Riaan Roux. Foto: Facebook

Riaan Roux (46), ʼn fotograaf van Klerksdorp in Noordwes, het in die plaaslike streekhof skuld erken nadat meer as 2 000 pornografiese foto’s van kinders in sy besit gevind is.

Roux het ʼn pleit- en vonnisooreenkoms met die staat aangegaan waarin hy erken hoe hy onder die gebruikernaam Daswolf die foto’s van die internet afgelaai en op ʼn hardeskyf gestoor het.

Volgens die inligting in die ooreenkoms het Roux se aksies vir die eerste keer in 2015 aan die lig gekom toe die polisie inligting van Interpol in Rusland ontvang het van ʼn moontlike verdagte in Suid-Afrika wat pornografiese foto’s en beeldmateriaal van kinders aflaai. Die IP-adres wat gebruik is om die pornografie mee af te laai, is met Roux verbind.

Roux se huis en fotografiese ateljee is deursoek en die polisie het op skootrekenaars, geheuestokkies, hardeskywe en selfone beslag gelê. Altesaam 2 391 foto’s van minderjarige kinders, wat kaal in speelareas en op strande afgeneem is, is gevind. Roux is uiteindelik in April verlede jaar op ʼn aanklag van die besit van kinderpornografie in hegtenis geneem.

In die pleitooreenkoms erken Roux hy het beplan om die foto’s af te laai en hy is nie deur iemand anders beïnvloed om dit te doen nie. “Ek aanvaar daar is geen verskoning vir my optrede nie,” het hy gesê.

Die staat het aangevoer dit is verswarend dat Roux ʼn professionele fotograaf is wat dikwels vertrou word om foto’s van kinders te neem tydens fotosessies of by skoolbyeenkomste. Die staat het ook aangevoer dat Roux die ervaring en toerusting het om foto’s te redigeer, wat “nie ʼn ongewone praktyk is vir mense wat kinderpornografie vervaardig, versprei en besit nie”. Roux het nie self die pornografiese foto’s wat in sy besit gevind is geneem nie.

Roux is ʼn boete van R5 000 of 18 maande tronkstraf opgelê, asook ʼn verdere drie jaar tronkstraf wat vir vyf jaar opgeskort is. Sy naam is in die nasionale register vir seksuele oortreders opgeneem en die hof het gelas dat hy onbevoeg is om ʼn vuurwapen te besit.

Roux is in 1990 op twee aanklagte van diefstal skuldig bevind en in 1994 op drie oortredings van die Wet op Plofstowwe. Hy is verloof en is die pa van twee minderjarige kinders. Die kinders is nie in sy sorg nie.

Foto: SAPD/Facebook

Twee mans en ʼn vrou is in hegtenis geneem nadat hulle glo ʼn 74-jarige pensioenaris in Port Shepstone ontvoer en probeer indoen het.

Kol. Thembeka Mbhele, provinsiale polisiewoordvoerder van KwaZulu-Natal, het gesê die voorval het Maandag in die dorp se sakekern plaasgevind.

“Die drie verdagtes het die pensionaris genader terwyl sy by ʼn kitsbank besig was om geld in te betaal. Die verdagtes het gemaak asof hulle speurders is wat sekere sake ondersoek en vir haar gesê om saam met hulle in hul voertuig, ʼn silwer Toyota Etios, te klim.”

Volgens Mbhele het die verdagtes saam met die vrou na haar huis in Umtwalume gegaan sodat sy haar geld kon kry voordat sy dit sou verloor. “Vandaar is die verdagtes met die vrou na ʼn winkelsentrum in Kingsway waar hulle daarin kon slaag om geld uit haar rekening te trek.”

Intussen is die Port Shepstone-polisie deur die vrou se familielede in kennis gestel dat die vrou saam met die verdagtes opgemerk is en dat sy nie met haar eie voertuig by die huis opgedaag het nie. Haar voertuig was opgespoor waar sy dit naby die kitsbank geparkeer het.

Die verdagtes het omstreeks 13:00 met die vrou by die kitsbank opgedaag, waarna hulle in hegtenis geneem is. Die mans is onderskeidelik 31 en 28 jaar oud, en die vrou 53 jaar oud.

Die polisie het die verdagtes se voertuig deursoek en op ʼn groot bedrag geld afgekom wat onder die sitplek weggesteek was. Daar was ook koeverte wat met opgevoude koerantpapier gevul was.

Die verdagtes moet binnekort in die Port Shepstone-landdroshof verskyn op aanklagte van bedrog, dat hulle hulself as polisiebeamptes voorgedoen het, ontvoering en die besit van gesteelde eiendom.

Skermskoot uit die video

Die restaurantgroep Spur het Woensdag onvoorwaardelik om verskoning gevra aan Lebohang Mabuya ná die voorval wat Sondag by die Texamo Spur by The Glen-winkelsentrum in Johannesburg plaasgevind het.

Pierre van Tonder, uitvoerende hoof van Spur, het aan Maroela Media gesê ʼn deeglike ondersoek van die kringtelevisiebeeldmateriaal op 19 Maart toon dat Mabuya se weergawe van die voorval akkuraat is.

In die video baklei ʼn man en ʼn vrou met mekaar nadat die man die vrou se seun glo daarvan beskuldig het dat hy sy kind geboelie het. Die vrou het egter aangevoer dit was die man se kind wat haar seun geboelie het.

Die man dreig daarna om die vrou te slaan waarna sy hom daarvan beskuldig daarvan dat hy haar ook boelie.

