Argieffoto

Die Stad Johannesburg het Vrydag gesê hy gaan onwettige mynbedrywighede en die gevolglike watermisbruik en elektrisiteitsdiefstal in die westelike dele van die stad hokslaan.

Beamptes van organisasies soos Johannesburg Water, Johannesburg-metropolisie, City Power en die Johannesburgse padagentskap (JRA) het vandeesweek op Matholesville in Roodepoort toegeslaan, ʼn berugte onwettige mynbougebied aan die Wes-Rand.

Die beamptes is ondersteun deur lede van die Suid-Afrikaanse Polisiediens en Gauteng Verkeer om die onwettige bedrywighede te bekamp.

Alhoewel geen onwettige myners tydens die klopjag teenwoordig was nie, het beamptes van die Immigrasie-eenheid van die departement van binnelandse sake altesaam tien persone in hegtenis geneem wat die land onwettig betree het en hulle sal onmiddellik gedeporteer word.

Cassius MacKay, bestuurder van die JRA se infrastruktuurbeskermingseenheid, het gesê onwettige mynaktiwiteit mors groot hoeveelhede water, aangesien water 24 uur lank sonder ophou bly loop om die onwettig gemynde goud te prosesseer. MacKay het gesê die besoek aan die perseel is ʼn voorloper tot ʼn wetstoepassersoperasie wat sal plaasvind op ʼn datum wat nog bevestig moet word. “Ons besoek aan Matholesville in Desember het die omvang van die probleem aan die lig gebring, daarom die besoek om die kwessies van watermisbruik en elektrisiteitsdiefstal aan te roer.”

Hy het gesê die span is tevrede met die werk wat hulle Vrydag gedoen het. “Die lede van die gemeenskap is ook beïndruk. Dit is nie ʼn eenmalige operasie nie. Dit sal ʼn deurlopende proses wees. Ons sal gereeld terugkom totdat ons die verlangde resultate sien.”

Dit is die tweede keer dat die stad dié perseel besoek. Die eerste keer was in Desember toe beamptes bewus gemaak is van die impak van die watermisbruik en elektrisiteitsverbruik op die stad se verskaffingsnetwerk.

Daar is na raming 2 000 onwettige myners, ook bekend as zama zamas in Matholesville. Talle kom van lande soos Lesotho, Zimbabwe en Mosambiek.

Die beamptes het ʼn hele aantal “James Tables” vandeesweek gebreek, wat deur die myners gebruik word om die goud te prosesseer. Joburg Water het ook die waterverskaffing na ʼn aantal nabygeleë huise afgesny omdat hulle glo water verskaf aan die onwettige myners.

Argieffoto

Die NG Kerk het in sy nuusbrief, die Kerkbode, gesê die kerk is bekommerd oor die voorgestelde wetgewing waardeur die regering haatspraak en haatmisdaad wil bekamp.

“Die waardigheid, vryheid en gelykheid van individue moet beskerm word. Die NG Kerk is egter bekommerd oor die voorgestelde wetgewing waardeur die regering dit wil doen,” lui ʼn rubriek.

Die kabinet het in Oktober aangekondig die Wetsontwerp op die Voorkoming en Bestryding van Haatmisdade is goedgekeur vir openbare kommentaar. Die wetsontwerp, wat oorspronklik opgestel is om net voorsiening vir haatmisdade te maak, is later aangepas nadat verskeie voorvalle van haatspraak wyd opslae gemaak het op sosiale media.

Die publiek het nog tot Dinsdag, 31 Januarie, die geleentheid om kommentaar te lewer teen die voorgestelde wetsontwerp teen rassisme, wat daarop gerig is om haatmisdade en haatspraak te hanteer.

Dr. Gustav Claassen, algemene sekretaris van die NG Kerk, skryf in die rubriek “haatspraak” word in die konsepwet baie wyd omskryf. “’n Vae en wye definisie het die gevolg dat inbreuk gemaak word op ander regte soos vryheid van spraak wat maklik gebruik kan word om kritiek teenoor die regering en ander instellings te onderdruk,” het hy gesê. “Die kerk meen huidige wette teen “haatspraak” in Suid-Afrika behoort voldoende te wees, en bykomende wetgewing in hierdie verband lyk oormatig en oorbodig.”

