Suzan Strydom (Foto verskaf deur Vrystaat-SAPD)

Maroela Media het vroeër berig Suzan Strydom was in ʼn psigiatriese hospitaal in Kaapstad voordat sy Vrydagaand teruggekeer het na haar huis in Bainsvlei. “Suzan en haar man en hul tweejarige dogtertjie, Minneke, het Vrydagaand sonder enige probleme gaan slaap,” het konst. Peter Kareli gesê. Toe die man vanoggend wakker word, het Suzan en Minneke egter spoorloos verdwyn.

“Ons kan met dankbaarheid bevestig dat die vrou en haar dogtertjie veilig in Kaapstad is,” het Kareli aan Maroela Media gesê. “Haar vriende het haar in kennis gestel van die berigte op Facebook en Twitter dat sy vermis word, en sy het dadelik na Kaapstad-polisiestasie gegaan.”

Kareli het gesê haar man het sy dankbaarheid aan Bainsvlei-polisie uitsgespreek dat hulle so vinnig op die inligting reageer het.

Pippa Middleton en James Matthews (20 Mei 2017) AP Photo/Pool)

Pippa Middleton, die suster van Kate, hertogin van Cambridge, is Saterdag in die eg verbind met die welgestelde fondsbestuurder James Matthews.

Die klokke het gelui ná die uur lange seremonie in ʼn yslike markies met mure van glas wat in die gronde naby Middleton se ouers se huis opgerig is.

Middleton (33) en Matthews (41) het vir die skare gewuif en mekaar voor die deur gesoen voordat hulle na die onthaal vertrek het.

Pippa het ʼn tradisionele kortmou rok van wit kant gedra tydens die seremonie wat Engeland se “troue van die jaar” genoem word.

Die rok is deur die bekende ontwerper Giles Deacon gemaak, volgens Robert Johnson, redakteur van die London Evening Standard.

Kate en haar man, prins William, en hul twee kinders prins George en prinses Charlotte, het ook die troue bygewoon. Prins Harry was ook daar, asook die tennisster Roger Federer.

Die driejarige George en tweejarige Charlotte was onderskeidelik hofknapie en blommemeisie tydens die seremonie.

Prins Harry se meisie, Meghan Markle, het nie die geleentheid bygewoon nie.

Volgens berigte in die Britse pers sal die onthaal ʼn Skotse tema hê vir die ongeveer 350 gaste, asook ʼn verbyvlug deur ʼn Spitfire, ʼn Britse Tweede Wêreldoorlog-vegvliegtuig.

Volgens die Daily Mail is 120 gaste na die seremonie en 300 na die onthaal genooi.

Argieffoto

Die polisie in Gauteng het ʼn 42-jarige man in hegtenis geneem op aanklag van mensehandel, die besit van dwelmmiddels en pornografiese materiaal.

Die man is Vrydag in Springs in hegtenis geneem.

Vyf meisies, tussen 14 en 19 jaar oud, is tydens die operasie gered.

Die polisie het tydens die inhegtenisneming beslag gelê op dwelmmiddels en pornografiese materiaal.

Verdere besonderhede is nie dadelik beskikbaar nie.

Wordsworth High School, Benoni

Leerlinge van hoofsaaklik Model C-skole in Benoni, is die afgelope paar maande geteister deur ʼn bende tienerseuns van Daveyton en Etwatwa.

Die leerlinge is van hul selfone, kontant en ander waardevolle items beroof.

“Een lid van die groep is Vrydagmiddag doodgeskiet en ʼn tweede een in hegtenis geneem deur metropolisiebeamptes,” het hoofsuperintendent Wilfred Kgasago gesê. “ʼn Derde verdagte, wat ʼn mes in sy besit gehad het, is deur die leerlinge en die skoolhoof van Wordsworth High School aangekeer.”

Die voorval en inhegtenisnemings het omstreeks 13:30 in Bunyanweg naby die N12-snelweg in Benoni plaasgevind.

“Beamptes van die Ekurhuleni-metropolisie het inligting ontvang dat die bende in Bunyanweg opgemerk is, en hulle het vinnig reageer,” het Kgasago verduidelik. “Die beamptes het twee van die verdagtes genader en een van hulle het ʼn rewolwer op ʼn beampte gerig. Die gewapende verdagte se makker is doodgeskiet.”

Die oorledene was 17 jaar oud en die twee wat in hegtenis geneem is, is glo 16 jaar oud. “ʼn Aanklag van gewapende roof is by Benoni-polisiestasie aanhangig gemaak teen die twee wat in hegtenis geneem is. Hulle sal na verwagting Maandag in die Benoni-landdroshof verskyn.”