“Die beeldmateriaal toon duidelik dat die man die vrou se kind op ʼn aggressiewe manier gegryp het, en dié soort optrede is onaanvaarbaar,” het van Tonder gesê. Hy het gesê dit is nie duidelik of die man se kind wel geboelie is nie, maar selfs al sou dit die geval wees, was dit volgens Van Tonder onnodig om aggressief en beledigend te wees.

Van Tonder sê die restaurantgroep staan verder ook by sy besluit om die man by alle Spur-restaurante landwyd te verbied. “Fisieke aggressie teenoor ons klante, veral teenoor vroue en kinders, sal nie geduld word nie. As ʼn organisasie wil ons dit duidelik stel dat ons nie geweld teen vroue en kinders goedpraat nie, ongeag die omstandighede.”

Hy het ook amptelik om verskoning gevra vir die optrede van sy personeel. “Ons erken dat die personeel en bestuur van die winkel nie genoeg gedoen het om Mabuya by te staan nie. Ons het ons interne prosedures hersien om te verseker dat personeel beter toegerus is wanneer so iets weer gebeur.”

Van Tonder sê die restaurantgroep gaan binnekort Mabuya ontmoet om te verseker dat hul onvoorwaardelike verskoning aan haar oorgedra word. Hy het gesê daar sal ook berading aan Mabuya en haar kinders gebied word.

Hy egter gesê die restaurantgroep kon nog nie daarin slaag om die man in die hande te kry nie.

“Ons sou graag met hulle [albei partye] wil vergader omdat me. Mabuya reeds onvoorwaardelik om verskoning gevra het vir die kru-taal wat sy gebruik het. Ek sien geen rede waarom die man nie dieselfde sal wil doen nie. Ons wil versoening fasiliteer en vir die volgende geslag ʼn voorbeeld stel.”

Van Tonder sê Spur dra ook geen kennis daarvan dat die man se persoonlike besonderhede en dreigemente oor die man se veiligheid op sosiale media versprei word nie.

NEEM KENNIS: Maroela Media se redaksie kies om nie die video te publiseer nie weens die taalgebruik in die video en verskeie kinders wat in die video te sien is.

Dr. Magteld Smith. Foto: Verskaf

ʼn Dowe vrou van Bloemfontein moes vir die tweede keer in minder as ʼn jaar ʼn aanvaller afweer toe sy Woensdagoggend in haar motorhuis oorval is.

Dr. Magteld Smith, navorser in die departement otorinolaringologie (oor-neus-en-keelkunde) aan die Universiteit van die Vrystaat (UV), het dié oggend omstreeks 06:40 by haar huis in Brandwag in haar motor geklim om lughawe toe te ry om ʼn vlug na Kaapstad te haal.

Smith is doof en het ʼn kogleêre inplanting. “Ek en Poertsie, my gidshond, was reeds in die motor wat aangeskakel was, gereed om agteruit te ry terwyl die motorhuis se elektroniese deur oopgegaan het. Die volgende oomblik het die aanvaller by my oop motorvenster verskyn,” sê Smith.

Sy vertel dat sy altyd ʼn skokstok by haar in die motor hou of by haar dra wanneer sy gaan stap om haarself te verdedig. Sy het die skokstok gegryp en die aanvaller geskok dat hy op die vloer inmekaargesak het. “Ek het uit my voertuig geklim en het hom weer geskok en dalk nog ʼn keer, ek kan nie onthou nie. Daarna het ek hom uit my motorhuis uitgerol buite na die straat toe.”

Smith het haar motorhuis se deur toegemaak, die alarm geaktiveer en weggery. “Weens vorige traumatiese gebeure in my lewe is dit asof my brein ‘uitsny’ en my oorlewingsinstink skop in. Ek het nie eers geweet waarheen ek ry nie en het ompaaie gery. Die aanval ʼn paar maande gelede het kort-kort deur my gedagtes geflits,” sê sy.

Smith is in Julie verlede jaar by die Sewe Damme-bewaarea oorval, geslaan en verskeie kere met ʼn mes gesteek toe sy gaan stap het. Haar aanvaller het haar agter ʼn bos ingewag en toe sy met haar honde verbykom, het hy haar oorval en op die grond platgedruk. Hy het sy broek begin losmaak, maar Smith kon daarin slaag om op haar voete te kom en het haar selfoon in die veld as lokaas gegooi. Die aanvaller het gehardloop om die selfoon te kry en Smith en haar honde het gevlug. Niemand is nog in verband met hierdie aanval in hegtenis geneem nie.

Teen die tyd dat Smith Woensdagoggend by die lughawe aangekom het, het sy reeds haar vlug verpas. Boonop sou dit die eerste keer, ná jare se gesukkel, wees wat Smith toegelaat word om haar gidshond saam met haar op die vlug te neem. In die verlede moes Poertsie soos ander troeteldiere die vlug in ʼn hok meemaak.

“Die personeel by die lughawe was vol begrip oor die gebeure en het my en Poertsie op ʼn 19:00-vlug bespreek,” het Smith gesê. “Met my terugkoms by die huis was die krimineel weg.”

Sy het gesê sy het reeds maksimum veiligheidsmaatreëls by haar huis aangebring en hoop nou om binnekort ʼn meenthuis in ʼn veilige meenthuiskompleks te kry.

“Hier is maksimum sekuriteit by my woonplek, maar dit hou eenvoudig nie kriminele uit nie en dan word jy nog aan die einde van die maand verras met ʼn hoë rekening van die veiligheidsmaatskappy. Ek ervaar hierdie misdadigers as mense met ʼn professionele beroep en dit is om hul kriminele dade sonder vrees uit te voer. Niks keer hulle nie en hulle skrik vir niks en lag vir die gereg. Jy kan ook net soveel sekuriteit in plek hê,” sê sy.