Volgens Claassen het dié wetsontwerp die potensiaal om die hele geloofsgemeenskap van Suid-Afrika negatief te raak. “Terwyl dit die klaarblyklike bedoeling van die wetsontwerp is om rassisme en xenofobie te bekamp, kan die breë definisie van haatspraak ’n ernstige impak op vryheid van spraak hê, veral op vryheid van geloof. In dié opsig word die integriteit van die Grondwet in gedrang gebring,” het hy verduidelik.

Hy meen die vryheid van uitsprake deur die kerk oor omstrede sake met betrekking tot
geslag, seksualiteit, voortplanting, huwelik, genadedood, dissipline en straf, etiek en moraliteit, sal ook ernstig beperk word.

Die kerk is van voornemens om beswaar aan te teken teen die wetsontwerp. (Lees die volledige rubriek hier.)

Maroela Media het vroeër berig die vakbond Solidariteit verwerp ook die wetsontwerp teen rassisme omdat dit onvolledige beskerming aan minderhede bied teen mense in magsposisies wat hulself skuldig maak aan haatspraak. “Die wetsontwerp, soos hy nou daaruitsien, hanteer haatspraak en rassisme tussen landsburgers op ʼn horisontale vlak,” het Dirk Hermann, bestuurshoof van Solidariteit, gesê. “Ons probleem in Suid-Afrika is juis op die vertikale vlak waar politici, amptenare en parlementslede rasse-uitsprake maak, soos in die geval van Julius Malema. ʼn Wet soos hierdie moet ʼn Julius Malema tronk toe stuur. ʼn Wet soos hierdie moet sorg dra dat iemand soos Julius Malema sy rooi oorpak vir ʼn oranje oorpak verruil.”

Kallie Kriel, uitvoerende hoof van die burgerregteorganisasie AfriForum het gesê sy organisasie staan ook die wetsontwerp teen. “Binne hierdie konteks van dubbele standaarde rakende rassisme, behoort daar groot kommer by wit mense te heers dat die nuwe Wetsontwerp op die Voorkoming en Bestryding van Haatmisdade en Haatspraak net ʼn nóg groter stok is wat die regering soek om wit mense mee te slaan,” het hy gesê. “Veral noudat die Nasionale Vervolgingsgesag (NVG) met die bekookte klagtes teen min. Pravin Gordhan duidelik getoon het dat hulle polities gedienstig is aan Zuma en sy bondgenote, is dit hoogs waarskynlik dat die NVG ook nie sal huiwer om selektiewe vervolging toe te pas om gedienstig te wees aan die Zuma-regering se pogings om wit mense as die enigste ‘sondebokke’ uit te sonder nie.”

Die departement van justisie en grondwetlike ontwikkeling het in November 2016 aangekondig daar is besluit om, in belang van alle rolspelers en die publiek, die sperdatum vir die indiening van kommentaar op die wetsontwerp te verleng. Die publiek het nou tot 31 Januarie 2017 kans om hul insette na die departement te stuur. Die vorige sperdatum was 1 Desember 2016.

Die publiek kan beswaar aanteken teen die wetsontwerp deur ʼn e-pos te stuur aan T Ross by hatecrimes@justice.gov.za.

Die Christen-organisasie ForSA het in ʼn verklaring op sy webwerf die publiek genooi om hulle by die e-pos in te sluit by legal@forsa.org.za.

Lees alle vorige berigte oor die Wetsontwerp op die Voorkoming en Bestryding van Haatmisdade en Haatspraak op Maroela Media.

Argieffoto

Dave Muller van die plaaslike buurtwag, het aan Maroela Media bevestig sy was alleen by die huis op die plaas Rieftontein 532, ook bekend as die Hills & Dales-gebied, toe sy geluide in die huis gehoor het. “Sy het aanvanklik gedink dit is die honde, en het gaan ondersoek instel,” het hy gesê.

