jong bruin bendeslagoffers minder ag as dié van ’n boer nie, en behoort dié kategorie sy eie werklikheid in protes te kan uitdruk – ’n werklikheid van 156 moorde per 100 000 per jaar. Dis amper vier keer meer as die gemiddeld vir die land, en veel hoër as die vermoorde polisielede per 100 000 per jaar.

Die uwe daag ook die ministers uit om met ’n fynkam deur die nuuskommentare wat min of meer betrekking het op plaasmoorde (en daar was werklik baie) en Swart Maandag te gaan om te sien of enige vorm van sedisie of rassisme bepleit word. Terselfdertyd kan gelet word op die aantal kere dat oproepe om versoening gedoen word. Om te druk vir minderheidsregte is in pas met die Grondwet en die internasionale reg.

Kyk liewer wie in die kabinet probeer die land via ’n kernprogram aan die Russe verkneg. Kyk liewer wie probeer die land se mense deur fopnuus in ’n kennisvakuum hou. Kyk liewer wie die land deur staatskaping en korrupsie help beroof het.

En toon simpatie met die boere wat so ’n enorme vlak van landbouterreur “moet” verduur en laat die staat sy plig nakom.

Argieffoto

Kol. Priscilla Naidu, woordvoerder van die polisie, het gesê die 37-jarige man was in die Kirkwood-gevangenis in aanhouding aangesien hy aangekla word van ʼn huisroof wat verlede maand in Paterson plaasgevind het. Hy sal Woensdag in die hof verskyn in verband met die moorde op Ken Alexander (76) en Elaine Allwright (78).

Vuyani Sifunda (21) het Maandag vlugtig in die Port Elizabeth-landdroshof verskyn in verband met die moorde op die egpaar. Die saak is tot 7 November uitgestel. Sifunda, wat teregstaan op drie aanklagte van moord en twee van roof met verswarende omstandighede, sal na verwagting tydens sy volgende verskyning om borgtog aansoek doen.

Maroela Media het vroeër berig Sifunda is verlede week in hegtenis geneem toe hy in die Paterson-landdroshof verskyn het in verband met ʼn saak van huisbraak.

Alexander en Allwright is einde September wreed in hul huis in Schoenmakerskop aangeval. Alexander is tydens die aanval doodgeslaan. Allwright is erg aangerand tydens die aanval en in ’n kritieke toestand in die hospitaal opgeneem waar sy ʼn paar dae later dood is.

Volgens Naidu word Sifunda ook aangekla van ʼn moord wat op 23 September op die terrein van die Forest Hill-begraafplaas in Schoenmakerskop plaasgevind het. Tyrone Plaatjies (49) is met ʼn hamer doodgeslaan terwyl hy en ʼn vriend in ʼn woonwa gelê en slaap het en deur twee mans oorval is. Die aanvallers het met R50, ʼn selfoon en Plaatjies se voertuig op die vlug geslaan. Plaatjies het op pad na ʼn hospitaal aan sy beserings beswyk.

Naidu het vroeër gesê die polisie verwag om binnekort nog mense in hegtenis te neem.

Kobus en Louisa Koekemoer in die Pretoria-hooggeregshof (31 Oktober 2017). Foto: Phillip Bruwer

Die Pretoria-hooggeregshof het onder meer Dinsdag gehoor wat Poppie se ma en stiefpa se oplossing was om ʼn vyfjarige seuntjie, wat glo ook deur die egpaar mishandel is, te laat bedaar wanneer hy woedebuie gekry het.

Louisa (46) en Kobus Koekemoer (44) se verhoor het Maandag begin, byna ʼn jaar nadat Poppie op 25 Oktober dood by die Brits-hospitaal aangebring is.

Hulle staan tereg op ʼn aanklag van moord, twee aanklagte van aanranding met die doel om ernstig te beseer en ʼn aanklag van kindermishandeling. Van dié aanklagte hou verband met die beweerde aanranding van die vyfjarige seuntjie en ʼn 15-jarige meisie tussen September 2015 en Oktober 2016. Die egpaar het skuld op al die aanklagte teen hulle ontken.

Catharina Tanya Goosen, bestuurder van die Orania Maatskaplike Raad- (OMR-)nasorgsentrum, het in die hof getuig sy het van Januarie 2016 tot September 2016 in die middae na die vyfjarige seun omgesien.

Kobus Koekemoer in die hof. Foto: Phillip Bruwer

“Aan die begin was hy rustig en kalm, maar in April het dit erger geword. Hy het toe sy eerste woedeuitbarstings gekry. Daarna het dit meer gereeld geraak. Hy sou op die grond rondrol, skreeu en ander kinders slaan as hy nie sy sin gekry het nie. As ek nie gou tussenbeide getree het nie, sou die maatjies seerkry,” het Goosen gesê.

Goosen het gesê toe sy die eerste keer die woedeuitbarstings met Louisa bespreek het, het Louisa en Kobus vir haar gesê om hom in ʼn bad met koue water te sit of met ʼn tuinslang nat te spuit.

