Foto: SAPD, Oos-Kaap

Vyf mans, vermoedelik renosterstropers, is die afgelope naweek naby Oos-Londen in hegtenis geneem.

“Die mans was op pad na ʼn nabygeleë privaat natuurreservaat,” het die polisie van die Oos-Kaap in ʼn verklaring gesê. “Polisiebeamptes het ʼn wenk ontvang en hul voertuig is Sondag buite Oos-Londen voorgekeer.”

Drie mans is van Nelspruit en twee is van King William’s Town. Hulle is almal tussen 26 en 46 jaar oud.

Die polisie het beslag gelê op ʼn .308-jaggeweer, ammunisie, ʼn byl en ʼn saag.

“Die mans verskyn Dinsdag in die landdroshof in Oos-Londen op aanklag van die onwettige besit van ʼn vuurwapen en ammunisie en sameswering om ʼn misdaad te pleeg.

Lt.genl. Liziwe Ntshinga, provinsiale polisiekommissaris, het gesê sy is beïndruk met die goeie wenk wat ontvang is wat die polisie in staat gestel het om te reageer en die verdagtes in hegtenis te neem nog voor enige skade aangerig is.

Blade Nzimande (September 2016) Foto: Ntswe Mokoena

Blade Nzimande, leier van die SAKP, het Maandag gesê die ineenstorting van die Werkersdagvieringe in Bloemfontein in die Vrystaat, waar pres. Jacob Zuma sou praat, is ʼn finale “wekroep” vir die drieparty-alliansie.

“Ek dink dis hartseer. Dis baie hartseer. Ek dink ons moet dit regtig as die finale wekroep sien, want as ons nie hierop reageer nie, sal ons baie streng veroordeel word as die generasie van leiers wat toegelaat het dat hierdie alliansie ineenstort. So ons moet hierdie saak behoorlik bespreek,” het hy gesê.

Toesprake by die vakbondfederasie Cosatu se hooffunksie in Bloemfontein om Werkersdag te vier is gekanselleer toe Zuma deur sommige toeskouers uitgejou is.

Beamptes moes bontstaan om die bakleiery tussen die pro-Zuma en anti-Zuma-groepe te keer.

Zuma het vroeër by die byeenkoms opgedaag en blad geskud met die alliansie-leiers en verskeie van sy ondersteuners het “Zuma, Zuma, Zuma” geskree.

Krete van “Zuma must fall” is egter ook in Loch Logan-park gehoor en die president, wat tussen Cosatu-president Sdumo Dlamini en Nzimande gesit het, het sy voorkop gevryf en afgehaal gelyk toe hy sy arms gekruis en die skare toegekyk het.

Die polisie moes ingryp om vakbondlede te verhoed om deur die grensdraad te bars wat opgerig is tussen die skare en die markiestent waar die president en ander beamptes gesit het.

Zuma se lyfwagte het hom daarna weggeneem toe dit duidelik geword het dat die skare hom nie gaan toelaat om te praat nie.

Cosatu en die SAKP het Zuma versoek om te bedank ná sy omstrede kabinetskommeling in Maart toe hy, onder andere, die minister van finansies Pravin Gordhan, afgedank het.

Ace Magashule, premier van die Vrystaat en leier van die ANC in die provinsie, het die gebeure as “ʼn doelbewuste poging om Zuma te verneder” beskryf.

“Dit was vooraf beplan om die leierskap te verneder. Daar is mense wat dit beplan het. Ek het gehoor daar is mense wat hierdie byeenkoms wou ontwrig wat nie eers van hierdie provinsie is nie. Ons het ons video’s geneem, ons sal dit analiseer. Ons vergader môre met alliansie-beamptes,” het Magashule gesê.

“Ek weet dit was ʼn nasionale byeenkoms, maar ek sê net mense in hierdie provinsie is gedissiplineerd. Dit is ʼn vernedering, maar ons het vir hierdie vryheid baklei. Ons het geveg vir werkers se regte.”

Magashule het ʼn boodskap vir leiers in die drieparty-alliansie ANC, SAKP en Cosatu: “Diegene wat ons wil bestuur en na die media toe gaan, asof hulle nie interne konflik het nie, vir hulle sê ons julle veroorsaak ʼn gemors vir hierdie land.”

Hy hou vol die “massas” is lief vir Zuma.

“Die mense ondersteun steeds Jacob Zuma. Miljoene van ons mense het vir die ANC gestem. Kyk waar Zuma gaan en kyk hoe word hy ondersteun. Dit gaan nie oor Zuma nie. Die vyande van die ANC weet hulle moet Zuma aanval. Hulle het [vroeër] Mandela en Mbeki aangeval. Nou val hulle Zuma aan. Hulle sal enigiemand aanval wat die president van Suid-Afrika word – om die ANC te verswak,” het hy gesê.

Zuma is nie die enigste lid van die ANC se topses wat ʼn koue ontvangs gehad het by Werkersdagvieringe nie. ANC-voorsitter Baleka Mbete, wat ʼn skare in KwaZulu-Natal toegespreek het, en die party se adjunk-sekretaris-generaal Jessie Duarte wat in Limpopo ontplooi is, is ook uitgejou.

Werkersdagvieringe waar adjunkpresident Cyril Ramaphosa, ANC-sekretaris-generaal Gwede Mantashe en tesourier-generaal Zweli Mkhize teenwoordig was, het vlot verloop sonder enige groot ontwrigtings.

Gyselaarsdrama by Nyanga-junction (1 Mei 2017) Foto: SAPD, Wes-Kaap

Elf persone wat Maandag in die Nyanga Junction-winkelsentrum in Manenberg in Kaapstad gyselaar gehou is, is ná ʼn paar uur vrygelaat.

