Carl Schoombie. Foto: Facebook

Brent Henry (40) en Juane Jacobs (37) is Vrydag in die Wes-Kaapse hooggeregshof gevonnis vir die moord op Carl Schoombie (27).

Regter Robert Henney het Henry en Jacobs tot lewenslange tronkstraf gevonnis. Lee Schoombie, Carl se broer, het die vonnis in ʼn inskrywing op sy Facebook-profiel verwelkom en gesê geregtigheid het geskied. “Ons kan nie verduidelik hoe dankbaar ons is vir die liefde en ondersteuning wat ons oor die afgelope 18 maande gekry het nie,” het Lee gesê.

Maroela Media het vroeër berig Carl Schoombie het op 21 November 2015 saam met vriende by ʼn nagklub in Claremont in Kaapstad gekuier toe ʼn geveg uitgebreek het. Hy was nie daarby betrokke nie en het die klub in ʼn taxi verlaat.

Die taxi is in die rigting van Rondebosch deur ʼn ander voertuig, met twee mans daarin, van die pad af gedruk. Die twee het Schoombie en sy vriende daarvan beskuldig dat hulle die geveg begin het. Schoombie en sy vriende het herhaaldelik gesê hulle was nie betrokke nie, maar is nogtans erg aangerand.

Schoombie is met ernstige kopbeserings in ʼn hospitaal opgeneem waar hy ʼn paar dae later dood is.

Henry is kort ná die moord in hegtenis geneem, terwyl Jacobs in Februarie 2016 in Johannesburg in hegtenis geneem is. Henry is destyds op borgtog van R1 000 vrygelaat, maar Jacobs het sy borgtogaansoek laat vaar.

Nadat die twee mans in Maart vanjaar aan die moord skuldig bevind is, is Henry se borgtog teruggetrek en is hy weer in hegtenis geneem.

Lees alle vorige berigte oor Carl Schoombie op Maroela Media.

Marlette as “oorwinnaar” in die hospitaal. Foto: Verskaf

Ses verdagtes is in hegtenis geneem in verband met die plaasmoord Dinsdagaand in die Biesiesvlei-omgewing naby Sannieshof in Noordwes.

Sers. Kelebogile Moleko, provinsiale polisiewoordvoerder, het Vrydag aan Maroela Media gesê die verdagtes, tussen 27 en 38 jaar oud, is Donderdagaand in Sannieshof in hegtenis geneem.

“ʼn Skootrekenaar en drie selfone wat vermoedelik tydens die voorval geroof is, is in die verdagtes se besit gevind.” Die verdagtes sal na verwagting Maandag in ʼn nabygeleë landdroshof verskyn.

Maroela Media het vroeër berig die Greyling-egpaar, Marlette (57) en BC (59), en BC se ma, Magdaleen Greyling (87), het die aand omstreeks 19:30 aan tafel gesit besig met aandete terwyl hulle nuus gekyk het.

Drie verdagtes het toegang tot die huis verkry deur een van die slaapkamers se groot vensters te breek. Drie het glo buite die huis gewaak. BC het gaan ondersoek instel en was skaars in die portaal toe ʼn verdagte hom trompop in die bors geskiet het sonder om ʼn woord te sê.

Marlette is tydens die voorval in haar regterblad geskiet. Die koeël is by haar links bó haar buik uit en het een van haar longe skrams gemis. Magdaleen het na die sitkamer gevlug en het onder ʼn tafel weggekruip.

BC is op die toneel dood. Marlette moes na ʼn hospitaal geneem word. Magdaleen is ongedeerd maar getraumatiseerd.

Die verdagtes het met vuurwapens, drie selfone en die egpaar se bakkie van die toneel gevlug en het ontsnap deur van ʼn dienspad langs ʼn spoorlyn gebruik te maak om blokkades wat deur omliggende boere gestel is te vermy.

Die bakkie is later verlate naby Ottosdal opgespoor.

Hoewel Marlette nog in rou is oor haar man se dood, is sy Vrydag ontslaan en het kop om hoog as ʼn “oorwinnaar” uit die hospitaal gestap.

“Sy kan nog nie teruggaan na haar huis toe nie omdat die polisie steeds besig is om die huis vir leidrade te fynkam, maar sy wil teruggaan plaas toe. Sy gaan nie dat hierdie voorval haar onder kry nie,” het Carin Visser, Marlette se jarelange vriendin en Sannieshof se DA-raadslid, Vrydag aan Maroela Media gesê.

Visser is ook die DA se voorsitter vir Noordwes en is vol lof vir die polisiebeamptes se “puik” speurwerk wat tot die verdagtes se inhegtenisneming in die Agisanang-nedersetting gelei het. Volgens Visser ken Marlette nie die aanvallers nie.