Argieffoto

Die onlangse aankondiging dat ’n versonke vasteland in die oseaan oos van Australië ontdek is, en waarvan Nieu-Seeland die grootste deel is wat steeds kop bo water hou, haal steeds die nuus.

Die verskynsel staan as Zealandia bekend, maar het ook ’n paar alternatiewe name.

Die nuus volg kort op bevestiging dat Mauritius ook op ’n brokstuk van ’n vasteland (Mauritia) ontstaan het, en nie maar bloot ’n vulkaniese eiland is nie.

In 2013 het wetenskaplikes aangekondig dat hulle die oorblyfsels van ’n versonke vasteland sowat 1 500 km oos van Rio de Janeiro gevind het. Dit het gou die bynaam van die Brasiliaanse Atlantis gekry.

Hierdie vastelande het almal ontstaan en gesink miljoene jare voor die eerste mense die aarde bewandel het.

Nog ’n moontlike versonke vasteland wat nou gereeld in argeologie ter sprake kom, is Beringia. Dit is wel deur mense bewoon, en staan in die vakwetenskap bekend as die Beringia-stilstand.

Anders as wat aanvanklik verstaan is, was Beringia nie net ’n smallerige landbrug wat van Siberië na Alaska gestrek het toe die seevlak weens die laaste groot ystydperk baie gedaal het nie. Volgens die jongste beramings was dit ’n groot landmassa wat die tuiste van mens en dier geword het, en wat ook mettertyd tot die vestiging van die mens op die Amerikas gelei het.

Verlore vastelande hou vir die mens al duisende jare groot romantiek in. Die oudste legende is moontlik die bestaan van Atlantis lank voor Christus nadat Plato na die bestaan van hierdie wonderlike ryk met gevorderde tegnologie verwys het.

Nog een, maar meer onlangs, is die versonke vasteland van Mu. Die oorspronklike aanspraakmaker, Augustus le Plongeon, het die ligging van Mu in die 19de eeu in die Atlantiese Oseaan geplaas. Die gedagte is dat Mu eens ʼn hoogsbeskaafde vasteland was wat weggesink het met vlugtelinge wat vir die beskawings van die Mayas en Egiptenare gesorg het. Daar is egter oorweldigend méér bewyse dat die beskawings van die Ou Wêreld onafhanklik van dié van die Nuwe Wêreld ontwikkel het.

Later het James Churchward die 20ste-eeuse konsep ontwikkel dat Mu in werklikheid in die Stille Oseaan bestaan het.

In die 19de eeu het die konsep van nóg ’n versonke vasteland, Lemuria, ontstaan na aanleiding van die ooreenkomste in plantegroei en dierelewe in Madagaskar en Indië.

Hoewel die werklike versonke vastelande, uitgesonderd Beringia, weggesink het lank voor die mensdom bestaan het, hou die gedagte steeds ʼn bekoring in. Mu sou byvoorbeeld van 50 000 jaar gelede tot ongeveer 15 000 jaar geklede ’n florerende beskawing gehad het, en die vasteland is deur meer as 60 miljoen mense bewoon.

Zealandia, waarvan die kaart ten dele met dié van Mu oorvleuel, het egter miljoene jare gelede onder die golwe verdwyn.

Harde wetenskaplike feite oortuig nie almal nie. Daar sal altyd iets onverklaarbaar wees wat “net” deur onlangs versonke beskawings verklaar kan word. Die woord vir die Egiptiese songod, Ra, kom byvoorbeeld baie ooreen met ʼn woord vir dieselfde begrip op die Paaseilande.

So maak verskeie godsdienste en kultusse steeds gebruik van konsepte wat uit die versonke vastelande ontwikkel het.

Foto’s bied ʼn blik op die wêreld wat nie noodwendig in woorde beskryf kan word nie. Beleef al die nuusgebeure, een foto op ʼn slag.

Indiese skoolkinders van Nai Basti, ʼn dorpie naby Nieu-Delhi, tydens die ingebruikneming van ʼn nuwe waterfiltreertoring wat dié dorpie voortaan van skoon drinkwater sal voorsien. Foto: Manish Swarup, AP

Suid-Koreaanse en Amerikaanse vegvliegtuie Woensdag besig om deel te neem aan ʼn opleidingsoefening oor die Koreaanse skiereiland. Foto: AP

Afgaanse meisies besig om warm te bly op ʼn reënerige dag in Kaboel. As gevolg van gebrekkige dreinering word dié stad maklik oorstroom tydens swaar reënbuie. Foto: Rahmat Gul, AP

ʼn Konstruksiewerker in Nieu-Delhi vul sy waterbottel uit ʼn kleipot. Talle mense in Indië hou op dié manier ʼn koel drinkdingetjie byderhand, veral in die somermaande. Foto: Tsering Topgyal, AP

Sjef Mohammed-Faizul Haque beduie in die Londense restaurant Taste of India hoe om ʼn gerookte geur aan geregte te gee. Foto: Matt Dunham, AP

Argieffoto: Pixabay

Die polisie het ʼn beroep op motoriste in Centurion gedoen om versigtig te wees vir kapings op die R55, veral naby Olievenhoutbosch.

“Die Gautengse polisie waarsku motoriste om paraat te wees en nie rylopers op te laai nie,” het konst. Tumisang Moloto, polisiewoordvoerder, Woensdag gesê.