Argieffoto ter illustrasie

Drie vroue is Saterdagoggend in Limpopo dood toe ʼn man met ʼn Nissan-bakkie in vyf vroue vasgery het.

“Die voorval het omstreeks 09:30 op die teerpad tussen Leokama en Matlala naby Seshego plaasgevind,” het lt.kol. Moatshe Ngoepe, woordvoerder van die polisie, gesê.

“ʼn 53-jarige man het met ʼn Nissan NP200-bakkie in die vyf vroue, tussen 24 en 46 jaar oud, vasgery. Drie vroue is op slag dood en twee is in ʼn ernstige toestand na die hospitaal geneem.”

Die vroue het glo vir vervoer gestaan en wag om ʼn politieke byeenkoms in Seshego by te woon toe die man hulle getref het.

“Die polisie ondersoek ʼn saak van strafbare manslag. Die ondersoek duur voort.”

Argieffoto

ʼn Prokureur wat spesialiseer in eise teen die Padongelukkefonds (POF) het al hoe meer besorg geraak oor persone wat gekla het dat klaers nie hul POF-betalings ontvang het nie, het ʼn hof in Kaapstad Vrydag gehoor.

Prokureur Paul Davids het getuig in die saak teen voormalige prokureur Eslin Frank Meyer voor landdros Sabrina Sonnenberg. Meyer het skuld ontken op aanklagte van diefstal en versuim om behoorlike rekenkundige rekords te hou.

Meyer (60) het in Mitchell’s Plain en Gordonsbaai as Eslin Meyer Attorneys gepraktiseer, totdat hy deur die Wes-Kaapse hooggeregshof verbied is om te praktiseer ná eise ter waarde van R6 441 657 by die getrouheidsfonds vir prokureurs ingedien is.

Meyer het Davids as ʼn professionele assistent aangestel, in beheer van die firma se departement wat motorvoertuigongeluk-eise teen die POF hanteer.

Davids het die POF se eisprosedures verduidelik terwyl hy onder staatsadvokaat Tommy Bunguzana van die Wes-Kaapse direktoraat vir openbare vervolging, ondervra is. Volgens hom sluit eise die fooie in van mediese praktisyns wat kliënte behandel het vir ernstige beserings wat tydens motorongelukke opgedoen is.

POF-betalings word in die firma se trustbankrekening inbetaal en word aan eisers uitbetaal nadat regsgelde en uitbetalings afgetrek is, het hy aan die hof gesê.

Davids het gesê Meyer was die firma se trustrekeninghouer en Davids het nie self toegang gehad tot die rekening nie.

Davids is omvattend ondervra deur Harley Cloete, regshulpprokureur.

Hy het gesê die motorvoertuigongelukke-eisafdeling het glad verloop onder sy beheer, totdat klagtes oor nie-betaling in 2007 begin het. “As die hoof van die departement was ek die persoon wat met eisers vergader het. Teen 2009 was daar talle klagtes, en dit was moeilik vir my om behoorlik my pligte uit te voer.”

Davids het aan die landdros gesê daar was nooit enige “kwade gevoelens” tussen hom en Meyer nie. Hy was ongelukkig oor die klagtes, aangesien dit sy vermoë beïnvloed het om sy werk te doen. “Die beskuldigde is ʼn goedhartige persoon.”

Die saak hervat op 1 Junie.

Inwoners volg Mmusi Maimane in Matjhabeng, Vrystaat (20 Mei 2017) Foto: @Our_DA, Twitter

ʼn Kultuur van korrupsie het deel geword van die ANC en dit kan nie reggestel word nie, het DA-leier Mmusi Maimane Saterdag gesê.

Maimane het by ʼn openbare vergadering in Matjhabeng in die Vrystaat, as deel van sy nasionale #Change19-veldtog, ges6e hy glo almal stem in dat daar ʼn behoefte vir verandering is.

“Ek dink ons almal stem ooreen dat ons verandering nodig het. Ons land is op pad in die verkeerde rigting en dit kan binnekort te laat wees om om te draai. Ons maak nie meer vordering as ʼn land nie. Ons is nie meer op pad na ekonomiese vryheid vir almal nie.

“Gemeenskappe soos julle in Matjhabeng word agtergelaat deur ʼn regering wat onderneem het om julle vorentoe te neem, maar glad nie van plan is om dié belofte na te kom nie. Hier in die Vrystaat gaan julle gebuk onder ʼn dubbele bedreiging van die ANC-regering onder Jacob Zuma en ʼn provinsiale ANC-regering onder [premier] Ace Magashule.