Sy het gesê Marlette gaan by ʼn vriendin woon totdat sy weer kan terugkeer na haar plaashuis.

“Sy het in die hospitaal ʼn rooi vlag vasgehou om te wys dat sy ʼn oorwinnaar is. Sy wil nie hê mense moet dink sy is lighartig oor die voorval nie – sy is gebroke, maar gaan hierdie situasie oorwin. Sy het gesê sy kan nie toelaat dat sulke slegte omstandighede haar karakter en menswees vir die res van haar lewe só skend dat sy ʼn versukkelde mens gaan wees nie.”

Die Greyling-egpaar het drie seuns, Gerhard, hul oudste, Marius en Christo. Gerhard en Marius woon in Kanada. Christo woon op ʼn plaas naby sy ouers. Die egpaar het ook drie kleinkinders.

Gerhard en Marius het intussen vanuit Kanada in Suid-Afrika aangekom om hul ma by te staan en met die begrafnisreëlings te help. Die gesin hoop om BC volgende week te ruste te lê.

Die skoondogters en kleinkinders sal na verwagting Maandag in Suid-Afrika aankom.

BC en Marlette Greyling. Foto: Verskaf

Argieffoto: Nico Strydom

ʼn 21-jarige vrou is na bewering in Helenvale in Port Elizabeth deur ʼn groep mans verkrag.

Kol. Priscilla Naidu, woordvoerder van die polisie, het gesê die vrou is glo helder oordag deur soveel as sewe mans verkrag.

“Die vrou het na bewering op 20 April omstreeks 14:30 saam met ʼn vriend in Voisenstraat geloop toe sy deur die groep mans gegryp is,” het Naidu gesê.

Die mans het na bewering die vriendin gelos en die vrou na ʼn gehuggie aan die agterkant van ʼn huis geneem waar tussen vyf en sewe mans die vrou verkrag het.

Naidu het gesê drie verdagtes, tussen 22 en 24 jaar oud, is laat Donderdagaand in dieselfde straat in hegtenis geneem as waar die verkragting na bewering plaasgevind het.

Die verdagtes is deur die polisie se eenheid vir gesinsgeweld, kinderbeskerming en seksuele oortredings vasgetrek. Daar is ook op ʼn vuurwapen beslag gelê.

Die drie mans sal Maandag in die Port Elizabeth-landdroshof verskyn op aanklagte van verkragting.

Die polisie het gesê verdere inhegtenisnemings sal volg.

Foto’s bied ʼn blik op die wêreld wat nie noodwendig in woorde beskryf kan word nie. Beleef al die nuusgebeure, een foto op ʼn slag.

Iranse vroue Vrydag in die stad Qum, 125 km suid van die hoofstad Tehran, besig om deel te neem aan dié land se presidensiële en munisipale verkiesings. Foto: Ebrahim Noroozi, AP

Geisjas Vrydag op pad na die Sensoji-tempel tydens die Sanja-fees in Tokio, Japan. Dié fees is een van drie groot feeste in dié land. Foto: Eugene Hoshiko, AP

ʼn Onwettige immigrant word Vrydag aan wal gebring deur lede van die Libiese kuswag in Guarabouli, ʼn kusdorpie oos van Tripoli, dié land se hoofstad. Foto: Hamza Turkia, Xinhua

ʼn Stoomlokomotief wat dateer van 1953 in ʼn veld raapsaad naby Posewald in die noorde van Duitsland. Foto: Jens Buettner, AP

Die Disney-oord in Sjanghai in China het onlangs sy 10 miljoenste besoeker verwelkom. Foto: Ren Long, Xinhua

Die pakkie het Vrydagmiddag 19 Mei 2017 by die huis in Stephen Dlaminiweg in Essenwood, Durban ontplof (Foto: Rescue Care)

Vyf persone het Vrydag ernstige beserings opgedoen toe ʼn pakkie, wat by ʼn huis in Essenwood, Durban afgelaai is, ontplof het.

Garrith Jamieson, woordvoerder van Rescue Care, het gesê die pakkie het in die sitkamer van die huis in Stephen Dlaminiweg ontplof toe die inwoners die pakkie wou oopmaak.

Kapt. Poobalan Naidoo van Berea-polisie het gesê die pakkie is vanmiddag by die perseel afgelaai en een persoon het die pakkie oopgemaak. “Die pakkie het ontplof. Daar was vyf persone teenwoordig. Die polisie is op die toneel,” het hy gesê.

Jamieson het gesê die vyf persone is na ʼn nabygeleë hospitaal geneem vir verdere behandeling. “Die bom-eenheid en polisie is op die toneel en stel verder ondersoek in.”