“Die waarskuwing volg nadat ʼn motoris in sy 40’s Sondag omstreeks 22:00 vir twee vroue stilgehou het wat gemaak het of hulle gestrand is. Hy is van sy wit Mercedes-Benz beroof waarna hy sy bewussyn verloor het.”

Die slagoffer het eers die volgende dag in die Akasia-hospitaal in die noorde van Pretoria sy bewussyn herwin. “Hy kan slegs onthou dat hy gestop het om die twee vroue op te laai.”

Die Olievenhoutbosch-polisie ondersoek ʼn saak van motorkaping. Niemand is nog in verband met die voorval in hegtenis geneem nie.

Grafika: Mnn.com

Die vakbond Solidariteit het Woensdag gesê dat werk, en nie “hardnekkige” rassewetgewing of grondhervorming nie, menseregte ten grondslag lê.

Volgens dr. Eugene Brink, politieke ontleder verbonde aan die Solidariteit Navorsingsinstituut, is regte sonder menswaardigheid nie werklik menseregte nie en is werk een van die vernaamste maniere om menswaardigheid aan mense te verleen.

“Die Pew-navorsingsinstituut se 2016-studie dui daarop dat Suid-Afrikaners se grootste rede tot kommer voor die deur van werkloosheid en misdaad gelê kan word en daarom moet dit ’n prioriteit wees om dringend werk te begin skep,” het Brink gesê.

Volgens Brink ry onverantwoordelike uitlatings deur politici en beleid oor grond egter werkskepping in die wiele omdat dit eiendomsreg in die gedrang bring en beleggers sodoende afskrik.

“Sowel die ANC as die EFF stel met die aanhoudende getokkel op grondhervorming strooipoppe op wat die aandag van die werklike probleme in die land, naamlik armoede en werkloosheid, aflei,” het Brink verduidelik.

Die regering se huidige stel beleidsrigtings gaan boonop nie daarin slaag om die werkloosheidsyfer van bo 27% te tem nie. “Die daarstel van sosialistiese beleid, beleidsonsekerheid en rassewetgewing moet gestaak word, terwyl die regerende party korrupsie in eie geledere moet vasvat sodat vertroue in die ekonomie herstel kan word en die sakesektor weer met vertroue kan belê.”

Brink wys daarop dat onderwys ’n sleutelrol hierin speel en daarom moet skole as platforms vir werk reggeruk word. “Ongelukkig sit ons in Suid-Afrika met die werklikheid dat sowat 80% van ons skole tans disfunksioneel is wat direk tot die werkloosheidskrisis bydra,” het Brink gesê.

“Meer mense wat werk, beteken ook minder mense wat van staatstoelaes afhanklik is, wat daartoe sal lei dat hulle hul selfseggenskap en waardigheid terugkry en daarmee saam sal dit ook ’n positiewe uitwerking op misdaad hê.”

Argieffoto: SAPD

Sewe beamptes is Woensdagmiddag beseer toe ʼn hysbak vier verdiepings ver by ʼn polisiestasie in Port-Elizabeth geval het.

Die voorval het by die hoofgebou van die Mount Road-polisiestasie plaasgevind en beamptes van die plaaslike misdaadrekordsentrum en misdaadintelligensie-eenheid was in die hysbak vasgekeer nadat dit geval het.

Nooddienste was op die toneel en reddingswerkers kon die deur suksesvol oopmaak.

Na wat verneem word, het die beamptes verskeie beserings opgedoen, waaronder beenbreuke en hoofbeserings, terwyl ander behandeling vir skok moes ontvang.

Die hysbak het verlede week glo probleme gegee en beamptes kon nie by hul kantore of woonkwartiere uitkom nie. Die onklaar hysbak is glo oor die naweek herstel.

Kol. Priscilla Naidu, polisiewoordvoerder, het Woensdag se voorval bevestig. “Ses vroue en een man is op die toneel gestabiliseer en na die St. Georges-hospitaal geneem vir behandeling.”

Die departement van openbare werke is van die voorval ingelig om ondersoek in te stel.

Argieffoto.

Verskeie aanvalle op regters of die regbank, waarvan die inbraak by regter Mogoeng Mogoeng se administratiewe kantore, het tot ernstige vrae gelei. Oor ’n wye front word gevra of dit nie ’n poging is om die regbank te intimideer nie, en of die staat dalk op die een of ander manier hieragter sit.

Die tydsberekening ná die howe ’n rits uitsprake teen die regering gelewer het, en die aantal aanvalle binne ’n kort rukkie laat die moontlikheid van toeval byna buite rekening.

Die feit dat drie mense so gou ná die inbraak aangekeer is, en ’n vierde geïdentifiseer is, sal moontlik daartoe bydra dat die publiek nie te lank sal hoef te wonder nie. Ongelukkig is die gesteelde rekenaars nog nie opgespoor nie. Is dit inderdaad ’n opgewarmde Watergate, dan gaan die Suid-Afrikaanse politiek baie gou voor ’n gans nuwe dinamika te staan kom. Die departement van staatsveiligheid ontken egter aandadigheid.

’n Ander moontlikheid is dat georganiseerde misdaad nou sulke afmetings aangeneem het dat byna geen teiken buite perke is nie. Die onlangse rooftog by die Internasionale Lughawe OR Tambo het kenmerke hiervan gedra. Ook daar is mense in hegtenis geneem.

Suid-Afrika kan nie toelaat dat regspraak in hierdie land deur intimidasie en ontvoerings, en selfs moord, ontspoor nie. Dit sou herinner aan ’n tyd toe die Mafia en die Rooi Brigades Italië se regbank gyselaar probeer neem het. Die Rooi Brigades het selfs sover gegaan om Aldo Mori, die eerste minister, te ontvoer en ná 55 dae te vermoor.