Oor sy netheid het sy gesê die seun sou partykeer met meisieklere en skoene wat te groot is vir hom daar aankom.

Volgens Goosen het die seun in ʼn stadium vir ʼn week lank weggebly en toe hy terugkom, het hy blou kolle op sy gesig en ʼn knop op sy voorkop gehad. “Ek het hom gevra wat gebeur het. Ná ʼn lang gesukkel het hy gesê die man het hom op die grond gesleep en sy kop teen ʼn tafel gestamp.”

Sy het getuig sy het eendag buite in die tuin gewerk. “Die seun het eenkant alleen op die gras gesit en iets oor ʼn paplepel gemompel. Ek het hom daaroor uitgevra. Hy het gesê die man het ʼn paplepel gekoop om hom en Poppie mee te slaan. Ek het hom gevra of hy baie pak kry by die man, toe sê hy nee, hulle word in die maag geskop,” het sy gesê.

Sy het ook, soos ʼn dagsorgjuffrou Maandag oor Poppie getuig het, gesê dat die seun knypmerke aan sy oorskulpe gehad het. Sy het sedert April 2016, toe dit onder die ORM se aandag gekom het dat die kinders moontlik mishandel word, foto’s van al sy beserings geneem en aan die ORM verskaf vir “monitering”.

Louisa Koekemoer in die hof. Foto: Phillip Bruwer

Die seun is by haar weg toe Louisa en Kobus “oornag” aan die einde van September uit Orania weg is en na ʼn kleinhoewe in Mamogaleskraal buite Brits in Noordwes verhuis het. Byna 25 dae later is Poppie dood. Volgens ʼn patoloog se getuie tydens die egpaar se borgtogaansoek, was die hoofoorsaak van Poppie se dood ʼn harde hou teen haar kop.

Adv. Lana Augustyn, vir Kobus, het in kruisondervraging gesê Kobus sal getuig dat hy en die seun gespeel en gestoei het, toe hy sy kop teen die tafel gestamp het. “Hy sal ontken hy het die seun gesleep,” het sy gesê. Goosen het erken dat dit moontlik is dat die seuntjie van sy beserings tydens ʼn woedebui kon opdoen.

Adv. Adrian Nel, vir Louisa, het dit in kruisondervraging gestel die raad oor die koue water om die seun te laat bedaar kom van ʼn kleuterskooljuffrou af.

Nel het dit met verwysing na die seun se netheid gestel Kobus het nie vir Louisa toegelaat om ander klere te koop nie. “Hulle het ʼn sukkelbestaan gevoer en hul kafee [op Orania] het toegemaak, want hulle was bankrot,” het hy gesê.

“Die kafee het toegemaak, want hulle het oornag verdwyn. Hulle het die kind net by my uitgehaal en verdwyn,” het Goosen vurig geantwoord.

“Hulle het ook nie oornag gegaan nie. Hulle het ʼn treklorrie gekry en niemand het ook gesê hulle mag nie trek nie. Nóg die polisie en nóg die maatskaplike werkers,” het Nel gesê.

Die verhoor duur Woensdag voort. Die Koekemoer-egpaar se buurman op Orania, wat aanvanklik by die ORM aangemeld het dat die kinders glo oormatig gedissiplineer word, gaan na verwagting opgeroep word om te getuig.

Die seun is tans in ʼn plek van veiligheid en gaan na verwagting Donderdag in camera getuig.

Lees die vorige berigte oor Poppie van der Merwe op Maroela Media.

Foto: Twitter.

Die Tshwane-metropolisie het inwoners van Pretoria gewaarsku oor ʼn optog wat Donderdag deur die EFF gehou word.

Supt. Isaac Mahamba, woordvoerder van die Tshwane-metropolisie, het gesê die optoggangers sal van 06:00 op Kerkplein bymekaarkom en dan na die Israeliese Ambassade beweeg by Kings Highway in Hatfield.

Die optoggangers sal van Kerkplein af in die rigting van Paul Krugerstraat beweeg en dan links in Francis Baardstraat indraai.

“Hulle sal dan reguit aan beweeg en dan regs draai in Jan Shobastraat en daarna links in Lynnwoodweg,” het Mahamba gesê.

Van Lynnwoodweg sal hulle links draai in Rosemarystraat en daarna reguit aan beweeg totdat hulle by die Israeliese Ambassade in Kings Highway uitkom.

“Hulle sal na verwagting om 17:00 van die ambassade uitmekaar gaan.”

Mahamba het die versekering gegee dat daar metropolisiebeamptes ontplooi sal word om die optog te monitor. Hy het motoriste aangeraai om dié strate te vermy en alternatiewe roetes te gebruik.

Die EFF het op hul Twitter-rekening bekend gemaak die optog is “teen die okkupasie van Palestina”. Volgens die party sal hulle om 11:00 van die Uniegebou na die Israeliese Ambassade opruk.