Die persone was werknemers van die Shoprite-winkel waarop rowers Maandagoggend vroeg toegeslaan het.

Brig. Novela Potelwa, woordvoerder van die polisie, het gesê lede van die spesiale taakmag, nasionale ingrypingseenheid en speurders het vroeg Maandagoggend by die toneel opgedaag ná ʼn poging tot gewapende roof. Verskeie skote is in die winkelsentrum gehoor en daar was ook ʼn oor-en-weer-skietery tussen veiligheidswagte en die rowers.

ʼn 25-jarige veiligheidswag is tydens die skietery beseer. Hy is in ʼn bedenklike toestand in die hospitaal.

Een van die 11 persone wat uit die gebou gered is, was ʼn verdagte wat vroeër beseer is. Hy is op die toneel behandel en onder polisiebewaking na ʼn hospitaal geneem.

Lt.genl. Khomotso Phahlane, waarnemende nasionale polisiekommissaris, het die beamptes bedank wat hul lewens op die spel geplaas het om die gyselaars te red. “Ons bedank die lede van die gemeenskap vir hul ondersteuning en gebed tydens hierdie naelkou-polisieoperasie. Ons wil dit graag benadruk dat ons hoofdoelwit die gyselaars se veiligheid was en dat alle voorsorgmaatreëls geneem is om hulle veilige vrylating te verseker.”

Karel Schoeman (Foto: kykNET)

Die Afrikaanse skrywer van Bloemfontein, Karel Schoeman (77), is Dinsdag in die Noorderbloem-aftreeoord oorlede ná hy glo selfmoord gepleeg het.

Schoeman se prokureur, Carl van Rensburg, het die nuus aan Maroela Media bevestig.

Van Rensburg sê hy het glo ʼn tyd gelede ʼn verklaring van Schoeman ontvang waarin hy vertroulik bekendgemaak het hy wil selfmoord pleeg.

Volgens hom het Schoeman die moontlikheid van “verhongering” oorweeg, maar “ʼn sin in die verklaring blyk dat hy ʼn ander uitweg gevind het”.

“Meer besonderhede kan in dié stadium nie bekend gemaak word nie, maar dit blyk selfmoord te wees. Schoeman se wens was dat die verklaring ná sy dood uitgereik word,” sê Van Rensburg.

Schoeman woon al sedert 2008 in dié aftreeoord. Hy het 19 romans geskryf, waaronder Na die geliefde land, Die uur van die engel en Verliesfontein.

Volgens Van Rensburg het hy geen familie nie.

Lees ook: Afrikaanse skrywer sê hoekom hy selfmoord pleeg

Argieffoto: Kent Williamson

Die polisie in die Wes-Kaap is op soek na leidrade ná 13 mense Maandagaand onder verdagte omstandighede geskiet is.

Die voorval het omstreeks 20:45 in ʼn huis in Tiaraweg, Leonsdale, plaasgevind.

Sers. Noloyiso Rwexana, woordvoerder van die polisie, het gesê speurders in Elsiesrivier fynkam die toneel vir leidrade.

“Drie mans van onderskeidelik 50, 37 en 17 jaar oud is doodgeskiet en tien ander tussen 15 en 53 is gewond. Hulle is na nabygeleë hospitale geneem vir mediese behandeling,” het Rwexana gesê.

Drie vroue en sewe mans is onder dié wat tydens die voorval gewond is. “Die voorval is inderdaad vreemd. Die polisie is besig om alle moontlikhede te ondersoek,” het Rwexana aan Maroela Media gesê.

Die polisie het enige iemand met inligting oor die voorval versoek om Sers. Kleinbooi by 082 302 9938 te kontak.

Rwexana het die noue band tussen die polisie en gemeenskapslede in die Wes-Kaap beklemtoon en gesê dis uiters belangrik vir die veiligheid van die gemeenskap.

Argieffoto

ʼn Onderwyser aan ʼn Pretoriase hoërskool het Dinsdagoggend voor leerders in ʼn klaskamer ineengestort en gesterf.

Panyaza Lesufi, LUR van die Gautengse departement van onderwys, het Dinsdagoggend die nuus gedeel.

“Slegte nuus. ʼn Onderwyser het ineengestort en is dood terwyl die onderwyser klas gegee het. Ek haas na die toneel. Ek is bekommerd oor die welstand van die kinders,” het hy op Twitter gesê.

Oupa Bodibe, woordvoerder van die departement, het aan Maroela Media bevestig die onderwyser is by Clapham High School in Queenswood dood.

“Ons kan in die stadium net bevestig dat die onderwyser gesterf het. Die departement lê tans besoek by die skool af en sodra meer inligting beskikbaar is, sal die departement ʼn persverklaring uitreik.”

Bodibe kon nie dadelik die onderwyser se ouderdom of geslag bevestig nie.

Die skool het alle navrae na die departement verwys.

Kapt. Coba Brits, woordvoerder van die Villieria-polisie, het gesê die dood is nog nie by die stasie aangemeld nie, maar dit kan dalk binnekort gebeur.

Lees ook: Beraders na hoërskool gestuur waar Pta-juffrou sterf

Argieffoto.

Volgens die Gautengse departement van onderwys is 32 000 graad 1- en graad 8-leerlinge al Dinsdag suksesvol via aanlyn aansoeke ingeskryf.

David Makhura, premier van Gauteng, en Panyaza Lesufi, Gautengse LUR vir onderwys, het by die Orange Farm-taxistaanplek pamflette uitgedeel waarin ouers aangemoedig word om hul kinders vroegtydig te registreer en dit nie tot op die laaste nippertjie te los nie.