“Want hierdie twee mans is dieselfde. Die beloftes wat hulle vir hul ryk vriende, die Guptas, maak, beteken baie meer as die beloftes wat hulle aan julle maak voor die verkiesing,” het Maimane gesê.

“Daar was talle gerugte of die ANC Jacob Zuma sal uitskop en hom met iemand anders sal vervang. Ek verseker julle, dit sal geen verandering maak aan die ANC nie. Die kultuur van korrupsie – om geld te steel wat vir gemeenskappe soos julle bedoel is – is nou deel van die ANC. Dit kan nie meer reggestel word nie.

“Om Zuma met iemand anders te vervang, sal mense se lyding vererger. Net so sal dit ook nie die manier waarop die Vrystaat bestuur word, verander indien Magashule met ʼn ander ANC-leier vervang word nie. Dit sal net beteken die naam van die persoon wat kontrakte en tenders aan vriende en familie oorhandig, verander.

“Wanneer ek tydens hierdie veldtog van verandering praat, bedoel ek algehele verandering. Ek bedoel ʼn hele nuwe manier om na Suid-Afrika te kyk. Ek praat van ʼn Suid-Afrika wat sy tweede struggle era ingegaan het, hierdie keer is dit ʼn stryd vir ekonomiese vryheid vir almal. Die stryd om onder die ekonomiese verdrukking onder die ANC-heerskappy te ontsnap.

“Ek praat van ʼn Suid-Afrika waar ons almal ʼn sê het hoe hierdie land van ons herbou moet word: hoe dit moet lyk en hoe ons almal bevoordeel kan word. Ek praat van ʼn Suid-Afrika wat op verdraagsaamheid en respek vir mekaar gebou is… waar geweld teen vroue nie geduld word nie. Waar ons saam opstaan teen enigiemand wat dink hulle het die reg om vroue te behandel soos iets wat hulle besit,” het Maimane bygevoeg.

“Ek praat van ʼn Suid-Afrika wat nie meer die verkragting- en moordhoofstad van die wêreld is nie; waar kinders nie daagliks verdwyn nie en waar ons strate en woonbuurte behoort aan die mense wat daar bly. ʼn Suid-Afrika waar die leiers die voorbeeld stel wat ander kan volg. Waar wet en orde by die leiers begin. ʼn Suid-Afrika wat werk. Wat werk in elke dorp en stad skep en wat belê in opleiding en opvoeding vir ons jeug om hierdie poste te vul.

“Ek praat van ʼn Suid-Afrika wat vry is van die ANC. Ons moet begin om oor ons toekoms sonder die ANC te praat. Slegs dan kan ons vorentoe beweeg. Dit help nie ons dink aan ons self as net DA, net ANC of net EFF en almal anders as ons vyande nie. Ons moet oor hierdie grense begin dink. Ons moet diegene wat dieselfde Suid-Afrika wil bou, as ons vriende beskou.

“ʼn Nuwe regering wat ons land van die ANC red sal op koalisies en samewerking gebou wees. Dit is hoe ons besig is om munisipaliteite soos Johannesburg, Tshwane en Nelson Mandelabaai om te draai, en dit is hoe ons Suid-Afrika sal omdraai.

“Ons moet anders dink en anders stem. En die enigste mense wat dit kan laat gebeur, is julle, die kiesers. Julle het die mag om ons toekoms te vorm,” het Maimane gesê.

Kitso Mothibe (Foto: Herman Mashaba, Twitter)

Die soektog na ʼn 13-jarige meisie wat drie weke gelede as vermis aangemeld is, is afgelas nadat haar niggie haar gevind het.

Kol. Lungelo Dlamini, woordvoerder van die polisie, het gesê haar gesondheidstoestand is nog nie bekend nie, maar maatskaplike werkers hanteer die saak. Sy is by Parkstasie in Johannesburg gevind.

“Die polisie het al hul beskikbare hulpbronne gebruik om haar op te spoor,” het Dlamini verduidelik.

“Bewerings dat die polisie huiwerig was om haar ouers by te staan, vorm deel van ʼn interne ondersoek,” het hy gesê.

Die provinsiale kommissaris van Gauteng, lt.genl. Deliwe de Lange, is baie besorg oor die houding van lede wat versuim om aan die polisie se gedragskode te voldoen. “Beamptes moet ʼn verantwoordelike en doeltreffende diens van hoë gehalte lewer wat vir elke persoon beskikbaar is,” het De Lange gesê.

