‘n Skermskoot uit die video toe die passasier hardhandig uit sy sitplek geruk word.

Die United Airlines-lugredery en die passasier wat vroeër vandeesmaand hardhandig van een van dié lugredery se vliegtuie gesleep is, het vandeesweek tot ʼn eenparige besluit in die hof gekom.

Die lugredery het Donderdag in ʼn verklaring gesê die organisasie en die passasier, wat intussen as dr. David Dao geïdentifiseer is, het ʼn skikking vir ʼn onbekende bedrag bereik.

Maroela Media het vroeër berig Dao is deur sekuriteitsbeamptes van dié lugredery hardhandig van die vliegtuig gesleep omdat die vlug oorbespreek was. Bemanningslede het passasiers aanvanklik $400 en later $800 aangebied om vrywillig hul sitplekke prys te gee.

Toe niemand dit wou doen nie, is vier passasiers voor die voet gekies. Drie het afgeklim, maar die vierde passasier, Dao, het geweier en gesê hy het pasiënte wat hy Maandag moet behandel.

‘n Skermskoot uit die video waarop die passasier se bebloede lip gesien kan word.

Drie sekuriteitsbeamptes het hom toe van die vliegtuig af verwyder. In ʼn tweede video wat op sosiale media gedeel is, kan bloed aan die man se stukkende lip gesien word terwyl hy in die paadjie af gesleep word.

“Ons sien uit daarna om die verbeteringe wat ons aangekondig het, in te stel. Ons kliënte is immers die middelpunt van alles wat ons doen,” lui die verklaring.

Die lugredery het ook gesê hy sal voortaan vir passasiers ʼn bedrag van tot en met $10 000 aanbied indien ʼn vlug weer oorbespreek is, en sê hy neem volle verantwoordelikheid vir die voorval sonder om enigiemand die blaam te gee.

Lees die verklaring hier.

Betogers voor die Coligny-landdroshof in Noordwes. Foto: Twitter via @IanCameron23

ʼn Groep mense het Vrydagoggend voor die Coligny-landdroshof in Noordwes betoog voor die hofverskyning van twee mans wat teregstaan vir die moord op ʼn 12-jarige seun.

Die betogers het te midde van ʼn sterk polisieteenwoordigheid voor die hof gesing en gedans. Ian Cameron, hoof van gemeenskapsveiligheid by AfriForum, woon die hofverrigtinge by en sê hoewel die betogers voor die hof saamgedrom het, was die situasie steeds kalm en in bedwang. Cameron het gesê hy vermoed die betogers eis dat die twee mans nie op borgtog vrygelaat word nie, maar die rede vir hul betoging was nie onmiddellik duidelik nie.

Betogers voor die Coligny-landdroshof in Noordwes. Foto: Twitter via @IanCameron23

Maroela Media het vroeër berig die 12-jarige seun se dood het aanleiding gegee tot die gewelddadige betogings in Coligny waartydens minstens drie vragmotors en drie huise afgebrand en talle winkels geplunder is.

Pieter Karsten, die werkgewer van die twee mans, het in ʼn onderhoud met RSG se Monitor en Spektrum gesê die mans het twee seuns betrap dat hulle sonneblomme uit boere se landerye gesteel het. Hulle het vir die seuns gesê om agter op hul bakkie te klim sodat die mans hulle polisiestasie toe kon vat. Die een seun het weggehardloop en die ander seun het agter op die bakkie geklim.

Karsten beweer toe die bakkie om ʼn draai spoed verminder het, het die seun van die steeds bewegende voertuig afgespring. Hy het ernstige beserings opgedoen en is later oorlede.

Teen Donderdagmiddag kon die provinsiale polisiewoordvoerder steeds nie die identiteit van die seun bevestig nie.

Die mans sal na verwagting tussen 11:00 en 13:00 in die hof verskyn. Hulle was teen 10:30 nog nie by die hof nie.

‘n Video volg onderaan die berig.

John Newman (45) gesels met sy vrou, Marci (49) Foto: Mackenna Newman via Twitter

ʼn Man van die Amerikaanse deelstaat Kalifornië steel die harte van duisende internetgebruikers wêreldwyd nadat hy geweier het om sy vrou, ʼn kankerlyer, se sy te verlaat gedurende ʼn  isolasietydperk ná ʼn ernstige operasie.

John Newman (45) se vrou, Marci (49), is in Oktober verlede jaar met skildklierkanker gediagnoseer.

Die Newmans se dogter, Mackenna (17), het aan CBS vertel haar ma moes ʼn paar weke gelede ʼn intensiewe operasie ondergaan om die laaste kankerselle te verwyder. Weens dié operasie moes sy bykomende radioaktiewe jodiumbehandeling kry wat ten doel het om die laaste kankerselle te vernietig.

“Sy moes vir vyf dae in isolasie wees om te verhoed dat ander mense blootgestel word aan die bestraling, en het daarom heeltyd in haar kamer met ʼn toe deur gebly,” vertel Mackenna.

John het egter geweier om haar vir ʼn oomblik alleen te los.

“Op die eerste dag het hy in die tuin gesit en met haar gepraat deur die venster. Die laaste twee dae het hy ʼn tafeltjie en stoel tot voor die deur getrek en met haar gesels.”

Volgens Mackenna het hulle land en sand gesels, en het hy selfs vir Marci ʼn boek voorgelees.

Mackenna se Twitter-inskrywing met ʼn foto van haar pa daarby is meer as 10 000 keer gedeel.