“Ons het ʼn geweldige probleem met ouers wat hul kinders na Gauteng-skole toe bring. Ons wil graag teen Junie weet hoeveel kinders ons moet akkommodeer, dan sal ons beter kan beplan,” het Makhura gesê.

Dié suksesvolle registrasies kom ná 2016 se ineenstorting van die webwerf waarop ouers hul kinders kon registreer.

Lesufi het gesê die Orange Farm-area is gekies om die aanlyn aansoeke bekend te stel omdat dit in 2016 probleme veroorsaak het. “Die proses was maklik en vinnig; ek is baie gelukkig,” het een ouer laat hoor. Lesufi verduidelik ouers moet aanmeld en die skool kies wat hulle wil hê, maar dat hulle nóg skole moet kies om seker te maak hulle het meer as een keuse.

Lesufi het mense ook verseker dat hul tegniese span aandag sou skenk aan die feit dat sekere skole nie op die stelsel vertoon nie.

Die departement verwag meer as 300 000 aanlyn aansoeke. Aansoeke sluit op 12 Junie 2017 om middernag.

Karel Schoeman (Foto: kykNET)

Die ontslape Afrikaanse skrywer Karel Schoeman het in ʼn verklaring aan sy prokureur gesê hy wil selfmoord pleeg en sy plan om te sterf in dié verklaring uitgelê.

Maroela Media het vroeër berig Schoeman is (77) is Dinsdag in die Noorderbloem-aftreeoord oorlede.

Schoeman se prokureur, Carl van Rensburg, het die nuus aan Maroela Media bevestig.

In die verklaring wat Van Rensburg aan Maroela Media gestuur het, skryf Schoeman hy het besluit om op 77-jarige ouderdom sy eie lewe te neem terwyl hy nog oor “voldoende beweeglikheid, fisiese vryheid en geestelike helderheid” beskik.

“Oor die afgelope jaar of twee het ek besef dat die navorsing en skryfwerk wat my so lank besig gehou het vir my ʼn las begin word, en het ek met ʼn sekere verligting daarvan afstand gedoen. Gedurende dieselfde tyd het die agteruitgang in my liggaamlike en geestelike vermoëns ook vir my duidelik begin word. Wat vir my voorlê, is, menslike gesproke, na alle waarskynlikheid ʼn toestand van gestadige aftakeling en groeiende hulpeloosheid en afhanklikheid, waardeur ek toenemend ʼn las word vir myself en andere.”

Schoeman skryf dit is “moontlik om die beëindiging van die lewe te beheer” deur by voorbaat alle hulp te weier wat die “mediese beroep normaalweg in geval van ʼn lewensgevaarlik toestand sou wou aanwend”.

“Ewe goed is dit geoorloof om vrywillig van die gebruik van drank en voedsel af te sien en die lewe deur ʼn proses van sg. versterwing te beëindig, wat in praktyk op dehidrasie neerkom. Met die nodige kennis of kontakte is dit egter selfs binne die huidige beperkings ander uitweë te vind, en hiervan kon ek uiteindelik met nodige dankbaarheid gebruik maak.”

Volgens Van Rensburg is dit nog onseker wat dié ander metode is wat Schoeman gebruik het om Dinsdagoggend sy eie lewe te neem.

Schoeman skryf in dié brief selfmoord is ʼn “hoogs persoonlike saak” en iets waarop hy al jare gelede besluit het.

In die brief erken hy ook verder dat hy twee jaar gelede sy eie lewe probeer neem het.

Die brief is op 27 April deur Schoeman onderteken.

Lees sy volledige verklaring hier.

Lees meer oor Schoeman op Maroela Media.

Foto: Verskaf.

Een verdagte is dood, een gewond en twee vas ná ʼn gewapende roof vanoggend in Centurion.

Arthur Crewe, woordvoerder van die sekuriteitsmaatskappy High Risk Unit het aan Maroela Media gesê Henk Roodts, een van hul sekuriteitswagte, was op pad na ʼn kliënt in Centurion en het verby die More-restaurant in Golflaan gery. Daar was ʼn gewapende roof aan die gang en een van die sekuriteitswagte het aan Roodts uitgewys dat die verdagtes in ʼn voertuig daar wegjaag.

“Roodts het hul agternagesit en daar het ʼn skietgeveg tussen hom en die vier verdagtes ontstaan. Hul motor kon nie verder ry as gevolg van die skade wat die koeëls aangerig het nie en Roodts het uitgeklim en hulle gewaarsku om nie verder te skiet nie. Hulle het egter aangehou,” het Crewe gesê.

Roodts het een verdagte doodgeskiet, een gewond en die ander twee in hegtenis geneem. Roodts is ongedeerd na die voorval.

Die voorval het op die hoek van die ou Johannesburgweg en Hennopsweg plaasgevind.

Russel Meiring, woordvoerder van ER24, het gesê dat hul paramedici na die toneel ontbied is.

“Ons paramedici het een man wat ʼn entjie weg van sy voertuig lê aangetref. Hy is op die toneel dood verklaar. ʼn Tweede man is aangetref met ʼn skietwond aan sy bors. Noodbehandeling is toegepas en die man is na die Tembisa staatshospitaal geneem vir verdere mediese behandeling,” het Meiring gesê.

Volgens Meiring het die ander twee mans nie beserings opgedoen nie en is in hegtenis geneem.