Muller verduidelik die aanvallers het deur die sinkplaatdak ingekom. Die dak het houtpanele aan die kant. “Ons vermoed hulle was nog nie in die huis nie, want een het uit die dak op haar geskiet en die ander deur die venster. Hulle het op haar begin skiet toe sy hulle raaksien.”

Die vrou is in haar kuit en voet getref. “Die koeël is deur die kuitspier en het in haar been tot stilstand gekom. Sy is daarvoor geopereer. Die voetwond is reeds op die toneel deur paramedici behandel.”

Die vrou kon alarm maak, maar as gevolg van die swaar weer die aand in die gebied, het dit ʼn ruk lank geneem voor sy met die buurtwag in kontak kon tree. “Ek het uiteindelik agt oproepe van haar gemis, al het my foon net een keer gelui,” het Muller verduidelik. Dit was die aand omstreeks middernag. “Ons het ook as gevolg van die slegte sein die aand gesukkel om met ander lede van die buurtwag in verbinding te tree.”

Volgens Muller was die Jukskeirivier in vloed en kon van die beamptes nie die rivier oorsteek om hulp te gaan verleen nie. “Een van ons beamptes, aan die ander kant van die rivier, het ligte op die huis geskyn sodat die aanvallers moes weet daar is hulp op pad.”

Weens die reën het die aanvallers egter spoorloos in die nag verdwyn.

Maroela Media wag op terugvoer van die polisie.

Mallemeule by Cresta-winkelsentrum (Foto word met vergunning op Maroela Media gepubliseer) Foto: Jacks Kruger,

Die mallemeule by Cresta-winkelsentrum in Randburg het Saterdag omgeval.

Jacks Kruger, ʼn fotograaf van Johannesburg wat die sentrum saam met sy sesjarige dogtertjie besoek het, het aan Maroela Media gesê hulle was juis op pad na die pretpark in die sentrum toe hy net mense hoor skree en gil het. “Een vrou het by die trappe afgehardloop en ek het ook gaan ondersoek instel,” het hy gesê.

Die mallemeule het omstreeks 10:30 omgeval. “Die skag het reg af gebreek. Vier kinders was op die mallemeule toe dit gebeur het, maar hulle het slegs geringe beserings opgedoen.”

Volgens Kruger het paramedici die kinders op die toneel ondersoek.

“Ons besoek die sentrum gereeld en my dogtertjie ry graag op die mallemeule. As ons ‘n paar minute vroeër daar was, dan was sy ook op die mallemeule.”

Cresta-winkelsentrum het Maroela Media versoek om ʼn e-pos te stuur vir verdere kommentaar. Maroela wag nog vir terugvoer van die sentrum.

Maroela wag ook vir terugvoer van die polisie.

Kruger het die foto’s met sy selfoon geneem en dit word met vergunning op Maroela Media gepubliseer:

Mallemeule by Cresta-winkelsentrum (Foto word met vergunning op Maroela Media gepubliseer) Foto: Jacks Kruger,

Die bestuur van Cresta-winkelsentrum in Randburg het Saterdag gesê ʼn ondersoek word van stapel gestuur ná ʼn mallemeule by die sentrum omgeval het.

“Die voorval het omstreeks 10:30 by Route 66 van die vermaakafdeling plaasgevind. Die mallemeule het in die middel van ʼn rit gebreek en met vier passasiers aan boord omgeval,” het Virginia Bester, algemene bestuurder van die sentrum, gesê.

“Die bestuur van die sentrum het binne minute reageer om onmiddellik bystand te lewer aan die vier kinders op die mallemeule en die families en klante wat in daardie stadium in die omgewing was,” het sy gesê. “Ons kan vol vertroue berig dat al vier kinders dadelik na die mediese afdeling gehaas is vir professionele ondersoek ná die voorval. Nie een van hulle het enige beserings opgedoen nie.”

Bester het gesê ʼn ondersoek is van stapel gestuur om die oorsaak te bepaal. “Ons het reeds kontak gemaak met die eienaar van Route 66, waar die voorval plaasgevind het en sal terugvoer gee sodra die ondersoek en veiligheidsassessering afgehandel is. Die veiligheid van ons klante is ʼn hoë prioriteit en van die grootste belang. Die gebied is onbepaald gesluit, hangende die ondersoek.”