“Dis hoe ons gesin is – ons sorg vir mekaar. Sy het nog altyd geweet hy sal so iets vir haar doen.”

Marci is volgens dokters tans in remissie.

Bron: CBS

Foto’s bied ʼn blik op die wêreld wat nie noodwendig in woorde beskryf kan word nie. Beleef al die nuusgebeure, een foto op ʼn slag.

Andre, Markus en Mani geniet ʼn gesellige buitelugkuier in ʼn borrelbad op die Stanserhornberg in Switserland. Dié land ervaar tans yskoue vriesweer wat buitengewoon vir April is. Foto: Alexandra Wey, AP

Ciprus se president, Nicos Anastasiades, word ontvang deur ʼn erewag by die presidensiële paleis in Nieu-Delhi, Indië. Foto: Manish Swarup, AP

Felipe Melo van Brasilië en Matias Mier van Uruguay raak handgemeen tydens ʼn sokkerwedstryd tussen Palmeiras en Penarol in Uruguay. Foto: Matilde Campodonico, AP

Steven Peebles van Georgia ry ʼn perd bloots tydens die Corpus Christi Rodeo in Texas, VSA. Foto: Courtney Sacco, AP

Dié twee Ferriswiele voor die Karlsruhe-kasteel in Duitsland is simbolies vir die uitvindsel van die fiets wat in 1817 deur Karl Drais ontwerp is. Foto: Uli Deck, AP

Foto: Rescue Care-ambulansdienste

ʼn Kleuter is Donderdagmiddag in ʼn ernstige toestand na ʼn hospitaal in Durban gehaas nadat hy by die gesin se huis in die swembad beland het.

Garrith Jamieson, bedryfsdirekteur van Rescue Care-ambulansdienste, het gesê die voorval het omstreeks 14:30 by ʼn huis in Devon Grove in Bluff gebeur.

Jamieson het aan Maroela Media gesê die pa en sy twee en ʼn half jaar oue seun was buite die huis toe die pa vir ʼn oomblik in die huis gegaan het. Met sy terugkeer het hy sy seun in die swembad gevind. Volgens Jamieson was die kleuter vermoedelik ongeveer een minuut lank in die water.

“Paramedici is deur die buurtwag na die toneel ontbied en hulle het die seuntjie op die toneel gestabiliseer. Hy is in ʼn ernstige toestand na ʼn hospitaal in Durban gehaas.”

Jamieson het gesê die seun was teen Vrydagoggend steeds in die hospitaal, maar by sy volle bewussyn en buite gevaar.

Die seuntjie se ma het egter die inligting wat deur Jamieson verskaf is betwis. Volgens haar was daar baie min water in die swembad en het haar man skaars sy rug gedraai toe die seuntjie in die water beland het. Sy het gesê haar seuntjie is reeds dieselfde dag uit die hospitaal ontslaan.

Betogers buite die Coligny-landdroshof (28 April 2017). Foto: Verskaf

Die twee mans wat aangekla word van die moord op ʼn 12-jarige seun van Coligny in Noordwes sal minstens tot 9 Mei agter tralies bly.

Pieter Doornward en Phillip Schutte het vandag in die Coligny-landdroshof verskyn op aanklagte van moord en poging tot moord. Frank Lesenyego, die streekswoordvoerder van die Nasionale Vervolgingsgesag (NVG), het aan Maroela Media gesê Doornward en Schutte sal op 9 Mei om borgtog aansoek doen. Hulle bly in aanhouding tot dan.

Maroela Media het vroeër berig die mans het na bewering twee seuns betrap dat hulle sonneblomme uit boere se landerye gesteel het. Hulle het glo vir die seuns gesê om agter op hul bakkie te klim sodat die mans hulle polisiestasie toe kon vat.

Pieter Karsten, die werkgewer van die twee mans, het in ʼn onderhoud met RSG se Monitor en Spektrum beweer een seun het weggehardloop en die ander seun het agter op die bakkie geklim. Volgens Karsten het die seun van die bakkie afgespring toe die voertuig om ʼn draai spoed verminder het. Hy het ernstige beserings opgedoen en is later oorlede.

Betogers buite die Coligny-landdroshof (28 April 2017). Foto: Verskaf

Die seun se identiteit is nog nie bekendgemaak nie, maar sy dood het aanleiding gegee tot die gewelddadige betogings wat dae lank in Coligny gewoed het.

ʼn Groep betogers het Vrydagoggend voor die hof saamgedrom om te eis dat Doornward en Schutte nie op borgtog vrygelaat word nie. Die publiek is nie in die hof toegelaat nie.

Lesenyego het gesê die landdros wat vandag die saak aangehoor het, het homself van die saak onttrek omdat hy vrees vir die veiligheid van sy familie. ʼn Ander landdros sal aangewys word om Doornward en Schutte se borgtogaansoek aan te hoor.

Foto: ANA

Nagenoeg 50 van SAL se vlugte is Woensdag vertraag of gekanselleer nadat kajuitpersoneel gestaak en geëis het dat hul internasionale kostoelaag van $130 (R1 710) na $170 (R2 236) verhoog word.

Die SAL het egter ’n tussentydse bevel van die arbeidshof in Johannesburg verkry dat stakende lede hul werk moet hervat.

Saza Sibanyoni-Mugambi, president van SACCA, het gesê hul lede het teruggekeer werk toe om die wet te respekteer. “Ons regspan is egter besig om die hersiening op te stel. Ons is net nie seker wanneer dit reg sal wees nie,” het Sibanyoni-Mugambi, gesê.