Kol. Lungelo Dlamini, woordvoerder van die polisie het by navraag aan Maroela Media gesê die drie verdagtes, waarvan een onder polisiebewaking in die hospitaal is, op aanklagte van gewapende roof, poging tot moord en die besit van ‘n ongelisensieërde vuurwapen sal verskyn.

Daar is beslag gelê op ‘n donkerblou BMW en ‘n ongelisensieërde vuurwapen.

‘n Skermskoot uit die episode van Isidingo. Foto: Youtube.com

Die burgerregte-organisasie AfriForum het Dinsdag sy kommer uitgespreek oor die openbare reaksie wat gevolg het op ʼn onlangse episode van Isidingo op SABC3 waarin wit-op-swart rassisme uitgebeeld is.

Verskeie kommentators het dié betrokke episode van die sepie as ʼn “weerspieëling van die werklikheid in Suid-Afrika” beskryf. In die episode wat Woensdagaand voor Vryheidsdag uitgesaai is, word die karakter Sechaba Moloi-Matabane, gespeel deur Motlatsi Mafatshe, deur twee wit boere aangeval terwyl hy sy pa se graf op ʼn plaas besoek. Hy word deur die twee mans aangerand en met bobbejaangeluide geterg, waarna hulle hom lewend begrawe.

Die toneel het sedertdien ʼn verskeidenheid van emosies onder Suid-Afrikaners ontlok. Isidingo is onder meer op sosiale media geloof vir die politieke standpunt wat dié program teen wit mense inneem. Ander kykers het weer hul skok en kommer oor die betrokke toneel op Isidingo se Facebook-blad uitgespreek.

Margaret Rueger het op dié blad geskryf sy dink nie dit is ʼn geskikte storielyn vir Suid-Afrika nie, behalwe as die sepie ook ʼn episode vertoon waarin plaasmoorde gewys word. “Isidingo is besig om rassisties te raak,” het Kumeren Govender geskryf terwyl Andile Mayisela gevra het waarom wit mense so “bang is om oor rassisme te praat?” Hy was een van die vele Facebook-deelnemers wat aangevoer het die episode wys net wat werklik in Suid-Afrika gebeur. Nash Black het gesê dit is ʼn uitstekende storielyn en gesê party mense is “allergies vir die werklikheid”.

Volgens Ernst Roets, adjunk uitvoerende hoof van AfriForum, weerspieël die verhaallyn in Isidingo nie die werklikheid onder wit mense, Afrikaners of boere nie. Roets meen die sepie word gebruik om ’n anti-wit rassisme te bevorder.

“Ons erken die vervaardigers van Isidingo se reg op artistieke vryheid en kan nie aan hulle voorskryf wat in die program gebeeldsend moet word nie. Ons is egter bekommerd oor die openbare reaksie wat vanuit sekere geledere op dié episode gevolg het,” het Roets gesê. Hy het aangevoer die vervaardigers van Isidingo behoort in die openbaar sterk standpunt teen alle vorme van rassisme in te neem. Roets het ook gesê dat AfriForum sal voortgaan om alle vorme van rassisme konsekwent te verwerp.

Eusebius Mackaiser, aanbieder van 702 Talk Radio, het die betrokke episode saam met Thandi Smith, hoof van Media Monitoring Africa se mediabeleidprogramme, en Carol Motlala, menseregteprokureur en lid van die persraad, ontleed. Hulle was dit eens dat die toneel ontstellend was en ʼn sensitiewe onderwerp aanraak. Motlala het aangevoer dat die episode die beginpunt vir ʼn gesprek in die huis oor rassistiese insidente kan wees. Smith het egter gesê die vervaardigers van die sepie was heeltemal binne hulle regte om gewelddadige aksies in die sepie se storielyn in te skryf, maar Motlala het aangevoer dat die vervaardigers kykers vooraf kon waarsku van die aard van die inhoud van die betrokke episode voordat hulle daaraan blootgestel is.

Kaizer Kganyago, SAUK-woordvoerder, het gesê hy kan nie tans kommentaar oor die betrokke episode lewer nie aangesien klagtes oor die episode by die Uitsaaiklagtekommissie van Suid-Afrika (UKKSA) gelê is. “Die ondersoekproses moet nou sy gang gaan en my persoonlike standpunt oor die episode is irrelevant,” het Kganyago gesê.

Shouneez Martin, registrateur van UKKSA, het bevestig dat die kommissie verskeie klagtes oor die betrokke episode ontvang het en besig is om dit verder met die SAUK op te volg.

Isidingo was vroeër die maand ook in die nuus toe daar aangevoer is die openbare uitsaaier is so erg wanbestuur dat sommige gewilde sepies se vervaardigers, soos dié van Isidingo en Muvhango, nie in April betaal sal kan word nie.

Die webwerf Channel24 het ook verlede maand berig dat Isidingo verskeie pogings gaan aanwend om te vernuwe nadat die sepie die laaste paar jaar berug geword het daarvoor dat dit konstant van skrywers en vervaardigers verander en kykergetalle bly daal het. Isidingo, wat sedert 1998 deel van die SABC3-stal is, kan tans daarin slaag om net sowat ʼn miljoen kykers lok. Dié prestasie vertoon swak in vergelyking met mededingende sepies op e.tv, het dié webwerf berig.

Volgens Endemol Shine Africa, die vervaardigers van Isidingo, poog hulle om die sepie “terug te neem na die gedrewenheid en vasberadenheid wat die essensie van Isidingo is. Die sepie moet verteenwoordigend wees van die nuwe SABC3-handelsmerk terwyl dit steeds sy opwindende en boeiende storielyne handhaaf, van die eerste minuut van elke episode,” het Pumla Hopa, uitvoerende vervaardiger van Isidingo aan die webwerf gesê.