Die 13-jarige Kitso Mothibe se stiefpa het Talk Radio 702 verlede week gekontak en gesê die polisie het ʼn versoek om haar te vind, ignoreer. Hy het beweer die Johannesburg Sentraal-polisiestasie het hom geïgnoreer.

Die polisie het Donderdag toegeslaan op ʼn gekaapte gebou in die Johannesburgse middestad waar hulle vermoed het Mothibe word aangehou.

Herman Mashaba, burgemeester van Johannesburg, het gesê hy het Saterdagaand met Kitso se pa gepraat. “Die gesin is uiters verlig. Ons sal hulle bystaan met enige ondersteuning wat hulle nodig het.”

Die polisie en ander wetstoepassingsagentskappe, in samewerking met die Stad Johannesburg duur voort om kriminele elemente in die middestad uit te roei, veral in verlate geboue wat vermoedelik ʼn wegkruipplek vir misdadigers is,” het Dlamini bygevoeg. “Enige inligting wat van lede van die gemeenskap ontvang word, sal opgevolg word.”

Vusi Motha, uitvoerende burgemeester van Mkhondo-munisipaliteit (Piet Retief) in Mpumalanga

Die polisie in Piet Retief stel ondersoek in ná ʼn poging tot moord op die uitvoerende burgemeester van Mkhondo-munisipaliteit.

Brig. Leonard Hlathi, woordvoerder van die polisie, het gesê die burgemeester, Vusi Motha, is verlede week Sondag, omstreeks 19:40, in ʼn lokval gelei op die pad tussen plantasies terwyl hy op pad was huis toe nadat hy sy ouers besoek het. “Hy het ʼn boomstomp in die pad sien lê en is gedwing om agteruit te ry, toe hy skielik geweerskote gehoor en iemand voor sy motor gesien het wat op hom skiet.”

ʼn Onbekende getal mans het aan die linkerkant van sy motor te voorskyn gekom en ook op hom geskiet. “Hy kon ongedeerd te voet van die toneel vlug in ʼn nabygeleë woud.”

Hlathi het gesê die burgemeester se motor is vol gate geskiet en die polisie versoek enigiemand met inligting om kapt. Cosmos Khalishwayo te kontak by 082 415 6403.

Lt.genl. Mondli Zuma, provinsiale polisiekommissaris, het gesê persone wat geen agting het vir ander persone se lewe nie, moet geïsoleer word en agter tralies geplaas word. Hy is geskok oor die poging tot moord op die burgemeester. Hy het die gemeenskap versoek om patrioties te wees en die polisie by te staan in hul ondersoek.

Foto verskaf deur Limpopo SAPD

Die polisie in Limpopo het beslag gelê op ʼn groot hoeveelheid onwettige vuurwapens en gesteelde motors en verskeie persone is in hegtenis geneem tydens ʼn teen-misdaadoperasie die afgelope naweek.

Die provinsie het ʼn groot aantal misdaadvoorvalle beleef waar onwettige vuurwapens gebruik is, insluitend gewapende rooftogte, huisbrake, plaasaanvalle, sakerooftogte en moorde, het lt.kol. Moatshe Ngoepe, woordvoerder van die polisie, gesê.

“Diefstal en kaping van motors is ook ʼn probleem. Individue, ondernemings en huise word geteiken.”

ʼn Gesamentlike operasie is die naweek tot Sondagoggend uitgevoer met die fokus om “hierdie misdaadkategorieë uit te roei”, het Ngoepe bygevoeg.

Altesaam 30 verdagtes, tussen 21 en 47 jaar oud, is in hegtenis geneem en daar is beslag gelê op 12 ongelisensieerde vuurwapens, 75 patrone vir verskeie vuurwapens, twee vuurwapenmagasyne, drie gesteelde motors, een gekaapte motor, een enjin wat uit ʼn Volkswagen gesteel is en een motor wat deur misdadigers gebruik is om misdaad te pleeg. Die geraamde waarde van die motors, insluitend die enjin, beloop R1,1 miljoen.

Die vuurwapens en motors is in Mahwelereng naby Mokopane (Potgietersrus), Musina, Maake naby Tzaneen, Thohoyandou, Nebo naby Groblersdal, Morebeng naby Polokwane (Pietersburg), Roedtan naby Modimolle (Naboomspruit), Ritavi naby Tzaneen, Motetema naby Groblersdal, Burgersfort en Lephalale (Ellisras) gevind.