Volgens die SAL se beëdigde verklaring was die staking onbeskermd. Die lugredery het gesê hy is bereid om verder met SACCA te onderhandel deur middel van ʼn gefasiliteerde proses oor die volgende twee maande.

“Ons hoop dat ons ʼn vriendskaplike ooreenkoms met die vakbond sal bereik wat kajuitpersoneel betref, terwyl ons die finansiële volhoubaarheid van die lugdiens beskerm,” het die SAL gesê.

‘n Skermskoot uit die video

ʼn Video van ʼn Franse junior rugbyliga-speler wat vandeesweek in ʼn wedstryd tussen die Saint-Esteve- en Toulouse-spanne ʼn skeidsregter bewusteloos geslaan het omdat dié vir hom ʼn geelkaart gegee het, versprei soos ʼn veldbrand op sosiale media.

Volgens Mirror en WalesOnline gaan dié speler, wie se naam nie bekendgemaak mag word nie, binnekort voor die Franse nasionale dissiplinêre kommissie verskyn. Hy is glo al voorheen uit wedstryde geskors as gevolg van woede-uitbarstings.

Die skeidsregter, intussen geïdentifiseer as Benjamin Casty, het glo ná talle waarskuwings aan die speler vir hom ʼn geelkaart gegee omdat hy nie by die reëls van die spel hou nie.

Die Saint-Esteve-rugbyspeler het egter sy humeur verloor en hom ʼn vuishou gegee, waarna Casty op die grond neergeval het. Ander rugbyspelers het hom probeer keer, maar hy het hulle ook bygedam, en die wedstryd moes beëindig word.

Volgens berigte was Casty bewusteloos en is hy na ’n hospitaal gehaas met wangbeen- en kaakbeserings.

Die president van die Franse Rugbyliga-federasie, Marc Palanques, het dié optrede veroordeel en gesê hy hoop die nasionale dissiplinêre kommissie “sal onwrikbaar” wees en die speler lewenslank van rugby verban.

“Hy is al voorheen ook geskors, en kan bloot nie sy humeur beteuel nie. Dit is onaanvaarbaar en ek hoop die kommissie maak die regte besluit.”

Intussen het die president van die Saint-Esteve-klub, Christian Cozza, ook aangekondig dat hy as gevolg van dié gebeure sy bedanking gaan inhandig.

Die rugbyspeler sal volgens berigte Woensdag verhoor word.

Bron: Mirror

Elvis Ramosebudi in die Johannesburg-landdroshof (28 April 2017). Foto: ANA

Die geestelike gesondheid van die man wat na bewering beplan het om sluipmoorde op verskeie Suid-Afrikaanse staatsbeamptes en ander prominente Suid-Afrikaners uit te voer, is Vrydag in die Johannesburg-landdroshof bevraagteken.

Elvis Ramosebudi (33) is Woensdag deur die Valke in hegtenis geneem omdat hy glo beplan het om ʼn lys van 19 kabinetsministers, lede van staatsinstansies en prominente Suid-Afrikaners wat almal na bewering by staatskaping sou baat, te laat vermoor. Hy staan tereg op ʼn aanklag van sameswering tot moord.

Die Valke het vroeër gesê hulle ondersoek Ramosebudi al sedert Oktober verlede jaar en het kommunikasie onderskep waarin die beweerde beplande sluipmoorde bespreek word.

King Masemola, die staatsaanklaer, het Vrydag gesê hy sal die verdagte se borgtogaansoek teenstaan aangesien die staat nog besig is met hul ondersoek. Hy het ook gesê hy is van voorneme om te versoek dat Ramosebudi vir psigiatriese evaluering gestuur word.

“Die advokaat het my ingelig dat hulle tot die gevolgtrekking gekom het dit is nie normaal vir ʼn persoon om so ʼn oortreding te begaan deur sy eie persoonlike bankrekening te gebruik en rond te gaan na maatskappye om fondse in te samel nie. ʼn Normale persoon kan nie rondloop en vir miljoene of selfs duisende vir persoonlike gebruik vra nie,” het hy gesê.

Elvis Ramosebudi in die Johannesburg-landdroshof (28 April 2017). Foto: ANA

Landdros Vincent Ratshibvumo het aan Ramosebudi gevra of hy al ooit by ʼn psigiatriese instansie opgeneem is en hy het geantwoord hy kan nie onthou nie.

Brig. Hangwani Mulaudzi, woordvoerder van die Valke, het vroeër gesê die Valke het verskeie geheime operasies in Pretoria en Johannesburg uitgevoer wat uiteindelik tot Ramosebudi se inhegtenisneming gelei het. “Die verdagte en stigterslid van die Anti-State Capture Death Squad Alliance (ASCDSA) is in hegtenis geneem terwyl hy besig was om aan donateurs te verduidelik hoe die sluipmoord van staatskapingbegunstigdes deur geheime skerpskutters uitgevoer gaan word,” het hy gesê.

Mulaudzi het gesê Ramosebudi het glo befondsing van R140 miljoen gesoek om die plan uit te voer.

Masemola het gesê hy het die beweerde moordlys in sy besit en sal eers later die name op die lys bekendmaak nadat daar verdere ondersoek gedoen is. Volgens mediaberigte is pres. Jacob Zuma, lede van die omstrede Gupta-familie en Brian Molefe, voormalige hoof van Eskom, se name op die lys.