Omgewingsaktiviste buite die Wes-Kaapse hooggeregshof (April 2017). Foto: Catherine Rice/ANA

Die minister van energie het Vrydag gesê die Suid-Afrikaanse regering sal volgende maand weer met vyf lande begin onderhandel oor sy kernkragkontrakte.

Dit volg nadat die regering verlede week besluit het om nie appèl aan te teken teen ʼn uitspraak in die hooggeregshof wat effektief die aanskaf van nuwe kernkragaanlegte opskort nie. Volgens die regering was dié kernkragaanlegte nodig om 9 600 MW krag by die kragnetwerk te voeg.

“Kragtens die tydsraamwerk vir die kernkragprogram begin ons in Junie met die werk,” het minister Mmaloko Kubayi tydens ʼn perskonferensie gesê nadat sy haar begrotingsrede in die nasionale vergadering gelewer het. “Ons begin van voor af met die proses. Ons teken nuwe kontrakte. Dit maak nie vir my sin dat ons ʼn kontrak van 1995 gebruik nie. Ons sal oor nuwe kontrakte onderhandel.”

Die regering sal onderhandel met China, Rusland, Frankryk, die VSA en Suid-Korea.

Argieffoto

ʼn Voormalige lid van die bende-taakspan van Port Elizabeth, wat geswyg het oor waar ʼn berugte bendelid homself bevind, het besluit om skuldig te pleit op aanklagte teen haar. Die man was in daardie stadium ook in die geheim haar geliefde.

Die saak teen konst. Alicia Beeming het Vrydag in die landdroshof hervat. Sy staan tereg op aanklag van dwarsboming van die gereg.

Die staat was Vrydag gereed om voort te gaan met die saak, maar Beeming se prokureur het aangedui dat die polisiebeampte skuldig wil pleit.

Beeming werk steeds by die polisie, ondanks die feit dat sy skuldig bevind is op aanklag van wangedrag tydens ʼn interne departementele verhoor in November verlede jaar. Sy het ʼn boete van R2 400 betaal. Sy is ná die verhoor teruggestuur na haar oorspronklike stasie by Motherwell-polisiestasie waar sy binne die eenheid vir gesinsgeweld, kinderbeskerming en seksuele oortredings.

Kragtens die aanklag het Beeming geswyg oor haar verhouding met ʼn bendelid, Hans Jordaan, terwyl sy ʼn aktiewe spesialis-ondersoekbeampte was wat bendebedrywighede in Port Elizabeth se noordelike gebiede ondersoek het.

Volgens die klagstaat het Beeming vergaderings van die bevelvoerder van die eenheid, kapt. Mike Grobler, bygewoon waartydens bende, bendebedrywighede en gesoekte verdagtes geïdentifiseer en bespreek is. Beeming het toegang gehad tot geheime intelligensie en vertroulike dossiere wat deur die taakspan ondersoek is.

Volgens die staat het sy inligting gehad oor waar Jordaan homself bevind, maar het geswyg daaroor terwyl haar eenheid na hom op soek was in verband met ʼn aanklag van poging tot moord wat met ʼn bendeskietery in 2014 verband hou.

Die staat beweer Beeming was in ʼn verhouding met Jordaan terwyl sy ten volle daarvan bewus was dat hy ʼn verdagte is wat die bende-taakspan in hegtenis wou neem.

Die staatsaanklaer het gesê sy het versuim om haar bevelvoerder in kennis te stel van die verhouding. Beeming was by Humewood-polisiestasie se speurafdeling voordat sy in April 2014 na die bende-taakspan oorgeplaas is.

Die saak is uitgestel tot 20 Junie wanneer Beeming skuldig sal pleit.

Karabo Mokoena se begrafnisdiens Vrydag in Soweto (19 Mei 2017) Foto: Siphelele Dludla/ANA

Boodskappe van “geen geweld teen vroue” was Vrydag te sien by die somber, emosionele begrafnisdiens van Karabo Mokoena in Soweto.

Honderde roubeklaers het binne en buite die klein saal bymekaargekom terwyl ʼn paar mans, insluitend regeringsbeamptes, beurte gemaak het om langs Mokoena se wit kis te staan met plakkate met boodskappe wat geweld teen vroue veroordeel.

“Geen vrou vra of trek aan om verkrag te word nie. Wees ʼn man, respekteer jouself,” was op een plakkaat te sien.

Karabo se suster, Bontle, het ʼn huldeblyk aan haar sussie gebring en gesê sy het “ʼn vriendin, haar steunpilaar”, verloor. “Al hierdie mense het ons familie in hierdie uur van nood ondersteun. Ek sal graag die vriendskappe wil voortsit wat ons gevestig het,” het sy tussen haar snikke deur gesê.