Volgens haar het hulle ook met die kinders se ouers gesels en sal met hulle in kontak bly soos die ondersoek vorder.

Maroela Media het vroeër berig die fotograaf Jacks Kruger was met sy sesjarige dogter ook by die sentrum. Hulle was op pad na die mallemeule toe die voorval plaasgevind het. Lees meer.

Die sinkgat langs die R502 naby Stilfontein in Noordwes (Foto’s verskaf aan Maroela Media) Foto: Karen du Toit

ʼn Groot sinkgat het naby die R502 tussen Orkney en Potchefstroom in Noordwes ingesak. Dit volg ná ʼn sinkgat vroeër op die N12 tussen Klerksdorp en Potchefstroom ontstaan het.

Vusi Mona, woordvoerder van die Suid-Afrikaanse Nasionale Padagentskap (Sanral), het Vrydag in ʼn verklaring gesê ʼn gedeelte van die N12 word na verwagting vir tussen ses tot agt maande gesluit weens ʼn sinkgat in die gebied.

“ʼn Geotegniese ondersoek word gedoen om die dolomietstabiliteit in die gebied te toets asook verwante risiko’s in die baan in ʼn oostelike rigting na Stilfontein,” het hy gesê. “Die baan in ʼn westelike rigting sal na verwagting tussen ses tot agt maande gesluit word terwyl pype, elektriese en veseldrade herlei word. Geen herstelwerk kan begin voor dié dienste nie herlei is nie.”

Volgens Mona is dit moontlik dat die verkeer wel toegelaat kan word hangende die uitslag van die ondersoek met oppervlak-kruisings en ʼn breër skouer binne die N12-reserwe.

“Dié mediaan-kruisings sal waarskynlik tussen middel Februarie en vroeg Maart ingestel word, op die voorwaarde dat konvensionele konstruksiemetodes voldoende sal wees en dat geen spesiale geotegniese voorsorgmaatreëls vereis word nie.”

Mona het bygevoeg Sanral bedank padgebruikers vir hul begrip en doen ʼn beroep op motoriste om geduldig te wees terwyl dié tydelike maatreël in plek gestel word. “Ons kan julle verseker dat ons alles in ons vermoë doen om die proses so vinnig as moontlik af te handel en om die pad so vinnig as moontlik weer oop te maak.”

Alhoewel persone wat op dolomiet bly nie nodig is om angstig te wees nie, is dit altyd nodig om bedag te wees. “Water moet nie lank poel nie, lekkende pype moet dadelik reggemaak word, grondwater moet nie onbeheersd onttrek word nie en tekens van insakking moet dadelik ondersoek word.”

Mona het gesê die skuif van die dienste is buite Sanral se beheer, maar die situasie word bestuur in samewerking met die Dr Kenneth Kaunda-distriksmunisipaliteit.

Intussen het nog ʼn sinkgat ingeval op privaat grond langs die R502 tussen Orkney en Potchefstroom. Karen du Toit, ʼn leser van Maroela Media het gesê die sinkgat, naby Stilfontein, is baie naby aan die Buffelsmyn-ingang. Volgens haar lyk dit boonop of die gat verder begin insak.

Sy het aan Maroela Media gesê die pad word veral gebruik deur personeellede van die nabygeleë myne. Die stadsraad is glo besig om ʼn nuwe pad beskikbaar te maak vir dié werkers.

Maetu Kgaile, woordvoerder van die Matlosana-munisipaliteit, maan die publiek om uiters versigtig te wees, aangesien hulle verwag dat dié sinkgat moontlik groter gaan word.

Volgens berigte is dié sinkgat ongeveer 70 m by 30 m groot.

Maroela Media het vroeër ook berig oor ‘n groot sinkgat wat op ‘n plaas in die Noord-Kaap ingeval het. Lees meer.