Mulaudzi het gesê dit het tydens die Valke se ondersoek aan die lig gekom dat ʼn tweede groep, die Anti-White Monopoly Capitalists Regime (AWMCG), glo ook donateurs gesoek het om senior regeringsbeamptes te laat vermoor.

Hy het gesê bewyse is gedurende ʼn soektog van Ramosebudi se huis gevind.

Lindi Mjonodwane, woordvoerder van die Nasionale Vervolgingsgesag (NVG), het gesê daar kan nog nie bevestig word of Ramosebudi al enige donasies ontvang het en of hy alleen gewerk het nie. “Die ondersoek duur nog voort, kom ons laat die proses toe om sy gang te gaan. Meer inligting sal aan die media en die publiek gegee word sodra dit beskikbaar is,” het sy gesê.

Die saak is tot 2 Mei uitgestel om Ramosebudi tyd te gee om regshulp te bekom. Hy bly in aanhouding tot dan.

Pres. Jacob Zuma tydens Donderdag se Vryheidsdagvieringe. Foto: Kopano Tlape/GCIS

Só meen dr. Frans Cronje, scenario-beplanner en hoof van die Suid-Afrikaanse Instituut vir Rasseverhoudings. “Moet asseblief nie geflous word deur die gedagte dat hierdie term nou eers die laaste paar maande ontstaan het nie. Enige iemand wat vertroud is met die ANC se 1960-model vir die Nasionale Demokratiese Revolusie, sal beslis nie verras wees oor wat RET behels nie. Dit is die kern van die ideologiese beleid wat die ANC dryf.”

Cronje het gesê hierdie ideologie is sosialisties en kommunisties van aard, wat beteken alle mag moet na die staat gesentraliseer word. Dit behels ook dat die staat beheer van die kapitalistiese ekonomie moet neem – en dit hoef nie noodwendig binne ʼn dag of twee gedoen te word nie. Hy meen ook die radikale populistiese uitsprake rondom RET kan die lede in die ANC wat tans in leierskapstryd gewikkel is, op takvlak binne die ANC bevorder.

President Jacob Zuma het Donderdag tydens ’n Vryheidsdagvieringgeleentheid in KwaZulu-Natal gepoog om te verduidelik wat presies RET behels nadat verskeie vrae oor die term ontstaan het.

In sy toespraak het hy gesê hoewel politieke vryheid al behaal is, ekonomiese vryheid nog talle Suid-Afrikaners ontwyk. “Laat ek herhaal: RET behels die fundamentele verandering in die struktuur, stelsels, instellings en patrone van die eienaarskap, bestuur en beheer van die ekonomie ten gunste van alle Suid-Afrikaners, veral die armes, waarvan die meeste swart en vroulik is.”

Zuma het verwys na die hoë vlakke van ongelykheid wat steeds in die samelewing heers deur te sê wit huishoudings verdien steeds vyf keer meer as swart huishoudings. Hy het ook gesê regstellendeaksiebeleide en die Wet op Gelyke Indiensneming laat transformasie in die werksplek steeds te stadig plaasvind.

Verder het hy beloof die ANC sal alle instrumente tot die regerende party se beskikking gebruik om die kwessies rondom grondbesit en grondhervorming aan te spreek. Zuma het gesê grondonteiening sonder vergoeding is hoog op die party se agenda.

Ekonomiese en politieke ontleders meen hierdie uitsprake van Zuma het eintlik niks nuuts oor RET gesê nie.

Dr. Eugene Brink, politieke ontleder van Solidariteit, en Dawie Roodt, hoofekonoom van die Efficient-groep, het albei gesê dit is maklik om saam te stem met dit wat Zuma gesê het oor die verandering wat benodig word rondom armoede en werkloosheid. “Werkloses moet bemagtig word, maar dit is die einde van sy uitsprake oor RET wat my diep bekommerd maak en wat dan boonop ʼn rassekleur bykry,” het Roodt gesê.

“ʼn Mens kan met die doelwitte saamstem, maar die middele wat die ANC wil gebruik om armoede aan te spreek, die ekonomie te laat groei en werkloosheid te verminder is net nie haalbaar nie. Hulle gaan dit ongelukkig nie met groter sosialisme regkry nie en ek glo dít is wat RET kortliks behels,” het Brink gesê.

Roodt meen ʼn mens kan maar net kyk na wat met die land onder Zuma se administrasie gebeur het om af te lei wat RET sou beteken. “Mag is meer en meer gesentraliseer en sekere individue is geweldig verryk. Staatinstellings soos Eskom, SAL, Prasa en die Valke is onder Zuma heeltemal vernietig. Ek verwag dat ons meer van dieselfde kan verwag wat net nog meer ondergrawing en ondermyning sal beteken.

“RET klink vir my na groter sosialistiese kommunistiese beleidsrigtings. Dit is die herverdeling van bates en ja, vir ʼn paar maande of jare gaan dit dalk goed met dié wat dit ontvang het, maar daarna sit jy met dieselfde of groter probleme.

“Zuma kan maar net na Venezuela en Zimbabwe gaan kyk om te sien hoe goed hierdie soort beleidsrigting vir die ekonomie werk. Venezuela se winkelrakke is leeg en Zimbabwe se werkloosheidsyfer is bykans 90%,” het Adam Jacobs, ʼn onafhanklike ekonoom, gesê.