Lt.genl. Nneke Ledwaba, provinsiale polisiekommissaris, het weer die inwoners van die provinsie verseker dat die polisie nie sal rus totdat alle onwettige vuurwapens van die strate verwyder is nie, en het die publiek aangemoedig om ten alle tye met die polisie saam te werk.

Hy het die span beamptes van die verskeie polisie-eenhede geloof wat aan die skoonmaakoperasie deelgeneem het.

Die persone wat in hegtenis geneem is, sal binnekort in die verskeie landdroshowe verskyn. Die polisie se ondersoek duur voort, het Ngoepe bygevoeg.

Argieffoto

Die Suid-Afrikaanse burgerlike organisasie Sanco het ʼn beroep op die polisie gedoen om selfbeheersing te toon tydens gemeenskapsbetogings.

Dit volg ná twee tieners van Mpumalanga glo deur polisiebeamptes doodgeskiet is tydens ʼn betoging teen beweerde korrupsie in die Lekwa-munisipaliteit.

Jabu Mahlangu, woordvoerder van Sanco, het gesê lewensverlies en die verwoesting van privaat en staatseiendom moet nie plaasvind wanneer gemeenskappe hul grondwetlike reg uitoefen om beter dienslewering of aanspreeklikheid te eis nie.

“Kragtens die nasionale opdrag vir openbare orde-polisiëring, word daar van die polisie vereis om die hoogste graad van verdraagsaamheid te toon tydens gemeenskapsbetogings.

“In hierdie geval moet die onafhanklike polisieondersoek-direktoraat (Opod) ondersoek instel na die omstandighede van die skietery, insluitend die optrede van die polisiebeampte wat die 16-jarige Tshepo Dube en ʼn 14-jarige seun geskiet het. Die bevelvoerder van die operasie moet ook aanspreeklik gehou word,” het hy bygevoeg.

Die nasionale opdrag nasionale opdrag vir openbare orde-polisiëring beveel ʼn voorgeskrewe proses van “voortgesette onderhandeling, vertrouensbou en konflikoplossing” voor terwyl die groep “bestuur” word. “Die voorskrif is in lyn met die gemeenskapspolisiëringsbenadering wat deur die demokratiese staat aanvaar word om die kultuur van menseregte te bevorder,” het Mahlangu gesê.

Douw Wentzel sr. wat in die helikopterongeluk gesterf het (Foto: Facebook)

Louw Deale en Douw Wentzel jr. sterk aan in die Unie-hospitaal in Alberton ná ʼn helikopter-ongeluk Vrydagaand.

Maroela Media het vroeër berig Louw se seun, Andre, en Douw jr. se pa, Douw, is oorlede nadat die helikopter neergestort het toe hulle van die Nampo-oesdag in Bothaville in die Vrystaat op pad was huis toe. Louw en Douw sr. is bekende boere van die Vrede-distrik.

Cronje Deale, Louw se broer, het Sondag aan Maroela Media gesê dit gaan effens beter met Louw en hy reageer al. Sy bloeddruk het ook verbeter.

Volgens Cronje het Douw jr. twee frakture in sy rug opgedoen en sy bobeen is gekraak. “Hy ondergaan môre ʼn operasie,” het hy verduidelik.

Volgens Cronje is dit nog nie presies duidelik wat die oorsaak van die ongeluk was nie. “Dit was definitief meganies. Daar was ʼn harde knalgeluid voor hulle krag verloor het in die helikopter,” het hy gesê. “Die burgerlike lugvaartowerheid was op die toneel en hulle stel ondersoek in.”

Werkers van die plaas Brakpan in Heilbron het Vrydag omstreeks 17:30 gesien hoe die helikopter neerstort,” het brig. Sam Makhele, woordvoerder van die polisie, vroeër aan Maroela Media gesê. Douw en Andre is tydens die ongeluk oorlede. Douw jr. (14) en Louw (49) het die ongeluk oorleef.

Argieffoto

ʼn Tweejarige tweeling word vir rookinaseming behandel nadat ʼn luguitsuier-waaier Sondag by ʼn huis in Table View in Kaapstad aan die brand geslaan het.

“Die tweejariges het in hul kamer geslaap terwyl die versorger buite in die tuin met ʼn vierjarige kind gespeel het,” het Werner Vermaak, woordvoerder van ER24, gesê. “Die versorger het die rook opgemerk en is dadelik in die huis in om die tweeling te red.” Sy moes bystand ontbied omdat sy nie by hulle kon uitkom nie weens die hoeveelheid rook.

“Die ouers het by die huis opgedaag en kon die tweeling uit die kamer red voordat die brandweer of paramedici by die toneel opgedaag het,” het Vermaak bygevoeg.