Du Toit het Saterdagoggend die volgende foto’s geneem vanaf ‘n brug op die R502. Sy het die foto’s aan Maroela Media verskaf:

Argieffoto

Die Raad op Finansiële Dienste (FSB) het die publiek gemaan om versigtig te wees wanneer hulle sake doen met Marc PH Investments (Edms) Bpk, ʼn entiteit wat glo geld van niksvermoedende individue insamel.

Die organisasie het gesê Marc Ph Investments is nie gemagtig kragtens die Wet op Finansiële Advies- en Tussengangerdienste (Fais) nie, het die FSB in ʼn verklaring gesê.

Die FSB het inligting ontvang dat die maatskappy, wat deur Marcus Mpho Mokone besit word, lede van die publiek nader sodat hulle in die maatskappy kan belê.

“Beloftes word aan die beleggers gemaak dat hul geld vir ʼn maksimumperiode van drie weke belê sal word en dat die opbrengs by die belegging gevoeg sal word. Die maatskappy het egter versuim om die beleggers te betaal nadat die kontrakte verstryk het en het ʼn vervalste brief van die FSB aan die beleggers gestuur.”

In dié vervalste brief, gee die FSB glo opdrag aan Marc PH Investments dat hul beleggers klaringsfooie van minstens R2 500 aan die maatskappy moet oorbetaal voor hulle enige opbrengs sou ontvang. Daar is ook ʼn vervalste dokument van FNB aangeheg.

“Die FSB waarsku die publiek dat die organisasie nie enige betalings goedkeur wat beleggingstransaksies betref nie en sal nooit enige lid van die publiek vereis om ʼn ‘klaringsfooi’ te betaal nie. Die FSB is ook op geen manier verbind met Marc PH Investments of Marcus Mpho Mokone nie en die maatskappy is ook nie goedgekeur deur die FSB nie. Dit is ʼn vervalste brief.”

Die FSB maan klante weer wat van enige finansiële diens gebruik wil maak om voor die tyd met die FSB te bevestig of die persoon geregistreer is deur óf die tolvrye nommer 0800 110 443 te skakel of besoek die webwerf www.fsb.co.za.

Van die pote wat op die plaas in Lephalale gevind is (Foto: Heritage Protection Group)

ʼn 55-jarige sakeman is by Ring-Beult Steenbokpan-plaas in Lephalale (Ellisras) in hegtenis geneem in verband met die onwettige jag van beskermde wilde diere.

“Die polisie het inligting opgevolg dat minstens sewe renosters na bewering verlede jaar November doodgemaak is en van hul horings gestroop is,” het brig. Motlafela Mojapelo, woordvoerder van die polisie, gesê. “Die renosters is glo met vragmotors na die plaas gebring en afgeslag.”

Mojapelo het gesê die ondersoek sal bepaal waar die renosters vandaan kom.

Die polisie het ʼn lasbrief bekom en die plaas deursoek. Die Heritage Protection Group, die bedreigdespesieseenheid van die SAPD, die departement van omgewingsake en SANParke het saam toegeslaan op die plaas van die welgestelde sakeman.

“Beamptes het beslag gelê op sewe renostersterte, agt pote en vleis wat alles in ʼn yskas gebêre is. Daar is ook renostervelle op die plaas gevind,” het hy bygevoeg.

Volgens hom word inligting opgevolg dat ʼn helikopter op die plaas geland, die horings opgelaai en daarna weer vertrek het.

“Nog inhegtenisnemings word verwag. Die verdagte sal Maandag in die Lephalale-landdroshof verskyn.”

Enigiemand met meer inligting kan ao Van Heerden kontak by 082 414 2337.

Prinses Diana (Foto: Kensington-paleis)

ʼn Standbeeld vir Diana, prinses van Wallis, sal op die gronde van die Kensington-paleis opgerig word, op versoek van haar seuns, die hertog van Cambridge en prins Harry.

“Die prinse het ʼn komitee op die been gebring wat privaat geld sal insamel vir die standbeeld,” het die paleis in ʼn verklaring gesê. Die komitee sal ook ʼn beeldhouer voorstel en saam met Historic Royal Palaces werk wat betref die standbeeld se installasie in die openbare tuin by die paleis.