Susan Shabangu, minister van vroue en kinders in die presidensie, het Bathabile Dlamini, minister van maatskaplike ontwikkeling, het saam met talle ander bekendes die begrafnisdiens bygewoon.

Mokoena, ʼn student aan die Regenesys-sakeskool, was ook ʼn vrywilliger by Freda House, ʼn skuiling vir hawelose vroue en slagoffers van huishoudelike geweld in Bellevue. Sy was passievol oor vroue- en kinderregte.

Haar verkoolde liggaam is op 29 April in ʼn sloot in Bramley gevind, ʼn dag nadat sy as vermis aangemeld is uit haar kêrel se woonstel. Haar kêrel, Sandile Mantsoe, is in aanhouding en staan tereg op aanklag van moord.

Mokoena is by Wespark-begraafplaas ter ruste gelê.

Lees alle vorige berigte oor Karabo Mokoena op Maroela Media.

Argieffoto: GCIS

Ben Ngubane, voorsitter van Eskom, het Vrydag bewerings ontken van pogings tot “onregmatige invloed” op minister van minerale hulpbronne, Ngoako Ramatlhodi.

“Die leuens deur die voormalige minister van minerale hulpbronne kan slegs deur niksvermoedende of bevooroordeelde persone volgehou word,” het Ngubane gesê in reaksie op wydverspreide berigte dat hy en Brian Molefe, uitvoerende hoof van Eskom, die minister “gedruk” het om alle mynregte deur Glencore op te skort.

Ramatlhodi het gesê hy is gereed om aan ʼn geregtelike ondersoek te sê dat Molefe en Ngubane probeer het om druk op hom te plaas om die mynmaatskappy Glencore se lisensies op te skort, in die stadium toe die land gebuk gegaan het onder beurtkrag.

Ramatlhodi, wie se verdoemende bewerings kom terwyl Molefe weer as uitvoerende hoof van Eskom aangestel word, het gesê pres. Jacob Zuma se seun Duduzane was die boodskapper wat die Gupta-familie gebruik het om ʼn vergadering met hom te reël.

Ramatlhodi het gesê hy het in 2015 met Molefe vergader, waar hulle Glencore se R2 miljard-boete bespreek het toe substandaard steenkool aan Eskom verskaf is. By die tweede vergadering het Molefe en Ngubane glo daarop aangedring dat Ramatlhodi alle Glencore-lisensies opskort hangende die betaling van die boete van R2 miljard. “Ek het gesê ek gaan nie die myn sluit nie,” het Ramatlhodi verduidelik.

Die voormalige minister wou egter nie bekend maak of hy gevoel het of hy onder druk is om Glencore se lisensie op te skort om plek te maak vir Optimum nie, wat die Guptas glo in daardie stadium van plan was om aan te skaf.

Ngubane het Vrydag egter al die bewerings ontken. “Dit is absoluut ongeloofwaardig om voor te stel dat ʼn senior minister deur beamptes van ʼn staatsentiteit geboelie kon word. Iemand sou uiters bevooroordeeld teen Eskom moet wees om selfs hoegenaamd hierdie bewerings as waarheid te oorweeg, gegewe die belaglike aard daarvan.

“Die bewerings deur ʼn vorige senior minister met só ʼn noodsaaklike nasionale mandaat is nie net absurd nie, dit werp ook lig op sy eie persepsie van sy onbekwaamheid.”

Ngubane het gesê hy wonder waarom Ramatlhodi versuim het om die beweerde oortreding op die “regte tyd”, toe dit glo plaasgevind het, aan te meld.

“Het hy die media genader toe dit na bewering plaasgevind het? Het hy die saak by die polisie aangemeld en as hy het, wat is die saaknommer?” wou Ngubane weet in ʼn lang verklaring wat hy uitgereik het en waarin hy enige oortreding ontken.

“Hoekom is dit eers nou die tyd om dié verdoemende bewerings te maak? Mens sou verwag het dat die ernstige bewerings dadelik by die polisie en of die media aangemeld sou wees. Dit is duidelik nou vir hom die geskikte tyd om die bewerings te maak, en mens kan maar net wonder oor sy motief.”

Chevrolet (deel van General Motors) Foto: AP Photo/Charles Krupa

Die vakbond Solidariteit het sy misnoeë uitgespreek oor General Motors (GM) se aankondiging gister dat hy sy bedrywighede in Suid-Afrika gaan staak, aangesien vervaardiging in Suid-Afrika nie die opbrengste gaan bied wat GM benodig om sy globale strategieë en beleggings te ondersteun nie.