Die tweeling is vir geringe rookinaseming behandel en is later na die Mediclinic Milnerton geneem vir waarneming.

‘n Vlieënier is dood toe sy ligte vliegtuig Sondag naby die R59 in die rigting van Vereeniging neergestort het (21 Mei 2017) Foto: Stad Ekurhuleni

ʼn Vlieënier is Sondagoggend dood toe sy ligte vliegtuig naby die R59 in die rigting van Vereeniging neergestort het.

“Reddingspanne van Tokoza en Palm Ridge-brandweer het dadelik reageer,” het William Ntladi, woordvoerder van Ekurhuleni se ramp- en nooddienste, gesê. “Die man was steeds binne die wrak van die vliegtuig vasgekeer. Hy het ongelukkig nie reageer op enige behandeling nie en is op die toneel dood verklaar.”

Die polisie en burgerlike lugvaartowerheid stel ondersoek in.

“Die enigste inligting wat tans beskikbaar is, is dat die man by Rand-lughawe in Germiston opgestyg het. Sy bestemming is nog onbekend.”

Gerrie Havenga behaal die tweede plek by Mister Global in Thailand (21 Mei 2017) Foto: Mister Global, Facebook

Die Suid-Afrikaner Gerrie Havenga is Sondag in die tweede plek aangewys tydens Mister Global, ʼn skoonheidskompetisie vir mans.

Mister Global word jaarliks in Thailand aangebied en 30 lande het Sondag aan die kompetisie deelgeneem.

Pedro Henrique Gicca van Brasilië is as Mister Global gekroon. Christopher Joseph Bramell van Engeland was in die derde plek, Fabián Esteban Vera Abello van Chile in die vierde plek en Thuân Nguyên van Viëtnam in die vyfde plek.

Havenga het ook die liggaamsbou-afdeling van die kompetisie gewen.

“Op pad huis toe, land môre 10:00,” het Havenga op sy Facebook-blad gesê. “Wat ʼn ongelooflike ervaring en dankie aan elkeen wat dit vir my moontlik gemaak het om deel te neem.”

Havenga woon in Thabazimbi in Limpopo. Hy is verloof aan die model en fotograaf Dajana Rijetkovic. “Wat ʼn prestasie! Jy het ons asem weggeslaan – en dit met jou eerste kompetisie ooit! Baie geluk met jou prestasie, dit is wonderlik! Jy bly ons wenner. Ons is baie trots! Ek is baie lief vir jou!” het sy gesê.

Marchian Mulder (Foto: Facebook)

Marchain Mulder, ʼn 17-jarige meisie van Pretoria, word ná byna ʼn week steeds vermis.

Etresia van der Westhuizen, Marchain se ma, het Sondag aan Maroela Media gesê daar is nog steeds geen teken van haar dogter nie. “Ons het gisteraand weer tot 03:00 vanoggend oral gaan soek, in parkies, by treinstasies, enige plek waar sy moontlik kan wees. Mens weet nie waar om na haar te soek nie,” het sy verduidelik.

Marchain, ʼn skolier aan die Hoërskool Gerrit Maritz, is verlede Maandag, 15 Mei, laas ná skool gesien. Skoolmaats het gesien sy is op pad na die plek waar sy bly. “Vriende van haar wat in East Lynne in Pretoria bly, het gesê sy het die aand by hulle aangekom. Sy was net vyf minute by hulle en het gesê sy is op pad na my toe. Maar sy het nooit hier aangekom nie.”

Etresia verduidelik Marchain bly nie by haar nie, sy bly in ʼn plek van veiligheid. Waar sy bly, mag hulle nie selfone hê nie. “As sy dalk ʼn selfoon gehad het, dan sou ons haar dalk só kon opspoor.”

Sy het gesê vir elke persoon wat die inligting deel, of elke persoon wat help soek, voel dit vir haar of sy een stappie nader is aan haar dogter.

“Sekondes word minute… minute word ure… ure word dae… dae word nou al ʼn week… My meisiekind asseblief laat weet ons waar jy is as jy die boodskap sien. Ons almal is oneindig baie lief vir jou en jy is baie spesiaal,” het Etresia op haar Facebook-blad geskryf.

Marchain het haar skoolklere aangehad toe sy by die vriende in East Lynne opgedaag het. Sy het ʼn wit hemp, grys broek, swart-en-rooi-baadjie en swart skoolskoene aangehad.

Sy is 1,75 m lank en weeg ongeveer 70 kg. Sy het ʼn litteken op haar regterenkel.