“Dit is nou 20 jaar ná ons ma se dood en die tyd is nou ryp om haar positiewe impak in Engeland en oor die wêreld heen te erken met ʼn permanente standbeeld,” het die hertog van Cambridge en prins Harry gesê. “Ons ma het so baie lewens aangeraak. Ons hoop die standbeeld sal diegene, wat Kensington-paleis besoek, die kans bied om terug te dink oor haar lewe en haar nalatenskap.”

Alhoewel werk op die standbeeld na verwagting binnekort sal begin, is dit nog nie duidelik wanneer dit gereed sal wees nie. “Ons is vol vertroue dat dit voor die einde van 2017 sal wees.”

Maroupi (Foto: Maroupi Weddings & Functions, Facebook)

ʼn 51-jarige man is Saterdagaand dood toe gewapende mans op ʼn trouvenue in Umhlali, KwaZulu-Natal, toegeslaan het.

Maroela Media verneem die voorval het by Maroupi Weddings & Functions plaasgevind.

Paul Herbst, woordvoerder van IPSS-paramedici, het gesê paramedici is omstreeks 21:00 na die toneel ontbied. “Die gaste het saam met die eienaar van die plaas gebraai toe die rowers toegeslaan het,” het hy gesê. “Vier van die gaste is vasgebind en aangerand.” Daar was nie ‘n troue ten tyde van die voorval nie.

Toe paramedici by die toneel aangekom het, het die eienaar langs die swembad gelê. “Hy is met ʼn hoëkalibervuurwapen in sy bors geskiet. Hy het ongelukkig reeds aan sy beserings beswyk.”

Die vier rowers het met klein, waardevolle items gevlug.

“Volgens ooggetuies was die rowers gewapen met ʼn haelgeweer, handwapen en ʼn knuppel.”

Maroela Media verneem ook die persoon wat die slagoffer geskiet het, het om verskoning gevra, wat blyk dat hy dalk nie vertroud is met die wapen nie. Die rowers het na die skietery in ‘n wegkomvoertuig gevlug.

Lt.kol. Thulani Zwane, woordvoerder van die polisie, het gesê die polisie ondersoek ‘n saak van moord. Niemand is nog in hegtenis geneem in verband met die voorval nie.

Chaz, ‘n lid van die polisie se honde-eenheid, in die water (Foto: SAPD)

Chaz, ʼn lid van die polisie se honde-eenheid, het die liggaam van ʼn drenkeling op ʼn diepte van 4 m in Inanda-dam in Hillcrest, KwaZulu-Natal, uitgewys.

Die man het Saterdag in die dam verdrink. “ʼn 33-jarige man het klere gewas in die dam,” het ʼn woordvoerder van die polisie in ʼn verklaring gesê. “Hy wou in die water afkoel toe hy in die moeilikheid beland en verdrink het.”

Die polisie doen ʼn geregtelike doodsondersoek.

Polisie-duikers van Durban se soek- en reddingsdiens, IPSS-paramedici, Pietermaritzburg se honde-eenheid en kapt. Wessels van waterpolisiëring het op die toneel reageer.

Herman Mashaba. Foto: Facebook/Democratic Alliance

Herman Mashaba, DA-burgemeester, het gesê ʼn nuwe, oop tenderstelsel vir die Stad Johannesburg sal bedrog en korrupsie hokslaan wat met geheime tenders gepaardgegaan het.

“Besluite oor die tenderproses was dekades lank geheim gehou, en het slegs die elite van die vorige administrasies en hul kaders bevoordeel, ten koste van dienslewering en die inwoners van die stad,” het Mashaba gesê.

ʼn Raadsvergadering het Donderdag die wysiging van die stad se verskaffingsbestuurbeleid goedgekeur en dit baan die weg vir ʼn openbare tenderstelsel. “ʼn Komitee sal vanaf Februarie die publiek direk toegang bied tot verrigtinge,” het hy bygevoeg. “Dié verrigtinge is ʼn noodsaaklike stap wanneer ʼn tender geassesseer word en daaroor beslis word op meriete en dan toegeken word aan die aansoeker wat die geskikste is vir die werk.”