Dit bly belangrik om so gou moontlik agter die kap van die byl te kom. As die staat of groot misdaadsindikate hieragter sit, is dit eintlik lagwekkend dat daar, met so ’n groot bedreiging, nou al amper ’n week lank hewig debat gevoer word oor premier Helen Zille se twiet oor kolonialisme, veral teen die agtergrond dat daar skynbaar nog geen gevolge was nadat ’n ANC-LP tydens die debat oor plaasaanvalle uitgeroep het die boere moet lewend begrawe word nie.

Wat die regbank betref, of dit nou foute maak of nie, moet genoeg respek afdwing om die land op soveel fronte “aanmekaargelap te hou”. Nie alleen moet die misdaadprobleem sonder vrees aangepak word nie, dit moet ook (en te dikwels) die regering tot orde roep. Die reëlmaat waarmee die regering die Grondwet vertrap, is onaanvaarbaar en die howe verdien lof dat hulle verseker dat Suid-Afrika ’n land bly waar die oppergesag van die reg bly geld, en so rug styfmaak teen politici wat die land in ’n diktatuur van die meerderheid probeer omskep. Pres. Jacob Zuma het hom al erg bitterbek hieroor uitgelaat.

Sonder ’n onafhanklike regbank wat as beskermhere van die Grondwet optree, sal dit moeilik wees om die vlakke van persvryheid en vryheid van meningsuitdrukking te handhaaf, en die reg van nie-regeringsorganisasies om lede se belange te beskerm onmoontlik word.

Laat ons sommer gou gerusgestel word.

Paramedici laai ʼn beseerde persoon in ʼn ambulans buite die Britse parlement in Londen (22 Maart 2017). Foto: AP Photo/Matt Dunham

Niemand het nog verantwoordelikheid aanvaar vir die dodelike terreuraanval Woensdag by die Britse parlementsgebou in Londen nie.

Vyf mense is dood en minstens 40 ander beseer toe ʼn enkele aanvaller met ʼn motor in voetgangers op die Westminster-brug ingejaag het, voordat hy ʼn polisiebeampte binne die hekke van die parlement met ʼn mes doodgesteek het.

Tobias Ellwood, Britse adjunkminister van buitelandse sake wie se broer in 2002 in Bali in ʼn terreuraanval doodgemaak is, het vergeefs mond-tot-mond-asemhaling op die gewonde polisiebeampte toegepas. Net ʼn paar meter weg het die liggaam van die aanvaller gelê.

Theresa May, die Britse eerste minister, spreek die media buite 10 Downing Street in Londen toe (22 Maart 2017). Foto: AP Photo

Theresa May, die Verenigde Koninkryk se eerste minister, het die aanval as “siek” beskryf. Een van die vyf oorledenes is die aanvaller wat deur polisiebeamptes doodgeskiet is. Personeel en besoekers is nie toegelaat om die parlement in of uit te gaan terwyl polisiebeamptes die gebied gefynkam het vir nog verdagtes nie.

Drie van die voetgangers wat op die brug raakgery is, het ook gesterf. ʼn Dokter wat die beseerdes op die brug behandel het, het hul beserings as “rampspoedig” beskryf. Een van die beseerdes is uit die rivier gered. Drie polisiebeamptes, talle Franse tieners op ʼn skooluitstappie, twee Romeense toeriste en vyf Suid-Koreaanse toeriste is onder die beseerdes.

Die polisie het gesê die aanval word met terreur verbind, hoewel niemand nog verantwoordelikheid daarvoor aanvaar het nie.

Gewapende polisiebeamptes buite die Britse parlement in Londen (23 Maart 2017). Foto: AP Photo/Kirsty Wigglesworth

Mark Rowley, Scotland Yard se hoof van teen-terrorisme, het gesê Islamitiese ekstremisme is vermoedelik die motief vir die aanval. Hy het gesê owerhede glo hulle het reeds die aanvaller se identiteit vasgestel, maar kan dit nog nie bekendmaak terwyl die ondersoek aan die gang is nie.

Die bedreigingsvlak vir internasionale terreur in die VK was reeds as ernstig gestel, wat beteken ʼn kans vir ʼn aanval is hoogs waarskynlik. May het Woensdag buite 10 Downing Street gesê die vlak sal nie verander word nie. Sy het gesê die parlement sal vandag soos gewoonlik vergader.

“Londenaars en besoekers sal saam vorentoe beweeg, nie swik onder die terreur en nooit toelaat dat die stemme van haat en boosheid ons uitmekaar dryf nie,” het May gesê.

Vanuit die VSA het pres. Donald Trump sy medelye aan Londen uitgespreek en in Parys is die ligte van die Eiffel-toring verdoof in solidariteit met Londen.

Witrenosters (Argieffoto: tpsdave, Pixabay)

Francois Myburgh (26) van Witpoortjie in Johannesburg het Woensdag gesê hy beplan om tussen 1 Junie en 31 Julie vanjaar ʼn staptoer aan te pak om bewustheid rakende renosterstroping te skep.

Die staptoer sal 3 870 km wees en plekke soos Magaliespark, Kimberley, Sutherland, Kaapstad, Kareedouw en Ficksburg insluit en by die Krugerwildtuin eindig.

“Dit is my manier om die aandag te fokus op die renosters wat daagliks gestroop word. Dit is hartseer om te weet dat die swartrenoster van Wes-Afrika uitgewis is. As ons nie opstaan teen die stropers nie, sal daar nie renosters oor wees vir ons nageslagte om te sien nie. Dít is wat my bang maak.”