• Lees ook ’n vorige berig oor die betrokke episode van Isidingo op Maroela Media.

Hier is ʼn YouTube-video van die betrokke episode van Isindingo. Die toneel waar die karakter Sechaba aangeval word begin by 08:18. Wees gewaarsku: Die tonele kan sensitiewe kykers ontstel.

[This post contains video, click to play]

Clapham High School. Foto: Via claphamhighschool.co.za

Die Gautengse departement van onderwys het ʼn span beraders na die Pretoriase hoërskool gestuur waar ʼn 60-jarige onderwyseres Dinsdag ineengestort en gesterf het.

Maroela Media het vroeër berig die onderwyseres is by die Clapham High School in Queenswood dood.

“Volgens ʼn voorlopige ondersoek het die onderwyseres ineengestort en gesterf terwyl sy toesig oor ʼn eksamen gehou het. Die voorval was egter nie ten aanskoue van die leerders soos aanvanklik gedink is nie,” het Oupa Bodibe, woordvoerder van die departement, by navraag aan Maroela Media gesê.

Die onderwyseres het glo sleg gevoel en na die badkamer gegaan waar sy ineengestort het.

Hy het gesê die departement het ʼn volledige ondersoek na die voorval van stapel gestuur. ʼn Nadoodse ondersoek sal gedoen word om die oorsaak van die vrou se dood te bepaal. Haar identiteit word weerhou totdat al haar naasbestaandes van haar dood in kennis gestel is.

“Die onderwyseres het jare se diens verrig en haar dood is ʼn groot verlies vir die skool en die departement,” het Bodibe gesê.

Panyaza Lesufi, LUR van die Gautengse departement van onderwys, het kort ná die voorval die skool besoek en onderneem om voort te gaan om ondersteuning aan die oorledene se familie te bied.

Foto: Becky Miller neem monsters van sediment uit die Trou Al’Wesse, België. Erkenningt: Max Planck Instituut via AFP

In wat as ’n groot deurbraak beskou word om die menslike oergeskiedenis na te speur, het die Max Planck-instituut in Duitsland ’n metode ontwikkel om menslike DNS asook die DNS van soogdiere uit grotte te herwin, selfs al is daar nie beendere in die grotte gevind nie.

Voorheen was navorsers van beendere afhanklik om baie ou DNS te onttrek.

ʼn Artikel oor dié deurbraak is pas in die vaktydskrif Science gepubliseer.

Tydens die navorsing waarin DNS in verskillende strata gesoek is, is die DNS van Neandertal- en Denisovan-mense gevind. Die ouderdom van die DNS wissel van 14 000 tot 550 000 jaar en dateer uit die Pleistoseentydperk.

Die ouderdomme van die strata dra baie daartoe by dat die ouderdom van die DNS ook bepaal kan word, hoewel groot versigtigheid aan die dag gelê moet word omdat die sagte grondbodem van grotte in die verlede dikwels omgedolwe was.

Bron: The Telegraph

Michael van der Watt.

Die polisie in die Oos-Kaap is dringend op soek na sers. Michael van der Watt (35) wat Sondag vermis geraak het.

Kol. Priscilla Naidu, woordvoerder van die polisie, het gesê Van der Watt is laaste gesien deur ʼn kollega wat hom Sondagoggend ná ʼn nagskof by die huis gaan aflaai het.

Van der Watt is as vermis aangemeld deur sy vrou wat nie van hom gehoor het sedert Sondagaand nie.

Van der Watt, wat ook ʼn fietsryer is, is ʼn beampte by die Motherwell taktiese reaksie-eenheid.

“In dié stadium is alle inligting baie onduidelik en volg die polisie alles op,” het Naidu gesê.

Volgens Naidu het bure beweer hulle het Maandagoggend iemand die huis sien verlaat in fietsryklere.

Volgens die polisie is Van der Watt se fiets ook vermis maar al sy persoonlike items soos sy selfoon is by die huis.

Die polisie se honde-eenheid en die lugvleuel is betrokke by ʼn soektog langs die fietsryroete by Draaifontein, Schoenmakerskop en Groenbossies.

Die polisie het enigiemand met inligting gevra om die Kabega Park-polisiestasie te skakel by 041 397 6801/02.

Van links is Boeta van der Westhuizen, Anton Loggenberg, kapt. Henk Prinsloo, Cor Loggenberg, Loedie van der Westhuizen en Miela Janse van Vuuren. Foto: Maroela Media.

Die ses beskuldigdes in die opspraakwekkende Parys-moordsaak het Dinsdag op die eerste dag van die verhoor net vlugtig in die hof verskyn.

Boeta van der Westhuizen (46), sy seun Loedie van der Westhuizen (18), Anton Loggenberg (50), sy seun Cor Loggenberg (18), Miela Janse van Vuuren (22) en kapt. Henk Prinsloo (46) staan tereg op aanklag van moord in verband met die dood van Samuel Tjixa (34) en Simon Jubeba (24).

Die verhoor is vanoggend aanvanklik vertraag omdat die regter wat die saak moet aanhoor nog nie beskikbaar was nie. Toe die verhoor ná 15:00 voor regter Corné van Zyl begin het, het die hof gehoor dat die verdediging ʼn aansoek sal bring om die staat te verplig om sekere inligting wat met die saak verband hou aan die beskuldigdes se regspan te oorhandig. Die saak is daarom tot Woensdag uitgestel.

Van Zyl het die onderskeie regspanne opdrag gegee om met mekaar oorleg te pleeg oor ʼn versoek van die SAUK om die verrigtinge op video op te neem. Sy sal na verwagting ook môre hieroor ʼn beslissing vel.