“Om die ekonomie weer aan die groei te kry gaan ons ʼn vryer ekonomie, vry markte en investering nodig hê. Ongelukkig gaan niemand in jou land wil investeer as jy hulle nooi om te belê, maar aan die anderkant dood belas en hulle eiendomsreg wil wegneem nie. Ook nie as die kans bestaan dat hulle maatskappy genasionaliseer gaan word of hulle sommer net in die algemeen sleggesê word in die media nie,” het Brink bygevoeg.

Cronje meen ʼn mens kan ook maar net na lande soos Zimbabwe en Venezuela gaan kyk om te sien hoe ʼn regering teen sy ekonomie optree. “Die ANC se grootste probleme en teenstand kom uit die nuwe jong swart middelklas – hulle lei die protesbewegings, is aktiviste en die opposisie. Daar is ʼn groot aanduiding dat jou vlak van onderwys en toegang tot werksgeleenthede bepaal of jy vir die ANC sal stem of nie.

“Dus kan dit polities ten gunste van die ANC wees om ʼn ekonomiese agterstand te bewerkstelling. Kyk maar na pres. Robert Mugabe – hy het gebaat uit sy land se agteruitgang.”

Hy meen die land sal nie iets soos die swak ekonomiese groei gebruik om ʼn nuwe vyand te skep waarteen die regerende party mense wat arm is kan “beskerm” nie. “Hulle sal aanvoer dat die armes hulle net meer mag moet gee om hulle finaal te bevry van die vyande soos ‘witmonopoliekapitaal’ en dan sal dit weer beter gaan.

“RET kom al verskeie dekades en ons weet wat dit behels: Die staat sal al meer inmeng met individue en ondernemings se ekonomiese besluite. Die enigste vraagstuk is hoe vinnig die ANC dit kan laat gebeur en waar hulle die klem sal laat lê, maar daar behoort geen twyfel te wees oor waarheen hulle met RET wil beweeg nie.”

Jacobs het gesê Suid-Afrikaners moet onthou dat ʼn individue of onderneming gelikwideer kan word, maar ʼn land kan nie bankrot speel nie. “Mense vra altyd wat sal gebeur as die Suid-Afrika net aanhou om swak ekonomiese en politiek beleide te volg? Wel, landsburgers sal net verder verarm onder die swak beleid en die werkloosheidsyfer sal beslis nie daal nie.”

Argieffoto: Lorraine Claasen

Kapt. Appel Ernst, woordvoerder van die polisie, het gesê die werkers is omstreeks 17:30 deur drie gewapende mans oorval. “Die mans het vuurwapens op hulle gerig en op kontant aangedring.”

Volgens Ernst het die mans hierna lukraak op die werkers losgebrand. “’n 71-jarige man is in die maag en arm geskiet terwyl ’n 45-jarige man in die bolyf geskiet is. ’n 65-jarige vrou is in haar arm gewond. Die aanvallers het hierna op die vlug geslaan.”

Ernst het gesê die 45-jarige man se liggaam is ’n paar honderd meter van die huis gevind. “Die 71-jarige man is onderweg na die hospitaal oorlede.”

Twee verdagtes is intussen ’n paar uur ná die voorval in hegtenis geneem. “’n Pistool is in die verdagtes, wat in hul 20’s is, se besit gevind.” Ernst het gesê hulle is hoopvol dat nog inhegtenisnemings binnekort sal volg.

Pretorius tydens sy gradeplegtigheid in 2008. Foto: Verskaf

Riëtte van Schalkwyk, ’n woordvoerder van Boervin, ’n organisasie wat hom beywer vir die vrylating van “die Boerevolk se politieke gevangenes”, het gesê Pretorius het sy doktorsgraad in kerkgeskiedenis cum laude aan die Universiteit van Pretoria geslaag.

Volgens Van Schalkwyk het Pretorius in Maart reeds begin met ʼn aansoek vir ʼn gradeplegtigheidseremonie in die Zonderwater-gevangenis in Cullinan waar hy aangehou word. “Die seremonie is goedgekeur en bevestig deur meneer Tony Rametsi,  opvoedkundige beampte van Zonderwater, vir 25 April 2017.” Pretorius is nie toegelaat om die amptelike gradeplegtigheid by te woon wat op 6 April by die universiteit plaasgevind het nie.

Pretorius het glo Maandagoggend, die dag voor die gradeplegtigheid, net wéér al die reëlings gaan herbevestig toe hy glo meegedeel is dat die amptelike versoek wat hy gerig het, verlore geraak het. Pretorius moes dit herdruk en weer indien. “Die middag van 24 April om 14:30, toe Pretorius reeds in sy sel toegesluit is, is hy meegedeel dat die gradeplegtigheid uitgestel moet word. Die rede wat hulle aangevoer het, is dat dit nie goedkeur is nie omrede daar skielik nie aan al die vereistes vir die gradeplegtigheidseremonie voldoen is nie.”

Volgens Van Schalkwyk het die departement van korrektiewe dienste (DKD) toe eers ʼn brief van die universiteit versoek waarin daar toestemming verleen word dat Pretorius ʼn seremonie in die gevangenis mag hou.

“Pretorius kon toe niemand telefonies verwittig dat ʼn brief van die universiteit nodig is nie, omdat hy reeds in sy sel toegesluit was.” Volgens Van Schalkwyk het ’n werknemer van die gevangenis sonder Pretorius se medewete ’n verteenwoordiger van die universiteit se teologiefakulteit geskakel en in kennis gestel dat die gradeplegtigheid gekanselleer is.” Pretorius moet nou weer van vooraf aansoek doen om ʼn gradeplegtigheidseremonie te hou. Gaste wat van sover as Lichtenburg kom, is 8:00 die oggend van 25 April eers meegedeel dat die gradeplegtigheid gekanselleer is, nadat die familielede van die kansellasie te hore gekom het.”