Volgens Marius Croucamp, adjunkhoofsekretaris van die staal- en ingenieursbedryf by Solidariteit, kom GM se onttrekking uit die Suid-Afrikaanse mark as ʼn rimpeleffek van pres. Zuma se ondeurdagte kabinetskommeling in April vanjaar. “Ons is nou besig om die negatiewe uitwerking van hierdie afgradering te aanskou. Minder belegging en laer ekonomiese groei is maar net die begin,” het Croucamp gewaarsku.

Solidariteit vrees ʼn uittog van nog ander groot maatskappye weens die swak politieke en ekonomiese beleid wat tans toegepas word. “Die ekonomiese en sosiale gevolge van GM se onttrekking bied rede tot groot kommer.”

Argieffoto: led.co.za

Die ANC-regering sloer doelbewus en vir eie politieke gewin met grondhervorming. ʼn Bewys hiervan is dat daar in byna 20 jaar sedert die proses begin het, steeds eise van 1998 is wat nog nie afgehandel is nie, sê dr. Pieter Groenewald, leier van die VF Plus.

Groenewald het Vrydag met die begrotingsposdebat van die departement van landelike ontwikkeling en grondhervorming gesê die ANC gebruik grondhervorming as ʼn politieke speelbal.

“Dit is vir die ANC belangrik dat sy president moet rondgaan en vir die mense sê hulle kan nie grond kry nie want die witmense het dit gesteel en daarom moet dit eers onteien word sonder vergoeding. Dit is ʼn gevaarlike politieke speletjie want dit plaas voedselsekerheid en sekuriteit op die spel.

“Dit is maklik om te sê wittes besit 80% van grond in Suid-Afrika. Die minister moet sê of dit waar is.

“Ek vra reeds sedert 2004 vir ʼn oudit oor grondbesit. In 2015 het die ANC in sy eie beleidsdokumente gesê die tweede fase van die oudit sal beskikbaar wees teen September 2015. Hierdie tweede fase is baie belangrik, want dit sal die ras en geslag van grondeienaars aantoon.

“Nou is ons reeds in 2017. Waarom word dit nie bekend gemaak nie? Waarom neem dit so lank om die oudit te finaliseer? Die antwoord is dat dit die ANC pas. Die regering kan nou aan mense sê die beloftes wat oor grond gemaak is, sal nagekom word sodra die struikelblokke uit die weg geruim is.

“Die regering moet nou die grond in sy besit aan die mense gee. Tot nou toe is net een uit elke tien titelaktes van grond wat deur grondhervorming oorgedra is, aan die nuwe eienaars oorhandig. Altesaam 90% van die titelaktes is by die regering. Die staat besit die grond.

“Waarom dra die regering nie die titelaktes aan die nuwe eienaars oor nie? Dit word nie gedoen nie omdat dit die ANC se politieke agenda pas.

“Die minister het gesê hy het van Zimbabwe geleer om grond nie net te gryp nie en dat dit wettiglik gedoen sal word. Maar die ANC is tans besig om grondgryp deur die staat te wettig.

“Die regulasies wat die Waardeerder Generaal (WG) hieroor gepubliseer het, maak dit duidelik dat eienaars minder as die markwaarde, en selfs tot net die helfte daarvan, kan kry.

“Ek wil aan die mense van Suid-Afrika sê om na hierdie regulasies te kyk. Hulle moenie dink dit is net landbougrond wat ter sprake is nie. Dit raak alle eiendom in Suid-Afrika. As die nuwe Onteieningswet in plek is, gaan die regulasies van die WG op almal se eiendom van toepassing wees.

“Dit sluit ook ontroerende eiendom in. Hierdie regulasies is die rooi vlag wat vir grondeienaars sê om wakker te skrik en hul besware teen die wet in te dien,” het Groenewald gesê.

Die SA Poskantoor het ʼn stel van vyf seëls bekend gestel wat byvreters uitbeeld.

Dit is die poskantoor se beleid om staatsmanne, natuurwonders en wildlewe op seëls uit te beeld – solank as wat dit Suid-Afrikaans is. Byvreters is van Suidelike Afrika se aanskoulikste en interessantste voëls. Dit maak hulle uitstekende onderwerpe vir seëls.

Die foto’s op die seëls is deur Chris van Rooyen geneem en die seëls is deur die poskantoor se filatelie-afdeling ontwerp. Die poskantoor reken die seëls sal blitsvinnig deur seëlversamelaars en voëlliefhebbers opgeraap word.

Byvreters het merkwaardige gewoontes. Hulle vang insekte uit die lug uit, grawe tonnels in sandbanke waar hulle hul eiers lê en met die meeste spesies bly die jongspan by hulle ouers om die volgende geslag kleintjies groot te maak. Hulle neem eers ʼn onafhanklike lewe op as die derde geslag grootgemaak is.