Myburgh poog om ongeveer R100 000 met die staptoer in te samel vir renosterbewaring en hoop dat mense hulle harte sal oopmaak vir hierdie saak.

“Ons wil graag vir Francois gelukwens. Dit is ʼn fantastiese inisiatief wat hy begin het. Ek sal graag vir Francois wil inskakel by die Rhino Army-projek sodat ons saam hierdie kosbare diere kan red,” het Muis Lombard, Magaliespark se oordbestuurder, gesê.

Myburgh het sy eerste en tweede staptogte van 100 km vir renosters in 2014 voltooi. Sy derde staptoer was in 2015.

Msimango en Jose in die hof. Foto: ANA

Given Msimango (20) en Bigboy Jose (37) het vlugtig in die hof verskyn nadat hulle Maandag in hegtenis geneem is. Msimango staan tereg op aanklagte van die besit van ongelisensieerde vuurwapens en ammunisie terwyl Jose teregstaan op aanklagte wat verband hou met die vervalste identiteitsdokumente wat glo in sy besit gevind is.

Volgens die klagstaat is twee ongelisensieerde vuurwapens en 36 rondes ammunisie in Msimango se besit gevind. Vier identiteitsdokumente is in Jose se besit gevind.

Lt.genl. Khomotso Phahlane, waarnemende polisiehoof, het Woensdagoggend aangekondig drie mense is in hegtenis geneem in verband met die rooftog Saterdag. Die derde verdagte is egter kort voor die hofverskyning vrygelaat aangesien daar glo nie genoeg bewyse is om hom by die misdaad te betrek nie. Die saak teen die ander twee mans is tot 30 Maart uitgestel wanneer hulle na verwagting om borgtog sal aansoek doen.

Sammy Mahlangu, regsverteenwoordiger vir Msimango en Jose, het buite die hof aan verslaggewers gesê sy kliënte kan nie aan die rooftog verbind word nie. “Daar is geen skootrekenaars in hul besit gevind nie.”

Maroela Media het vroeër berig minstens 15 rekenaars, wat sensitiewe inligting bevat, is uit ʼn kantoor in Midrand gesteel, wat onder meer menslikehulpbroninligting van regters en werkers van die kantoor van die hoofregter bevat.

Phahlane het tydens gister se mediakonferensie gesê die polisie is nou op soek na ene Nkosinathi Msimango, wie se naam opgeduik het tydens ondervraging van die ander verdagtes. Volgens Phahlane kan dié Msimango moontlik die polisie met meer inligting bystaan. Hy is glo die broer van Given Msimango.

Lees alle vorige berigte oor Mogoeng Mogoeng op Maroela Media.

Foto: Verskaf.

ʼn Gesin van Doornpoort in Pretoria het die afgelope naweek inbrekers in hul huis met sowat 40 sekondes gemis.

Ilse Lourens en haar man het Saterdag omstreeks 07:00 hul seuntjie by haar suster gaan aflaai vir die dag. Haar suster bly sowat 300 m van hulle af.

Lourens en haar man het die res van die oggend by ʼn spa deurgebring. “Op pad terug om my seuntjie te gaan haal (by my sussie) het ons verby ons huis gery. Ek het spesifiek gekyk dat alles reg lyk by die huis en alles was reg.”

Lourens het verduidelik hul seuntjie het aan die slaap geraak by haar suster se huis en dat hulle gewag het tot hy teen omstreeks 12:30 wakker geword het. “Ons wou dadelik ry, maar het eers ʼn rukkie by hulle gesit en gesels.”

Volgens Lourens het hulle om die blok gery op pad huis toe en nie daardie dag die kortpad gebruik nie. “Ons het nogal verby die motor gery wat hulle gebruik het.” Hulle het slegs ʼn week vantevore kringtelevisiekameras laat installeer. “Toe ons by die huis kom, het ek gesien die klein hekkie staan oop. My man het dadelik waargeneem dat die agterdeur oopstaan en ons het besef daar is ingebreek. My man is dadelik by die huis in en ek het die paniekknoppie gedruk. Die plaaslike GPF en Kilnerpark Sekuriteit was vinnig op die toneel.”

Lourens en haar man het die kringtelevisiebeeldmateriaal nagegaan. “’n Goue Corolla met die registrasienommer BY54YXGP het om 12:36 by die huis verbygery, teruggekom en stilgehou. Die motor het hierna weer weggery en toe weer teruggekom en om 12:45 se kant begin inbreek. Die een verdagte het die breekwerk gedoen en die ander persoon was in die voertuig met ʼn papier. Hy het eers die voordeur se veiligheidshek oopgebreek, maar kon nie die houtdeur oopbreek nie en het toe die agterdeur en veiligheidshek ook oopgebreek. Dit het presies twee minute gevat om in die huis te kom,” verduidelik Lourens.

“Hy het sitkamer toe gehardloop en die televisie, ʼn klankversterker en DVD-speler gevat, uitgehardloop en die televisie by die agterdeur gelos, teruggekom en direk na die hoofslaapkamer gehardloop en na my man se bedkassie gegaan. Hy het daar ʼn klein byl en boeie uitgehaal en ook probeer om die kamerastelsel uit te ruk, maar was gelukkig onsuksesvol.”

Volgens Lourens het die rowers toe in die voertuig geklim en weggery net om ʼn minuut later weer terug te keer om luidsprekers te steel. Die rowers het ook die afstandbeheerders van die lugverkoeling gevat en dit later weer in die asblik gegooi.