Ofentse Morwane, ’n woordvoerder van die DKD, het by navraag aan Maroela Media gesê Pretorius se bewerings is onwaar en misleidend. Volgens hom was daar nooit so ’n aansoek nie.

“Die departement neem die betrokkenheid van oortreders in opvoedkundige programme baie ernstig op en werk nou saam met verskeie belanghebbendes in die onderwyssektor om te verseker dat oortreders wat studeer die nodige hulp kry om hul studies te voltooi,” het Morwane gesê.

Pretorius is in 2012 saam met sy twee broers, sy pa en 16 ander mans in die hooggeregshof in Pretoria aan hoogverraad skuldig bevind. Ná ’n verhoor van nagenoeg 10 jaar is Pretorius in Oktober 2013 tot 25 jaar tronkstraf gevonnis.

Volgens Van Schalkwyk het Pretorius in 2009 met sy doktorsgraad begin. Daar is glo in Oktober 2013, met vonnisoplegging van die Boeremagsaak, beveel dat sy rekenaar uit die gevangenis verwyder moet word. “Pretorius kon dus vir ʼn volle jaar nie met sy proefskrif voortgaan nie. Sedertdien het hy slegs uiters beperkte toegang tot sy rekenaar gehad, met geen internettoegang om aan sy proefskrif te werk nie. Met die sloerings en beperkings kon Pretorius sy finale mondelinge eksamen eers in September 2016 aflê. Die gevolg is dat Pretorius altesaam R30 000 uit sy sak moes betaal vir die ekstra jare se studiegeld.”

Pretorius het in 2008 sy meestersgraad in sistematiese teologie aan Unisa verwerf terwyl hy in Pretoria Sentraal-gevangenis aangehou is. “Daar is vir Pretorius ʼn gradeplegtigheidseremonie in die maksimumsekuriteitgevangenis gehou vir die verwerwing van die M-graad,” het Van Schalkwyk gesê.

Minister Ayanda Dlodlo. Foto: Siyabulela Duda/GCIS

Minister Ayanda Dlodlo het egter nie die moontlikheid dat ’n reddingsboei later nodig gaan wees uitgeskakel nie.

Volgens Dlodlo was die regering wel in gesprek met die openbare uitsaaier, maar is daar gefokus op finansiële kundigheid en kwessies soos menslike hulpbronne en arbeid.

Khanyisile Kweyama, voorsitter van die SAUK se interimraad, het vroeër dié week gesê die openbare uitsaaier is in ’n finansiële krisis en het ’n reddingsboei van “minstens” R1 miljard van die tesourie af nodig.

Dlodlo het egter gesê daar was nog geen gesprek oor ’n reddingsboei nie. “Indien die uitkoms van die ondersoeke wat tans aan die gang is egter ’n reddingsboei noodsaak, is dit ’n besluit wat geneem sal word.”

Volgens Dlodlo is geen van die interimraad se lede finansiële kenners nie en het die departement iemand in dié verband verskaf. Sy het gesê dit is vreemd dat die parlement nie daaraan gedink het om iemand met finansiële kennis in die raad aan te stel nie.

Die voorgestelde tussentydse raad vir die SAUK is verlede maand eenparig in die parlement goedgekeur. Die parlement se portefeuljekomitee oor kommunikasie het vyf name aanbeveel vir die tussentydse raad nadat die voormalige raad amptelik in die parlement ontbind is.

Die tussentydse raad is Krish Naidoo, ʼn voormalige SAUK-raadslid wat verlede jaar bedank het, Febe Potgieter-Gqubule, Suid-Afrika se ambassadeur by die Afrika-unie, Khanyisile Kweyama, voormalige uitvoerende hoof van Business Unity SA, Mathatha Tsedu, ʼn veteraanjoernalis en professor in mediastudie aan die Universiteit van die Witwatersrand en John Mattison, professor in mediastudie aan die Universiteit van Kaapstad.

Argieffoto

Brig. Leonard Hlathi, woordvoerder van die polisie, het gesê beamptes het omstreeks 18:30 inspeksie by die aanhoudingselle gedoen toe hulle deur drie verdagtes oorrompel is.

Volgens Hlathi het daar ’n struweling tussen die beamptes en verdagtes ontstaan en het die verdagtes die beamptes se vuurwapens probeer afneem. Een van die verdagtes in die proses geskiet. Sy liggaam is later langs die heining om die polisiestasie aangetref.

Die ander twee verdagtes, Themba Andries Nkosi (21) en Sibusiso Lusenga (25), kon daarin slaag om te ontsnap. Hulle is met een van die polisiebeamptes se amptelike vuurwapens vort.

Nkosi en Lusenga was in aanhouding op aanklagte van roof, ontvoering en aanranding. Volgens Hlathi is ’n ondersoek van stapel gestuur na die omstandighede rondom die ontsnapping.

Enigiemand wat weet waar Nkosi of Lusenga hulle bevind, word versoek om ao. Karel Mare te kontak by 082 798 0758 of Crime Stop by 08600 10111.