Die seëls kan as posgeld gebruik word vir A5-grootte koeverte en ʼn stel van vyf kos R47.75. (R9.55 elk). Die seëls is by groot poskantore beskikbaar en kan ook bestel word by sa.stamps@postoffice.co.za.

Lusindiso Poyo en Nolwazi Mkhize se liggame is gevind (Foto: Dispatch Live)

ʼn Paartjie wat verlede Sondag verdwyn het, se liggame is gevind.

Lusindiso Poyo (52), ʼn personeellid van OR Tambo-munisipaliteit in die Oos-Kaap en sy meisie, Nolwazi Mkhize (39), wat by Ingquza-munisipaliteit gewerk het, is op 13 Mei as vermis aangemeld by Port St Johns-polisie.

“ʼn Volskaalse soektog is van stapel gestuur deur die polisie en verskeie ander rolspelers,” het kapt. Nozuku Handile, woordvoerder van die polisie, gesê.

“Die motor waarin hulle gery het, ʼn wit BMW X5, is Donderdag uit die lug opgemerk onder ʼn krans onder die Port St Johns-aanloopbaan.

“Die polisie se soek- en reddingspan kon nie die liggame dadelik bereik nie, weens die onbegaanbaarheid van die terrein,” het Handile bygevoeg. “ʼn Helikopter van die weermag het Vrydag die soekspan bygestaan om die liggame uit te haal.”

ʼn Ondersoek word gedoen om te bepaal wat presies gebeur het en hoe hulle gesterf het.

Vissersbote in Houtbaai-hawe (Foto: Maroela Media)

ʼn Vrou het Vrydagaand verdrink nadat sy in die see geval het by die hawe in Houtbaai in Kaapstad.

Die Nasionale Seereddingsinstituut (NSRI) se span is omstreeks 19:00 na die toneel ontbied ná berigte ontvang is van ʼn vrou wat besig is om te verdrink, het Lyall Pringle, stasiebevelvoerder van die NSRI Houtbaai, gesê.

“ʼn Vrou, in haar laat 30s, ʼn plaaslike inwoner van die vissersgemeenskap, is reeds uit die water gehaal toe die span by die toneel opgedaag het,” het Pringle verduidelik. “ʼn Man was reeds besig met KPR en die paramedici van NSRI het by hom oorgeneem.”

Alle pogings om haar lewe te red was egter tevergeefs. Sy is op die toneel dood verklaar.

“Twee mans, in hul laat 30’s, ook van die plaaslike Houtbaai-vissersgemeenskap, wat in die water ingespring het om die vrou te red, is op die toneel behandel vir verkluiming. Hulle het nie verdere mediese behandeling nodig gehad nie.”

Die vrou het vermoedelik in die water in geval en twee vissermanne het ingespring om haar te red en ʼn derde visserman het alarm gemaak.

Douw Wentzel sr. wat in die helikopterongeluk gesterf het (Foto: Facebook)

ʼn Boer van die Vrede-distrik en nog ʼn boer se seun is Vrydag dood toe ʼn helikopter in Heilbron neergestort het.

Die twee boere en hul seuns was op pad terug huis toe van die Nampo-oesdag op Bothaville in die Vrystaat toe die ongeluk plaasgevind het.

“Werkers van die plaas Brakpan in Heilbron het omstreeks 17:30 gesien hoe die helikopter neerstort,” het brig. Sam Makhele, woordvoerder van die polisie, aan Maroela Media gesê.

Maroela Media verneem die twee boere was Douw Wentzel en Louw Deale, albei van Vrede-distrik, wat in die helikopter gevlieg het. Douw se seun, Douw jr., en Louw se seun, Andre, was saam met hulle in die ongeluk.

Douw en Andre is tydens die ongeluk oorlede. Douw jr. (14) en Louw (49) het die ongeluk oorleef.

“Een van die mans en een van die seuns is in ʼn kritieke toestand na die plaaslike hospitaal in Heilbron geneem voor hulle oorgeplaas is na die Unie-hospitaal in Alberton,” het Makhele bygevoeg. Maroela verneem hul toestand is kritiek, maar stabiel.

Hoërskool Wilgerivier het op sosiale media bevestig Douw jr., ʼn graad 9-leerling aan die skool, is ernstig beseer. “Ons vra dat julle die gesin in julle gebede sal opdra.”

NG Kerk Frankfort het ook hul meegevoel uitgespreek met die Wentzel-gesin met die afsterwe van Douw sr. en aan die Deale-gesin met die afsterwe van Andre.

Suzan Strydom (Foto verskaf deur Vrystaat-SAPD)

JONGSTE: Suzan Strydom en haar tweejarige dogtertjie is veilig gevind. Lees meer.