Besonderhede oor die eerste vergadering van dié aard sal op die Stad Johannesburg se kennisgewingsborde en webwerf gepubliseer word. Ek moedig die lede van die publiek aan om van die geleentheid gebruik te maak en aktiewe deelnemers te word in die goeieregeringspraktyk wat nou in die stad toegepas word.

Die stad se jaarlikse begroting, wat ook by Donderdag se raadsvergadering voorgelê is, het die ouditeur-generaal se bevindings van wanadministrasie vir die 2015/2016-periode aangedui, met ʼn begroting van R52 miljard.

Die verslag het bevind dat 32 beamptes van die vorige ANC-administrasie versuim het om hul eie belange bekend te maak of dié van hul nabye familielede of vennote. Die beamptes het voordeel getrek uit stadskontrakte ter waarde van miljoene rande.

Die verslag het ook bevind dat 80 verskaffers se belangeverklarings ook vervals is.

“Die sake sal verder ondersoek word en dissiplinêre stappe sal gedoen word, gebaseer op die uitslag van die ondersoek. Dit werp die lig op die noodsaaklikheid om seker te maak dat ons ʼn oop, deursigtige en regverdige tenderproses het,” het Mashaba gesê.

Kennisgewing wat Prasa in treinstasies opgesit het

Willem Spence (52), ʼn treindrywer van die Passasierspooragentskap van Suid-Afrika (Prasa), het met stukke glas in sy oë na veiligheid gery nadat ʼn aanvaller die voorste venster van sy trein met ʼn baksteen stukkend geslaan het.

Sonja Carstens, woordvoerder van die United National Transport Union (Untu), het in ʼn verklaring gesê die voorval het plaasgevind toe Spence by Du Toit-treinstasie naby Stellenbosch in die Wes-Kaap aangekom het.

“Spence bestuur al die afgelope 27 jaar lank treine. Hy het stadig gery en het omstreeks 11:45 verby ʼn plakkerskamp langs die stasie gery toe hy die aanvaller voor hom op die spoor sien,” het sy verduidelik. “Die baksteen het sy venster gebreek. Stukke glas het in sy oë beland en hy is oor sy gesig en arms gesny. Hy het egter besluit om met sy beserings na Stellenbosch-stasie te ry toe hy nie enige polisiebeamptes of veiligheidswagte by Du Toit-stasie kon sien wat hom kon help nie. Sy trein was vol pendelaars.”

By Stellenbosch-stasie het polisiebeamptes en veiligheidswagte Spence gehelp. “Hy is na ʼn hospitaal geneem waar stukke glas uit sy oë verwyder is. Hy is vir ʼn week lank op siekteverlof geplaas waarna die dokter weer sy oë sal ondersoek,” het Carstens bygevoeg.

“Dit word lewensgevaarlik om ons treine te bestuur,” het Spence aan Steve Harris, algemene sekretaris van die vakbond, gesê. “Ons loop deur onder misdadigers wat weet ons is sagte teikens. As treindrywers kan ons nie meer op normale treinveiligheid en die veiligheid van ons passasiers fokus nie. Ons moet deurgaans op die uitkyk wees vir misdadigers.”

Spence het vantevore as ʼn treindrywer op die berugte sentrale lyn tussen Kaapstad en Khayelitsha gewerk, maar het Prasa se menslikhulpbronnedepartement versoek om ʼn oorplasing te reël na die “veilige” roete, nadat hy ʼn paar keer op die sentrale lyn aangeval is.

Volgens Harris is aanvalle op treinpersoneel nie meer beperk tot spesifieke roetes nie. “Untu het die afgelope drie maande verskeie voorvalle op verskeie roetes in die Wes-Kaap, KwaZulu-Natal en Gauteng aangemeld. Untu sal môre [Maandag] met ons regspan vergader en aansoek doen om ʼn dringende interdik om Prasa en die SAPD te dwing om treinbemanning en pendelaars op treine te beskerm,” het hy gesê.