Die identikits van die verdagtes is deur die polisie uitgereik:

Christopher Panayiotou in die hof (19 April 2017) Foto: Raahil-Sain / ANA

Kapt. Kanna Swanepoel, die ondersoekbeampte, het getuig in die verhoor van Panayioutou en sy medebeskuldigdes Luthando Siyoni, Zolani Sibeko en Sinethembe Nemembe wat teregstaan vir die moord op Jayde in April 2015. Panayiotou word as die vermeende baasbrein agter die moord verhoor.

Adv. Terry Price, SC, Panayiotou se regsverteenwoordiger, wou tydens kruisondervraging by Swanepoel hoor hoe hy te werk gegaan het toestemming te gekry het dat Siyoni vir Panayiotou by ’n vulstasie kon ontmoet as deel van die lokval.

Die polisie het op 28 en 29 April 2015 telefoongesprekke tussen Siyoni en Panayiotou gefasiliteer. Swanepoel het getuig die doel van die telefoongesprekke was om Panayiotou te kry om homself by die moord te impliseer. Volgens Swanepoel het die plan egter nie gewerk nie en het hulle tou opgegooi.

Panayiotou het egter teruggebel en dit is toe dat die ontmoeting tussen die twee gereël is. “Het jy die direkteur van openbare vervolging gebel om toestemming te kry?” wou Price van Swanepoel weet.

“Ek dink so, ek sou nooit sonder toestemming voortgegaan het nie,” het hy geantwoord. Swanepoel het gesê hy kan nie onthou of hy die oproep gemaak het en of hy iemand opdrag gegee het om dit te doen nie.

Die hof het later gehoor Siyoni het doodsdreigemente ontvang terwyl hy in aanhouding was. Volgens Price het Swanepoel nie vir Sioyni of Panayiotou hul regte voorgehou nie.

“Christopher wou nie die boek teken nie. Wat moes ek doen, sy hand breek en hom dwing om te teken?” Volgens Price het die polisie nie vir Siyoni aangekla nie aangesien hulle geen bewyse teen Panayiotou het nie.

Volgens Swanpoel was die oproepe tussen Siyoni en Panayiotou nie sy idee nie, maar Siyoni se idee. “Hy wou nie pa staan vir iemand anders se dade nie.”

Die verhoor duur voort.

Lees alle vorige berigte oor die Panayiotou-saak op Maroela Media.

Christopher Panayiotou tydens ‘n vorige hofverskyning. Foto: ANA

Kapt. Kanna Swanepoel, die ondersoekbeampte, het getuig in die verhoor van Panayiotou en sy medebeskuldigdes Luthando Siyoni, Zolani Sibeko en Sinethemba Nemembe wat teregstaan vir die moord op Jayde in April 2015. Panayiotou word as die vermeende baasbrein agter die moord verhoor.

Adv. Terry Price, SC, Panayiotou se regsverteenwoordiger, het tydens kruisondervraging aan Swanepoel gesê hy het inligting ontvang dat die inhoud van Coutts se verklaring nie van haar af kom nie.

“Die verklaring bevat inligting wat Coutts nie gesê het nie en dit is hoekom sy geweier het om te teken. Jy het die verklaring saamgestel en vir haar gesê om te teken.”

Volgens Swanepoel was Coutts ongelukkig oor enkele besonderhede in die verklaring, maar het sy niks geteken sonder dat haar regsverteenwoordiger, Danie Gouws, nie teenwoordig was nie.

Price het egter volgehou dat Swanepoel sekere inligting in die verklaring bygewerk het en dat Coutts daarom geweier het om dit te teken.

Swanepoel het getuig dat Coutts weet sy mag Panayiotou nie in die gevangenis besoek nie, maar dat sy dit in elk geval doen.

“Maar hoekom het sy in die besoekersregister geskryf dat sy ʼn ander moordbeskuldigde, Jens Leunberg, besoek?” het Swanepoel gevra. Price het gesê die Panayiotou-familie staan Leunberg by aangesien sy familie in Duitsland woon.

Volgens Swanepoel het Coutts wel vir Panayiotou ook besoek al mag sy nie. Price het die besoeke egter regverdig deur te sê Coutts is in beheer van die Panayiotou-familie se besigheid.

Die verhoor gaan Dinsdag voort.

Lees alle vorige berigte oor die Panayiotou-saak op Maroela Media.

Foto: Netcare 911

Chris Botha, woordvoerder van Netcare 911, het gesê die ongeluk het sowat 60 km buite Kimberley in die rigting van Hopetown plaasgevind.

Volgens Botha het die twee seuns op die donkiekar geslaap toe hul ouers langs die pad gaan staan het om seker te maak die donkie is vas.

“’n Bus het teen die donkiekar gebots. Die trefslag van die botsing het veroorsaak dat die seuns etlike meters van die donkiekar geslinger is. Hulle is op die toneel dood verklaar.”

Volgens Botha is die donkie ook in die voorval dood. Hy het gesê die tweeling se ouers, die busbestuurder en insittendes in die bus is nie in die botsing beseer nie.
Die presiese omstandighede rondom die voorval word ondersoek.

Pres. Jacob Zuma. Argieffoto: Ntswe Mokoena, GCIS

Die wet is ʼn poging om geldwassery te bekamp en sal banke verplig om die finansiële sake van prominente mense te fynkam. Die wet maak onder meer voorsiening vir soektogte sonder ʼn lasbrief. Dit was glo een van die redes hoekom Zuma nie onmiddellik die wet bekragtig het nie aangesien hy van mening was dit kan moontlik op onregverdige wyse mense se reg op privaatheid skend.