ʼn 37-jarige vrou en haar tweejarige dogtertjie het Saterdag uit Bainsvlei in Bloemfontein in die Vrystaat verdwyn.

Konst. Peter Kareli, woordvoerder van die polisie, het gesê die vrou, Suzan Strydom, was in ʼn psigiatriese hospitaal in Kaapstad voordat sy Vrydagaand teruggekeer het na haar huis in Bainsvlei.

“Suzan en haar man en hul tweejarige dogtertjie, Minneke, het Vrydagaand sonder enige probleme gaan slaap. Toe die man vanoggend wakker word, het Suzan en Minneke egter spoorloos verdwyn,” het Kareli bygevoeg.

Suzan ry met ʼn rooi Chevrolet Spark (2011-model) met registrasienommer CF193503.

“Sy is vermoedelik gewapen en sy moet versigtig genader word, aangesien sy moontlik geestelik onstabiel kan wees,” het hy gesê.

Enigiemand met inligting kan die Bainsvlei-stasiebevelvoerder kontak by 076 300 5567.

Courtney Pieters se begrafnis in Elsiesrivier (20 Mei 2017) Foto: Tamaryn Africa/ANA

Die driejarige Courtney Pieters word Saterdag in Elsiesrivier in Kaapstad ter ruste gelê. ʼn Plaaslike motorfietsklub, blaasorkes en ʼn kadetregiment woon ook die verrigtinge by.

Familielede het in Plutostraat bymekaar gekom toe Courtney se liggaam vir die stoet opgedaag het. Die lykswa is deur die motorfietsklub en blaasorkes vergesel.

Die stoet het van daar na die Adriaanse-gemeenskapsaal beweeg waar honderde mense gepak gesit het vir die diens.

ʼn Beampte van die Apostoliese kerk het die diens begin en gesê: “Ons weet almal vandag handel oor ʼn klein dogtertjie wat in twee weke in ons harte ingekruip het.”

Honderde inwoners het vroeër ook aan ʼn vredesoptog deelgeneem van die nabygeleë Hoërskool Elsiesrivier.

Courtney se verkragting en moord het die land geskud en pres. Jacob Zuma, polisieminister Fikile Mbalula en Dan Plato, LUR vir gemeenskapsveiligheid in die Wes-Kaap, het die gesin die afgelope week besoek.

Zuma het ook die toneel in Epping besoek waar Courtney se liggaam verlede Saterdag gevind is, byna nege dae nadat sy verdwyn het.

ʼn 40-jarige man wat saam met die Pieters-gesin gewoon het, het Woensdag in die Goodwood-landdroshof verskyn op aanklag van verkragting en moord.

Zuma het vroeër vandeesweek in ʼn verklaring sy skok en weersin uitgespreek oor die moord en ander sake oor die land heen waar vroue en kinders gewelddadig geteiken is.

Courtney word by die Modderdamweg-begraafplaas in Belhar ter ruste gelê.

Lees alle vorige berigte oor Courtney Pieters op Maroela Media.

Die Untu-onderhandelingspan is lede van die uitvoerende raad Brian Davids, Rodney Blom, Casper Botha en adjunk-sekretaris-generaal Neels Haasbroek (Foto: Untu)

Die onderhandelingspan van die United National Transport Union (Untu) het Vrydagaand ʼn loonooreenkoms met die Passasierspooragentskap van Suid-Afrika (Prasa) onderteken vir die huidige finansiële jaar.

Werknemers sal teen die einde van Junie ʼn 8% verhoging kry onder die algehele gewaardeerde pakket.

Die ooreenkoms, wat ook ʼn onderneming insluit dat Prasa nie enige afleggings in die huidige finansiële jaar sal implementeer nie, word tot 1 April terugdateer, het Eddie de Klerk, algemene sekretaris van Untu, gesê.

Prasa sal ook nuwe mediesefondsmakelaars beskikbaar maak aan sy werknemers, sodat personeellede uit ʼn verskeidenheid van mediese fondse kan kies wat hul unieke behoeftes en finansiële situasies pas.

De Klerk en Untu-president Wyndham Evans het die onderhandelingspan gelukgewens vir ʼn goeie ooreenkoms in ʼn baie moeilike ekonomiese klimaat.

Untu het in Februarie met onderhandelings begin en aanvanklik ʼn dubbelgetalverhoging geëis. “Ongelukkig het die onvoorsiene besluit [deur pres. Jacob Zuma] om die voormalige minister van finansies Pravin Gordhan af te dank, wat daartoe gelei het dat die land se kredietgradering tot rommelstatus afgegradeer is, ʼn negatiewe impak op die onderhandelings gehad,” het De Klerk gesê.