“Daar was nog twee bokse met luidsprekers in wat hulle nie gevat het nie. Dis asof hulle presies geweet het wat hulle moet vat en vir niks verder gekyk het nie,” het Lourens gesê.

“Hulle het geen ander kamers oopgemaak of enige ander laaie deursoek nie. Elke keer wat ʼn motor verbygery het, het hulle gemaak asof hulle waai om iemand se aandag in die huis te kry. Die manne het presies geweet waar is wat. Hulle het ook heeltyd met handskoene gewerk. Die een persoon moes die kameras opgemerk het toe hy in ons kamer ingekom het, want hy het ingehardloop, is dadelik weer uit, het sy hoed laat sak en weer ingekom. Nie dat dit hulle baie gepla het nie,” het Lourens gesê.

“Ons het hulle met 40 sekondes gemis. Hy het wel die klein byl in die huis gelos, maar die boeie gevat. Ek neem aan dis wat hulle wou gebruik as ons miskien sou terugkom en hulle was nog daar,” verduidelik Lourens.

Ao. Johan van Dyk, woordvoerder van die polisie, het bevestig ʼn saak van huisbraak en diefstal word ondersoek. “Ons gaan die beeldmateriaal by die klaers kry en dit gebruik om ʼn identikit saam te stel wat dan versprei sal word om te help om die verdagtes te probeer opspoor,” het van Dyk gesê.

Lourens het gesê sy is dankbaar hulle het nie by die huis opgedaag terwyl die rowers nog daar was nie. “Ons is maar skrikkerig dat hulle miskien sal terugkom.”

Die rowers het onder meer met ʼn televisie, tuisteaterstel, DVD-speler en die boeie gevlug. “Dis nie baie items nie, maar dis duursaam en net die idee dat hulle in jou huis was en weet wat daar aangaan, maak ʼn mens woedend.”

Polisiebeamptes op die toneel buite die Britse parlement in Londen (22 Maart 2017). Foto: Victoria Jones/PA via AP

Scotland Yard se hoof van teen-terrorisme het Donderdag bevestig sewe mense is in hegtenis geneem in verband met die dodelike terreuraanval gister by die Britse parlement in Londen.

Mark Rowley het gesê die sewe verdagtes is in hegtenis geneem nadat die polisie ʼn klopjag op ses persele in die sentrale gedeelte van Birmingham uitgevoer het.

Maroela Media het vroeër berig vyf mense is dood en minstens 40 ander beseer toe ʼn enkele aanvaller met ʼn motor in voetgangers op die Westminster-brug ingejaag het, voordat hy ʼn polisiebeampte binne die hekke van die parlement met ʼn mes doodgesteek het.

Die aanvaller is deur Britse polisiebeamptes doodgeskiet. Sewe van die beseerdes is in ʼn kritieke toestand.

Rowley het voorheen gesê die polisie het die identiteit van die aanvaller vasgestel, maar hy wou dit nog nie bekend maak nie. Hy het gesê Islamitiese ekstremisme word vermoed.

Lees alle vorige berigte oor die Londen-terreuraanval op Maroela Media.

Derik Olivier. Foto: Facebook

Derik is die seun van Geo en Daline Olivier van die plaas Brakdam buite Parys. Lelet Schoeman, Derik se tannie, het aan Maroela Media gesê die presiese omstandighede rakende die voorval is nog nie bekend nie.

“Derik het met ʼn pypkar gery. Die voertuig het vermoedelik gerol en bo-op hom beland.” Die voorval het op ʼn plaaspad in die omgewing tussen Parys en Koppies plaasgevind. Derik se ma en suster Menique (14) het op hom afgekom. Hy was reeds dood.

Schoeman het gesê ander berigte wat beweer Derik het met sy pa se bakkie gery en dat die ongeluk op die N1 plaasgevind het, is onwaar. Kapt. Levhani Hani, ʼn polisiewoordvoerder, het bevestig die ongeluk het op ʼn grondpad plaasgevind. “ʼn Saak van strafbare manslag word ondersoek,” het sy gesê.

Volgens Schoeman het sy ouers en sussie hom begin soek toe hy nie ʼn sekere tyd tuis was nie. “Sy ouers is so erg geskok, hulle kan omtrent nie praat nie. Derik was ʼn kranige sportman. Hy het geroei en krieket en rugby gespeel.”

Derik was ʼn gr. 11-leerder aan die Hoërskool Parys. “Hy was so ʼn ordentlike kind, baie stil en saggeaard. Hy het altyd gehelp en was sy ouers se regterhand op die plaas.” Derik sou in Oktober sy 17de verjaardag gevier het.

Derik se pa, Geo, was een van die boere wat onlangs gehelp het om ʼn groep kinders en onderwysers te red toe hulle bus in vloedwater buite Parys vasgekeer was.

ʼn Roudiens vir Derik word Maandag vanuit die NG kerk Parys-Oos gehou.

Spotprent deur Jerm (23 Maart 2017)

Sien alle vorige spotprente

Keri en Royce Young (Foto: Aylor Photography/ Facebook.)

Keri Young en haar man, Royce, het op 19 weke van swangerskap uitgevind dat hul ongebore baba se brein nie ontwikkel het nie.

“Sal ons haar organe kan skenk as ek haar die volle termyn dra?” het Keri Young oomblikke nadat sy die nuus ontvang het, gevra. Die egpaar het ook besef dat Eva, hul ongebore dogtertjie, wel lewe, hulle dogter is en verdien om haar pa en ma te ontmoet.

Royce het ʼn brief op Facebook geplaas waarin hy sy vrou prys vir haar dapperheid. Dié brief het harte oor die hele wêreld aangegryp en is al meer as 21 000 keer op Facebook gedeel.