Enigiemand met inligting word versoek om ao BAloyi te kontak by Pretoria-Noord-polisie by 012 353 5600 of Pink Ladies by 072 214 7439.

Adjunkpresident Cyril Ramaphosa (Foto: GCIS)

Dit is noodsaaklik dat ʼn onafhanklike geregtelike kommissie van ondersoek ingestel moet word om deeglik alle bewerings van “staatskaping” te ondersoek, het adjunkpresident Cyril Ramaphosa Sondag gesê.

Hy het tydens die Moses Kotane-gedenklesing in Rustenburg gesê dit moet erken word dat die ANC en sy regering al hoe meer – regverdig of onregverdig – verbind word met korrupsie en persoonlik verryking.

“Die Suid-Afrikaanse Raad van Kerke (SARK) het die afgelope week gewaarsku dat ons op die randjie staan om ʼn ‘mafiastaat’ te word. As ons hierdie bedreiging wil afweer, indien die ANC sy leierskapsrol in die samelewing wil herstel, dan is dit absoluut noodsaaklik dat ons met dringendheid en doelbewus moet optree.

“Dit is noodsaaklik dat ʼn onafhanklike geregtelike kommissie ingestel moet word om deeglik alle bewerings van ‘staatskaping’ moet ondersoek. Slegs deur só kommissie sal ons kan bevestig tot water mate die instansies van ons regering onbehoorlik – en onwettig – gebruik is om ʼn paar individue en families te verryk,” het hy gesê.

“Ons moet agter die kap van die byl kom oor hierdie gerugte, bewerings en berigte. En ons moet optree om alle vorme van kaping, korrupsie en baantjies vir boeties te staak. As deel van hierdie pogings moet die Fica-wysigingswet nou aktief geïmplementeer word, veral wat betref die persone wat polities blootgestel is, om seker te maak dat daar geen ruimte vir onwettige finansiële aktiwiteit is nie.”

Hy het gesê dit is ook belangrik om swakplekke in die bestuur by staatsbeheerde instansies aan te spreek. “Dit het ʼn teiken geword vir persone wat staatshulpbronne wil wanbestuur tot in privaat sakke en oorsese bankrekeninge.

“Ons instansies, veral die ANC, moet leefstyloudits implementeer van almal wat in leierskapstrukture is. Soos die ANC hierdie week voorgestel het, moet ons deursigtigheid oor partypolitieke finansiering instel. Al hierdie stappe moet sonder vrees of guns ingestel word. Dit moet nie deur faksionele belange gelei word nie,” het hy gesê.

Mohenjo-daro (Foto: Comrogues van San Francisco, Kalifornië, Wikimedia Commons)

ʼn Merkwaardige 5 000 jaar oue stad waar die inwoners oor spoeltoilette beskik het, en ’n baie doeltreffende afvoerstelsel vir reënwater gehad het, gaan weer begrawe word – om dit te bewaar.

Dié stad is in die 1920’s in Pakistan ontdek, en uitgrawings het 50 jaar lank geduur. Die stad het die naam Mohenjo Daro gekry.

Die warm weer in die Indusvallei verniel egter die uitgrawings, maar die ergste skade word aangerig deur die duisende toeriste wat die uitgrawings jaarliks besoek. Die argeoloë is ook bekommerd oor die opkoms van die radikale Islam in Pakistan, en dat dit tot soortgelyke vernielsug kan lei soos die Taliban se verwoesting van antieke Boeddha-beelde in Afganistan, en die verwoesting in Palmyra in Sirië deur Isis.

Lees meer: Independent

BC en Marlette Greyling. Foto: Verskaf

Ses verdagtes verskyn Maandag in die Delareyville-landdroshof op aanklag van moord, poging tot moord en huisbraak ná ʼn plaasmoord by Leeukuil-plaas naby Sannieshof in Noordwes.

Die verdagtes, tussen 27 en 38 jaar oud, is verlede week Donderdag in Sannieshof en Ottosdal in hegtenis geneem ná ʼn uitgebreide ondersoek.

ʼn Skootrekenaar en drie selfone wat vermoedelik tydens die voorval geroof is, is in die verdagtes se besit gevind, het sers. Kelebogile Moleko, woordvoerder van die polisie, gesê.

Maroela Media het vroeër berig BC Greyling (59) en sy vrou Marlette (57) en BC se ma, Magdaleen Greyling (87), het op 16 Mei omstreeks 19:30 die aand aan tafel gesit besig met aandete terwyl hulle nuus gekyk het.