“Dit was eers nadat Lindikhaya Zide, die huidige waarnemende uitvoerende hoof van Prasa, aangestel is, dat die maatskappy dit duidelik gemaak het dat hy sy werksmag moet rasionaliseer en dit sou tot werksverliese gelei het indien daar aan die eise gehoor gegee sou word. As ʼn verantwoordelike vakbond is dit noodsaaklik vir Untu om werksverliese te voorkom en om die voordele, wat ons lede geniet, te beskerm.”

Mmaloko Kubayi, minister van energie (Foto: GCIS)

Mmaloko Kubayi, minister van energie, het Vrydag gesê sy gaan goedkeuring by die kabinet probeer bekom om ʼn nuwe olieraffinadery te bou om Suid-Afrika se afhanklikheid van brandstofinvoere te verminder.

“Ek het besef dat ons land gereed is vir ʼn nuwe raffinadery-belegging,” het Kubayi in haar begrotingsrede in die parlement gesê. “Teen die tyd dat ʼn nuwe raffinadery gebou is, sal die land meer as ʼn derde van sy brandstofvereistes invoer. Hierdie hoë afhanklikheid is nie in die belang van energiesekerheid nie en bevorder nie plaaslike industrialisasie nie.

“Ek sal dus in die derde kwartaal van hierdie finansiële jaar die kabinet nader vir ʼn beslissende besluit in dié verband.”

Kubayi het gesê sy sal verkies indien die projek tussen die openbare sektor en ʼn privaat vennoot in ru-olievervaardiging aangepak word. Die meerderheidsaandeel in die raffinadery moet egter Suid-Afrikaans wees.

Die minister het toegegee dat daar tans ʼn oorvloed olieprodukte op die mark is, maar dit is nie in Suid-Afrika se belang om só swaar te steun op invoere nie, gegewe die wisselkoersskommelings. Sy het gesê kwessies van nasionale soewereiniteit moet ook in ag geneem word.

Die minister het in haar eerste begrotingstoespraak ook aangekondig dat haar departement die sentrale energiefonds sal herstruktureer om die manier, waarop filiale bestuur word, te verbeter. “Ons wil binne die volgende paar maande die sentrale energiefonds herstruktureer om ʼn model te vestig wat dit aanspreeklikheid vergemaklik en seker te maak die entiteit word doeltreffend en professioneel bedryf.”

Die finansieringskorporasie vir mynbou-eksplorasie in Afrika (AEMFC) en die Petroleumagentskap van Suid-Afrika sal deur die loop van die huidige finansiële jaar na die departement van minerale hulpbronne oorgedra word.

Kubayi het gesê die direkteur-generaal van die departement, Thabane Zulu, sal as die uitvoerende hoof van die strategiese brandstoffonds optree. “Ons wil verseker dat ons die aanbevelings kan implementeer in die lig van die verslag oor die verkope van strategiese brandstofreserwes van die land.”

Die minister het onlangs bevestig dat ʼn deel van die land se strategiese brandstofreserwes teen die einde van 2015 verkoop is onder haar voorganger se bestuur. Die verkope word tans ondersoek.

Tina Joemat-Pettersson, wat in Maart afgedank is tydens ʼn kabinetskommeling, het die transaksie ontken. Sy het gesê dit was ʼn skuif van voorraad op die strategiese brandstoffonds.

Die transaksie is wyd veroordeel, gedeeltelik omdat die voorraad verkoop is teen slegs US$29 per vaatjie.

Foto: Fezekile Msimang/Facebook

Dit is onvanpas en onregverdig van die Universiteit van Pretoria (UP) om al die universiteit se studente te straf deur die tradisieryke Serrie-opvoering te kanselleer weens die swak gedrag van enkelinge, sê Jean Kriek, die VF Plus se jeugleier in Gauteng.

Die Universiteit het Donderdag aangekondig dat die Serrie-opvoering gekanselleer is omdat daar na bewering smaaklose plakkate en swak gedrag van toeskouers tydens die Serie-voorronde op Maandag 15 Mei en Dinsdag 16 Mei voorgekom het.

Kriek sê die universiteit wys deur hierdie optrede ʼn totale gebrek aan insig en ʼn onvermoë om probleme op ʼn billike manier te behandel.

“Hierdie besluit van die universiteit is baie onregverdig teenoor studente wat maande lank onvermoeid gewerk het om deel te neem aan die kompetisie. In baie gevalle het ‘n groot hoeveelheid tyd en geld in die voorbereiding ingegaan.

“Die skuldige studente moet individueel deur die universiteit gedissiplineer word aangesien dit ‘n individuele handeling was wat nie op enige manier strook met die besluit om almal te straf nie en dit is werklik jammer en betreurenswaardig dat die UP so optree,” het Kriek bygevoeg.