“Hierdie hele proses was rof gewees, maar ek sê dit as iemand wat van die kantlyn af kyk. Keri is die een wat elke skop en elke draai voel. Sy word elke oomblik van die dag herinner dat sy ʼn baba dra wat gaan sterf,” skryf hy.

“Ek sal definitief iets wou verander as ek kon. Ek wil hê my dogter moet perfek wees. Ek wil hê sy moet kersies uitblaas op haar eerste verjaardag. Ek sal wil sien hoe haar selfoonrekening die hoogte inskiet as sy vir seuns boodskappe stuur. Ek wil op haar troudag saam met haar by die paadjie afstap, maar ek kan dit nie doen nie. Dit is die werklikheid en ek kan dit nie keer nie.”

Die baba sal op 7 Mei vanjaar haar opwagting maak. Deur Eva kan baie ander babas se lewe moontlik gered word.

Jacques Paynn (Foto: Verskaf)

ʼn Gesin van Capital Park in Pretoria vrees vir hul lewe nadat hulle talle doodsdreigemente gekry het sedert hul telefoonnommer en huisadres verkeerdelik as dié van die man in die sogenaamde Spur-voorval versprei is.

Jacque Paynn het hom Donderdag tot die burgerregte-organisasie AfriForum se trauma-eenheid gewend nadat hy en sy gesin in minder as 24 uur nagenoeg 500 oproepe en SMS’e gekry het wat dreig om die gesinslede se lewe te neem.

Paynn, wat in ʼn tuinwoonstel saam met sy vrou, 16-jarige dogter en ma woon, het Donderdag aan Maroela Media vertel die gesin is totaal geskok en oorbluf ná die voorval, en vrees dat rowers regtig sal toeslaan.

Hy sê die gesin het doodsdreigemente begin kry kort nadat hy Dinsdagaand op ʼn mediaberig op Facebook ‘die wit man verdedig het’.

“Toe ek Woensdagoggend wakker word en op Facebook gaan, het ek baie kennisgewings gehad. Ek het by nadere ondersoek gesien dat dit alles deur mense is wat op my kommentaar gereageer het. Die mense was woedend – hulle het my kop geëis,” sê hy.

ʼn Ander Facebook-gebruiker, Arthur Mcdonald Sibanyoni, het intussen ook Paynn se selfoonnommer en woonadres op sosiale media versprei. Sibanyoni het Paynn egter verkeerdelik geïdentifiseer as Nico Viljoen, die man wat glo in die Spur-voorval betrokke was.

Paynn sê sy selfoonnommer was wel op Facebook, maar dat hy onseker is waar die persoon sy huisadres in die hande gekry het.

“Dis tóé dat die oproepe begin instroom. Mense bel en SMS, dan sê hulle ons moet op die uitkyk wees, want hulle kom vir ons; hulle gaan ons vermoor. Hulle SMS en sê hulle gaan my vrou verkrag en haar dan doodmaak.

‘n Skermskoot van die kontakbesonderhede wat versprei word (Foto: Twitter)

“Ons weet nie wat om te doen nie. Ons kon Woensdag nie ʼn oog toemaak nie. Ons was kort-kort om die huis om seker te maak dat alles oukei is. My dogter moet skool toe gaan en sy is erg getraumatiseerd. Ons weet nie wanneer slaan hulle toe nie – en dit alles omdat die verkeerde kontakbesonderhede versprei word,” sê hy.

Paynn het intussen sy selnommer gedeaktiveer en verwyder nou ook sy profiele van sosiale media.

Nantes Kelder, hoof van AfriForum se trauma-eenheid, het Donderdag gesê die burgerregte-organisasie veroordeel dié dreigemente ten sterkste.

“Die belangrikste ding om in dié stadium te doen is om die veldbrand te probeer keer sodat niemand seerkry nie. Ons moet by die wortel van die voorval uitkom en vasstel wie die kontakbesonderhede versprei het. Maar die hoofprioriteit is om te verseker dat hierdie man en sy gesin veilig is,” sê hy.

Pierre van Tonder, uitvoerende hoof van die restaurantgroep, het Donderdag gesê Spur is nie bewus van die dreigemente en die verkeerdelike verspreiding van Paynn se kontakbesonderhede nie.

Hy sê egter die organisasie sal alles in sy vermoë doen om te keer dat die inligting verder versprei word.

Foto: Verskaf.

Twee mans het Woensdag in die Griekwastad-landdroshof in die Noord-Kaap verskyn in verband met die verkragting en roof van ’n 71-jarige vrou ná sy die naweek aangeval is.

Kapt. Sergio Kock, woordvoerder van die polisie, het aan Maroela Media gesê die polisie het omstreeks 17:30 Sondag  ʼn wenk van ʼn lid van die publiek gekry dat ʼn rooftog aan die gang is by die bejaarde vrou se huis.

“Die polisie het onmiddellik reageer en twee verdagtes, 21 en 18 jaar oud, op pad om te vlug van die toneel gevind, met ʼn skootrekenaar en televisie in hul besit,” het Kock gesê.

Die polisie het die bejaarde vrou gevind waar sy met toue aan haar bed vasgemaak is. Die polisie het haar onmiddellik vir mediese behandeling geneem. “Ons kan nie sover al die besonderhede van die voorval bekendmaak nie, omdat die ondersoek voortduur,” het Kock gesê.

Die verdagtes se saak is tot 28 Maart uitgestel, wanneer hulle na verwagting om regshulp aansoek sal doen.

Die ondersoek duur voort.