Drie verdagtes het toegang tot die huis verkry deur een van die slaapkamers se groot vensters te breek. Drie het glo buite die huis gewaak. BC het gaan ondersoek instel en was skaars in die portaal toe ʼn verdagte hom trompop in die bors geskiet het sonder om ʼn woord te sê.

Marlette is tydens die voorval in haar regterblad geskiet. Die koeël is by haar links bó haar buik uit en het een van haar longe skrams gemis. Magdaleen het na die sitkamer gevlug en het onder ʼn tafel weggekruip.

BC is op die toneel dood. Marlette moes na ʼn hospitaal geneem word. Magdaleen is ongedeerd maar getraumatiseerd.

Die verdagtes het met vuurwapens, drie selfone en die egpaar se bakkie van die toneel gevlug en het ontsnap deur van ʼn dienspad langs ʼn spoorlyn gebruik te maak om blokkades wat deur omliggende boere gestel is te vermy. Die bakkie is later verlate naby Ottosdal opgespoor.

Marlette is Vrydag uit die hospitaal ontslaan.

Die Greyling-egpaar het drie seuns, Gerhard, hul oudste, Marius en Christo. Gerhard en Marius woon in Kanada. Christo woon op ʼn plaas naby sy ouers. Die egpaar het ook drie kleinkinders.

Gerhard en Marius het intussen vanuit Kanada in Suid-Afrika aangekom om hul ma by te staan en met die begrafnisreëlings te help. Die skoondogters en kleinkinders sal na verwagting Maandag in Suid-Afrika aankom.

Lees alle vorige berigte oor Sannieshof op Maroela Media.

Pres. Jacob Zuma en Philani Mavundla tydens die opening van Mavundla Square-winkelsentrum in Greytown, KwaZulu-Natal (Junie 2015) Foto: GCIS

Die minister van water en sanitasie, moet verduidelik waarom pres. Jacob Zuma se nabye vriend, Philani Mavundla, na bewering onreëlmatig ʼn vooruitbetaling van R81 miljoen ontvang het, het die DA Sondag gesê.

Die DA sal die ouditeur-generaal Kimi Makwetu versoek om ondersoek in te stel waarom die “welgestelde” Mavundla die vooruitbetaling ontvang het vir ʼn tender wat suur mynwaterdreinering aanspreek, het Leon Basson, woordvoerder van die DA, gesê.

“Alhoewel bemagtigingsooreenkomste soms ʼn vooruitbetaling insluit, aangesien talle maatskappye wat die tender ontvang nie die nodige kapitaal het nie, is die bevoordeelde in hierdie geval ʼn welgestelde vriend van Zuma wat nie ʼn vooruitbetaling benodig of verdien nie,” het hy gesê.

City Press het Sondag berig Mavundla (49), ʼn konstruksiemagnaat wat in ʼn stadium aangebied het om Zuma se deel van die opgraderings by sy huis in Nkandla te betaal, was betrokke in ʼn gesamentlike onderneming wat ʼn kontrak van R1 miljard ontvang het om ʼn suurmynwaterdreineringsaanleg in Springs, oos van Johannesburg, te bou.

“Dokumente wat City Press bekom het, wys dat die gesamentlike maatskappy [CMC-PG Mavundla EB JV] ʼn vooruitbetaling van R81 miljoen ontvang het nog voordat hy eers ʼn graaf in die grond gedruk het – dit word uitdruklik verbied deur die Wet op die Bestuur van Openbare Finansies,” het die koerant berig.

Die Trans-Caledon Tonnelowerheid (TCTA) het die kontrak aan Mavundla, voormalige burgemeester van Greytown in KwaZulu-Natal, toegeken. Die TCTA is deel van die departement van water en sanitasie wat grootmaat watertoevoerprojekte oor die land heen beheer, het City Press berig.

Basson het gesê Mavundla se verbintenis met Zuma en sy publieke aanbod om die president se Nkandla-skuld te betaal, “werp lig op die omvang van staatskaping van staatsondernemings deur Zuma se vriende om Nommer Een te bevoordeel”.

“As die politieke hoof van die departement van water en sanitasie, moet minister Nomvula Mokonyane verduidelik wat sy weet en watter magtiging gegee is om die vooruitbetaling goed te keur.

“Die DA sien uit na ʼn spoedige afhandeling van die OG se ondersoek en die moontlike vervolging van almal wat staatsregulasies oortree het. Sy bevindings en aanbevelings sal toekomstige tenderprosesse beskerm teen korrupte neigings van diegene wat politieke dekking geniet wat Nommer Een verskaf,” het Basson bygevoeg.