Advokate Hans de Bruin en Nico Dreyer tree vir die beskuldigdes op, terwyl advokate Sandile Mthethwa en Jabulani Mlotshwa namens die staat optree.

Die staat voer aan die beskuldigdes was betrokke by die moord op Tjixa en Jubeba wat op 6 Januarie 2016 deur boere van die Parys-omgewing op ʼn plaas aangekeer en na bewering só erg aangerand is dat hulle later in die hospitaal aan hul beserings beswyk het. Boere in die gebied het beweer Tjixa en Jubeba was deel van ʼn aanval op Loedie van der Westhuizen sr., Boeta se pa, se plaas, maar die oorledenes se familie het dit ontken en gesê Tjixa en Jubeba is tydens ʼn loongeskil deur die boere doodgeslaan.

Ruth Qokotho, Tjixa se ma, het in trane buite die hof aan Maroela Media gesê 16 maande ná haar seun se dood voel dit steeds asof dit gister gebeur het. “Dit is verskriklik swaar vir ons familie. Samuel was die broodwinner. Sedert sy dood gaan dit [finansieel] nog swaarder met ons,” het Qokotho gesê. “Om hierheen te kom en daardie mense [die beskuldigdes] te sien, hoe moet ek voel? Ek is baie kwaad. Vir die res van my lewe sal ek hulle gesigte nooit vergeet nie.”

Die saak word môreoggend om 10:00 hervat.

Lees alle vorige berigte oor die Parys-boere op Maroela Media.

Betogers buite die Coligny-landdroshof tydens die beskuldigdes se vorige verskyning (28 April 2017). Foto: Verskaf

Pieter Doorewaard en Phillip Schutte, die twee mans wat beskuldig word van die moord op ʼn 16- jarige seun, se aansoek om borgtog is vandag in die Coligny-landdroshof aangehoor.

Frank Lesenyego, die streekswoordvoerder van die Nasionale Vervolgingsgesag (NVG), het aan Maroela Media gesê die saak is uitgestel tot Woensdag.

Intussen het 150 inwoners van die dorp ʼn petisie geteken wat vra dat die klag van moord teen Doorewaard en Schutte teruggetrek word. Pieter Karsten (48), Doorewaard en Schutte se werkgewer wat tydens die hofverrigtinge getuig het, het gesê hy het mense persoonlik genader om die petisie te teken.

Hy het aangevoer dat die gewelddadige betoging in Coligny nie as gevolg van die dood van Matlhomola Jonas Mosweu (16) plaasgevind het nie, maar as gevolg van swak dienslewering.

Talle inwoners van die Tlhabologang-nedersetting het buite die hof betoog dat Doorewaard en Schutte se aansoek van die hand gewys moet word.

Die mans het na bewering twee seuns betrap waar hulle sonneblomme uit boere se landerye gesteel het. Hulle het glo vir die seuns gesê om agter op hul bakkie te klim sodat die mans hulle polisiestasie toe kon neem. Een seun het weggehardloop en die ander seun, Matlhomola Jonas Mosweu, het agter op die bakkie geklim. Hy het glo egter van die bakkie afgespring toe die voertuig om ʼn draai spoed verminder het.

Matlhomola het sy nek gebreek en is op 20 April dood.

Sy pa, Sakkie Dingake, het vroeër gesê die familie het eers Sondag van Matlhomola se dood uitgevind. Hulle het die heeltyd gedink hy kuier by vriende op ʼn plaas in Putfontein. Dingake het ontken dat sy seun sonneblomme sou steel.

Lees alle vorige berigte oor Coligny op Maroela Media.

Die ongelukstoneel op die N17 buite Kinross in Mpumalanga. Foto: ER24

Vier mense is dood en twee ander ernstig beseer in twee verskillende botsings wat Dinsdagmiddag plaasgevind het.

Die eerste botsing het naby Bloempoort in Limpopo gebeur. Volgens lt.kol. Moatshe Ngoepe, woordvoerder van die polisie, was drie motors in dié botsing op die R25 betrokke.

“Die drie voertuie wat in die botsing betrokke was, is ʼn BMW, ʼn Hyundai Elantra en ʼn Ford Fiesta. Die twee insittendes in die Fiesta is op slag dood, terwyl die twee insittendes in die BMW ernstige beserings opgedoen het. Die bestuurder van die Hyundai is nie beseer nie,” het Ngoepe gesê. Hy het gesê die oorsaak van die ongeluk is nog nie bekend nie en ʼn saak van strafbare manslag word ondersoek.

Die ongelukstoneel op die N17 buite Kinross in Mpumalanga. Foto: ER24

Intussen is nog twee mense dood toe ʼn bakkie en ʼn motor reg van voor op die N17 buite Kinross in Mpumalanga gebots het.

Russel Meiring, woordvoerder van ER24, het gesê by paramedici se aankoms op die toneel het hulle die wrakke van die voertuie aan weerskante van die pad aangetref. Albei bestuurders is op die toneel dood verklaar. Dit is nog nie duidelik wat die oorsaak van die ongeluk was nie, maar dit word deur die polisie ondersoek.

Die verkeer is erg vertraag terwyl die ongelukstoneel opgeruim is.

Elvis Ramosebudi tydens ‘n vorige verskyning in die Johannesburg-landdroshof (28 April 2017). Foto: ANA

Die Nasionale Vervolgingsgesag (NVG) het Dinsdag gesê daar is geen bewyse dat die man wat daarvan beskuldig word dat hy beplan het om verskeie regeringsbeamptes en ander prominente Suid-Afrikaners te vermoor, deel was van ʼn beplande staatsgreep nie.