Volgens ʼn verklaring van die presidensie is Zuma egter nou tevrede dat die wet die grondwetlike bekommernisse wat hy oor die lasbriewe geopper het, aanspreek.

LP’s van opposisiepartye maan Zuma al ʼn geruime tyd om die wysigingswetsontwerp onmiddellik te teken. Dit volg nadat die Nasionale Vergadering klein veranderings daaraan aangebring het omdat Zuma bekommerd was dat dit moontlik ongrondwetlik kan wees en dit toe deur alle partye aanvaar is.

Zuma is erg gekap oor sy hantering van die saak. Floyd Shivambu, EFF-LP, het gesê dit is duidelik dat die hele proses onnodig was en net daargestel is om Zuma se persoonlike bates te beskerm. “Dit is net omdat die Guptas gesê het die wet moenie geteken word nie,” het Shivambu gesê.

Nqabayomzi Kwankwa, UDM-LP, het verder gegaan en gesê Zuma het die wet vir ses maande op sy lessenaar laat lê om “al die geld in sy bankrekening rond te skuif”. “Dis loutere onsin, selfs al is hy die president. Jy is ʼn leier wat die plundering van openbare hulpbronne fasiliteer,” het hy Zuma toegesnou.

Mzwanele (Jimmy) Manyi, president van die Progressive Professionals Forum (PPF), het in Janaurie gesê die wysigingswetsontwerp is ’n komplot om die ANC “so bankrot soos die hel te maak” voor die nasionale verkiesing in 2019.

Manyi het die parlement se staande komitee oor finansies toegespreek oor dié teen-geldwassery-wetsontwerp en het gesê die wet sal ingespan word om ANC-skenkers te verneder en op die swartlys te plaas sodat die ANC bankrot kan raak.

Foto: Skermskoot/Google Maps

Die Phakisa-renbaan is tussen Welkom en Odendaalsrus. Volgens Werner Vermaak, woordvoerder van ER24, het paramedici die byeenkoms bygewoon om mediese bystand te verskaf.

“Die renmotorbestuurder het met sy renmotor teen ʼn ander renmotor gebots waarna sy motor omgeslaan en verskeie kere gerol het. Die man was in ʼn kritieke toestand en moes met meganiese toerusting uit die wrak verwyder word.”

Volgens Vermaak het die man ernstige kopbeserings en verskeie breuke opgedoen. Daar is onmiddellik noodbehandeling op hom toegepas voor hy na die Mediclinic Welkom gehaas is vir verdere mediese sorg.

Vermaak het gesê die man het ʼn paar uur ná sy aankoms by die hospitaal aan sy beserings beswyk.
Die presiese omstandighede rakende die voorval word ondersoek.

Historiese kunswerke wat deur betogers gebrand is. Foto: Verskaf

Belinda Bozzoli, die DA se skaduminister van hoër onderwys, het gesê die DA het dr. Max Price, visekanselier, en dr. Sipho Pityana, voorsitter van die universiteit se raad, skriftelik versoek om die verbod op nagenoeg 75 kunswerke onmiddellik op te hef.

Die universiteit het in September 2015 ʼn sogenaamde kunswerktaakspan aangestel nadat die beeld van Cecil John Rhodes maande vantevore verwyder is. Volgens die universiteit is die doel van die taakspan om ʼn oudit te doen van standbeelde en ander kunswerke op die kampus wat “koloniale onderdrukkers” erken of vier of wat aanstootlik of omstrede is. Volgens die taakspan het talle studente aangedui dat ʼn aantal kunswerke by die universiteit aanstootlik is weens die manier waarop dit swart mense uitbeeld.

Tydens die #FeesMustFall-betoging is talle kunswerke deur die betogers verwyder en aan die brand gesteek. Bozzoli het Price en Pityana versoek om bekend te maak watter 23 kunswerke deur betogende studente vernietig is en ook om ʼn lys beskikbaar te stel van die kunswerke wat tans nie meer uitgestal word nie.

Die kunswerke van verskeie toonaangewende kunstenaars is glo op die lys van items wat verwyder is, onder andere Breyten Breytenbach, Christo Coetzee, Steven Cohen, Mia Couvaras, Pieter Hugo, Vusi Khumalo, Lucky Sibiya, Pippa Skotnes, Irma Stern en Sue Williamson.

Breytenbach het reeds uitgevaar teen die universiteit en hul besluit om die kunswerke te verwyder as “fascisme” bestempel.

Volgens Bozzoli is die verbod op kunswerke dieselfde as om ʼn boek uit ʼn biblioteek te vat en dit te verbrand. “Die tipe optrede verhoed studente om krities met kuns en literatuur om te gaan.”

Bozzoli het die universiteit versoek om die kunswerke onmiddellik weer op hul “regmatige plekke” aan te bring.
Price het egter teruggekap en gesê beskuldigings dat die universiteit sensuur toepas en ingee tot die eise van ʼn klein radikale groep studente wys op ʼn gebrek aan begrip van die universiteit se transformasieproses.

Volgens Price is die verwydering van die kunswerke net tydelik. “Ons glo dat die kunswerke uiteindelik weer vertoon sal word sodra ʼn kuratoriese beleid ontwikkel is.”

Price het gesê van die kwessies rakende die kunswerke is die manier waarop swart mense uitgebeeld word, in kontras met die gebrek aan enigiets soortgelyks rakende die uitbeelding van wit mense.