Phindi Mjonondwane, woordvoerder van die NVG, het buite die Johannesburg-landdroshof gesê die bewyse dui daarop dat die man alleen gewerk het. Sy kon egter nie sê wanneer die bewyse beskikbaar gestel sal word nie. “In hierdie stadium het ons geen inligting wat daarop dui dat daar ʼn staatsgreep beplan was nie,” het sy aan verslaggewers gesê.

Elvis Ramosebudi (33) het Dinsdag vlugtig in die volgepakte hof voor landdros Vincent Ratshibvumo verskyn. Ramosebudi het kalm in die beskuldigdebank gelyk en dit het nie voorgekom asof hy hom aan die media-aandag steur nie.

Ramosebudi is verlede week deur die Valke in hegtenis geneem nadat hulle glo kommunikasie onderskep het wat daarop dui dat hy verskeie sluipmoorde beplan het. Ramosebudi het glo beplan om 19 mense te laat vermoor.

Adv. Johan Badenhorst, die staatsaanklaer, het gesê daar is besluit om die aanklag teen Ramosebudi te verander van sameswering tot moord na aanhitsing tot moord. Die aanklag is verander omdat die bewyse glo daarop dui dat Ramosebudi alleen gewerk het en nie met enigiemand anders saamgesweer het nie.

“Hy het mense van Anglo-American aangehits. Hy het ʼn brief aan ʼn voormalige werknemer van Anglo-American geskryf waarin hy R60 miljoen vra om sy misdade uit te voer,” het Mjonondwane gesê.

Tydens Ramosebudi se vorige verskyning het die staat aangedui hy is van voorneme om die beskuldigde vir psigiatriese waarneming te stuur omdat sy geestestoestand bevraagteken word. Mjonondwane het gesê die besluit om Ramosebudi na ʼn psigiatriese instansie te verwys of nie sal geneem word sodra die ondersoek afgehandel is.

“Daar moet verdere ondersoek gedoen word vir ons as die staat om te besluit of hy vir psigiatriese waarneming gestuur moet word of nie.”

Volgens die hofdokumente is van die name op die “moordlys” onder meer dié van pres. Jacob Zuma, sy seun Duduzani Zuma, die Gupta-broers, voormalige Eskom-baas Brian Molefe, Dudu Myeni, die raadsvoorsitter van SAL, Shaun Abrahams, die hoof van die NVG, en Des van Rooyen, minister van samewerkende regering.

Die Valke het vroeër gesê Ramosebudi is die stigter van die Anti-State Capture Death Squad Alliance (ASCDSA).

Die saak is tot Vrydag uitgestel wanneer Ramosebudi om borgtog sal aansoek doen.

Kallie Kriel, uitvoerende hoof van AfriForum. Foto: Reint Dykema

Solidariteit en AfriForum het Dinsdag die volgende stap in hul stryd teen rassekwotas in Suid-Afrikaanse sport aangekondig.

In die hofstukke, wat vandag beteken is, word die Suid-Afrikaanse Rugby-unie (SARU), Krieket Suid-Afrika (KSA), Atletiek Suid-Afrika (ASA) en Netbal Suid-Afrika (NSA) uitgedaag om hul ooreengekome rassekwotas voor die arbeidshof te verdedig.

Solidariteit en AfriForum het in ʼn verklaring gesê die ooreengekome kwotas is volgens hulle nie alleen teen die wet nie, maar druis ook in teen ooreengekome internasionale norme. “Dit is skreiend dat die ANC sulke strawwe rassekwotas afdwing. Dit is egter nie verrassend nie. Vir die ANC is plaaslike rassewetgewing en internasionale ooreenkomste maar net lippetaal,” het Johan Kruger, adjunkbestuurshoof van Solidariteit, gesê.

Volgens Kruger is die ANC se rasse-ideologie lankal reeds sigbaar en kan die party sy rasgedrewe motiewe nie meer verbloem nie. “Die ANC se ontneming van uitnemende plaaslike sportmanne én vroue van geleenthede weens onwettige rassekwotas moet deur die hof veroordeel word,” sê Kruger.

“Ons vra dat die hof beveel dat die transformasiehandves, in so verre dit demografiese profiele nastreef, ongeldig verklaar word. Ons versoek verder dat die hof beveel dat die ooreenkomste tussen die partye in so verre dit kwotas daarstel, ongeldig verklaar word en dat sportliggame verbied word om kwotas toe te pas met spankeuses op nasionale, provinsiale, klub- en skoolvlak.”

Volgens Kallie Kriel, uitvoerende hoof van AfriForum, moet meriete die enigste maatstaf in die samestelling van sportspanne wees. “Die afdwing van rassekwotas en politieke inmenging in Suid-Afrikaanse sport druis direk in teen die reëls en regulasies van internasionale sportliggame. Daarom gaan AfriForum binne maande ʼn afvaardiging na verskeie internasionale sportliggame stuur,” het Kriel gesê.

Kriel het gesê AfriForum se aansoek om as vriend van die hof in die huidige aansoek toegelaat te word, sal binne die afsienbare toekoms beteken word.

Betogers buite die Coligny-landdroshof tydens die beskuldigdes se vorige verskyning (28 April 2017). Foto: @IanCameron23, Twitter

ʼn Polisiebeampte het Dinsdag in die Coligny-landdroshof in Noordwes getuig die 16-jarige seun wat verlede week dood is nadat hy na bewering van ʼn bewegende bakkie afgeval het, is uit die bakkie gegooi.

Pieter Doorewaard en Phillip Schutte het vandag in die hof verskyn op aanklagte van moord en poging tot moord in verband met die seun, Matlhomola Jonas Mosweu, se dood.

Brig. Cliffard Kgorane het aan die hof gesê ʼn ooggetuie het glo gesien hoe Doorewaard en Schutte vir Mosweu op 20 April uit die bewegende voertuig gegooi het. “Toe hulle besef iemand het hulle gesien, het hulle omgedraai, die oorledene opgetel en hom agter op die bakkie gelaai. Hulle het ook die ooggetuie gekonfronteer en hom gevra of hy gesien het wat gebeur het,” het Kgorane gesê.

“Die ooggetuie het vir hulle gesê hy het niks gesien nie. Hulle het hom [die ooggetuie] ook agter op te bakkie gelaai en 48 km ver gery terwyl hulle hom gedreig het. Hulle het uiteindelik tot by ʼn dam gery waar hulle ʼn vuurwapen op die ooggetuie gerig het, hom gedwing het om alkohol te drink en hom beveel het om voor die bewegende bakkie te hardloop terwyl hulle skote op hom afgevuur het. Hy het opgegooi en inmekaargesak. Die twee het hom daar gelos. In hierdie tyd het die seun [Mosweu] heeltyd agter op die bakkie gelê.”

Kgorane het gesê die twee beskuldigdes het die ooggetuie se selfoon afgevat en het die volgende dag na sy huis gegaan waar hulle hom aangesê het om vir niemand te vertel wat gebeur het nie.

Hy het gesê Mosweu is in ʼn plas bloed langs die pad aangetref waar die beskuldigdes hom gelaat het. Die twee mans het glo na die polisie in Coligny gegaan om aan te meld dat die seun van die bakkie afgeval het. Hulle het vir die polisie gevra om ʼn ambulans na die toneel te stuur. Volgens Kgorane het die mans geweier om saam met die polisie na die toneel te gaan en het hulle gesê hulle het ander verpligtinge om na te kom.

Kgorane het gesê die beskuldigdes se lewens sal in gevaar wees indien hulle op borgtog vrygelaat word. “Hulle is veiliger in polisieaanhouding as daar buite,” het hy gesê.

Hy het bygevoeg daar is ʼn moontlikheid dat aanklagte van ontvoering en dwarsboming van die gereg ook teen die beskuldigdes aanhangig gemaak kan word.

Die saak is tot Woensdag uitgestel.

Lees alle vorige berigte oor Coligny op Maroela Media.

Argieffoto (Foto: Pexels, Pixabay)

Meer as 108 000 aansoeke is teen laat Dinsdagmiddag op die Gautengse departement van onderwys se aanlynstelsel vir skoolaansoeke ingedien.

Steve Mabona, woordvoerder van die LUR van onderwys in Gauteng, het gesê teen 16:30 is 108 040 aansoeke ontvang. “Ons het ons teiken bereik,” het Mabona gesê.

Die Gautengse departement van onderwys het in ʼn verklaring gesê hy is baie tevrede met die aanlynstelsel en die oorweldigende reaksie wat hy van Gauteng-ouers gekry het. “Die terugvoer van die ouers wat die aanlynstelsel gebruik het of ʼn toelatingsentrum besoek het om daar aanlyn aansoek te doen, was tot dusver oorwegend positief,” lui die verklaring.

“Binne die eerste 20 minute wat die stelsel beskikbaar gemaak is, het meer as 16 000 ouers reeds suksesvol aansoek gedoen. Teen middagete is 90 984 aansoeke deur die stelsel geprosesseer.”

Maroela Media het vroeër berig David Makhura, premier van Gauteng, en Panyaza Lesudi, die LUR vir onderwys, het vanoggend by die Orange Farm-taxistaanplek pamflette uitgedeel waarin ouers aangemoedig word om hul kinders vroegtydig te registreer en dit nie tot op die laaste nippertjie te laat nie.

Ouers van graad 1- en graad 8-leerders kan van vandag aanlyn aansoek doen vir toelating tot Gauteng-skole volgende jaar. Ouers wat nie toegang tot internet het nie, kan een van die 65 toelatingsentrums in die provinsie besoek en van daar af aanlyn aansoek doen.

Dié suksesvolle registrasies kom ná 2016 se ineenstorting van die webwerf waarop ouers hul kinders kon registreer.

Die departement het vroeër gesê talle verbeteringe is op die stelsel aangebring om ʼn soortgelyke voorval te voorkom, maar daar is wel vandag ʼn paar kleiner probleme in die aanlynstelsel geïdentifiseer. Hierdie probleme sluit in ouers wat ʼn foutboodskap ontvang terwyl hulle steeds met hul aansoek besig is. Ouers wat hierdie boodskap ontvang word deur die departement versoek om die stelsel te herlaai en weer hul aansoek in te vul.

Sommige ouers ontvang ʼn boodskap wat aandui dat hul besonderhede reeds op die stelsel geregistreer is. In so ʼn geval het die departement ouers aangeraai om hul wagwoorde te verander en weer te probeer om hul aansoek in te dien.

ʼn Derde probleem is ouers wat ʼn SMS ter bevestiging van hul aansoek ontvang sonder ʼn verwysingsnommer. Volgens die departement sal nuwe SMS’e met verwysingsnommers aan hierdie ouers gestuur word.

Ouers wat nog nie aansoek vir hul kinders gedoen het nie, word versoek om dit so gou as moontlik te doen. Aansoeke sal op 12 Junie om middernag sluit. Die plasing van leerders sal van 24 Julie gedoen word.