“Die vakbond het al herhaaldelik gewaarsku dat dit ʼn oorlog is op die spoorlyne, maar dit wil voorkom of Prasa, die minister van vervoer en die Suid-Afrikaanse regering, eers nóg onskuldige belastingbetalers wil sien sterf voor hulle enigiets aan die situasie gaan doen. Die situasie is nou só erg, dat die enigste oplossing sal wees om die Suid-Afrikaanse Nasionale Weermag te ontplooi om ons spoorlyne te beveilig.”

Untu het bewyse dat Prasa kennisgewings in Desember 2015 by spoorwegstasies vertoon het waarin “toenemende voorvalle van aanrandings op personeel, insluitend kliëntediens, treinbemanning en veiligheidspersoneel ten sterkste veroordeel word”. Pendelaars word gedreig dat indien dié gedrag sou voortduur, treindienste opgeskort sal word. “Dit word nie gedoen nie,” het Harris verduidelik.

Untu en sy federasie, Fedusa, het verlede jaar op 12 November adjunkpresident Cyril Ramaphosa van die situasie ingelig en hom versoek om in te gryp en dié noodsaaklike nasionale bate te beskerm wat daagliks miljoene werkers na en van die werk vervoer. Ramaphosa het nog nie reageer nie.

Betogers buite John F Kennedy-lughawe in New York nadat twee Irakese reisigers verbied is om die VSA te betree (28 Januarie 2017) Foto: AP Photo/Craig Ruttle

ʼn Federale regter se noodbevel verbied tydelik die VSA om persone van lande te deporteer onder pres. Donald Trump se reisverbod. Die regter het gesê reisigers wat aangehou word, het ʼn sterk argument en hul wettige regte word misken.

Die departement van binnelandse veiligheid het vroeg Sondag ʼn verklaring uitgereik wat sê dat die uitspraak nie die algehele implementering van die Withuis-bevel sal beïnvloed nie, en dit raak slegs ʼn klein aantal reisigers wat deur veiligheidsprosedures ontwrig is toe hulle na die land wou terugkeer.

Die noodbevel is Saterdagaand deur distriksregter Ann Donnelly in New York uitgereik nadat prokureurs van die Amerikaanse Civil Liberties Union ʼn petisie by die hof ingedien het namens persone van sewe hoofsaaklik Moslem-lande wat by lughawens oor die land heen aangehou is toe die verbod in werking getree het.

Die regter se bevel spreek egter slegs ʼn gedeelte van Trump se bevel aan. Die skare het gejuig toe die regter se beslissing bekend gemaak is.

Die bevel verbied Amerikaanse grensbeamptes om enigiemand wat in die VSA aankom met ʼn geldige visum van Irak, Sirië, Iran, Soedan, Libië, Somalië en Jemen. Dit dek ook enigiemand wat ʼn goedgekeurde vlugtelingaansoek het.

Dit is nog nie duidelik hoe vinnig die regter se bevel persone kan beïnvloed wat in aanhouding is, of hoe dit ander raak wat op pad is na die VSA nie.

“Realisties weet ons nie eers of mense op vliegtuie toegelaat gaan word nie,” het ACLU-prokureur Lee Gelernt gesê.

Die departement van binnelandse veiligheid het egter gesê dit het geen invloed op Trump se uitvoerende verbod nie. “President Trump se uitvoerende bevel bly in plek. Verbode reis word steeds verbied en die Amerikaanse regering behou die reg om te enige tyd visums terug te trek indien dit nodig is vir nasionale veiligheid,” lui ʼn verklaring.

Onder Trump se bevel wil dit voorkom of ʼn onbekende getal Amerikaanse inwoners, wat in ander lande gebore is en nou buite Amerika reis, minstens 90 dae lank oorsee sal moet bly, selfs al het hulle permanenteverblyf-groenkaarte of ander visums. ʼn Beampte van die departement het egter Saterdagaand gesê niemand van die betrokke sewe lande met ʼn groenkaart is verbied om die VSA te betree nie.

Die beampte van die departement wat telefonies met verslaggewers gepraat het, het gesê 109 persone wat op vliegtuie was, is verbied om die VSA te betree en 173 persone is nie toegelaat om in ander lande op vliegtuie te klim nie.

Trump het gesê sy reisverbod is ʼn “noodsaaklike stap om radikale Islam-terroriste te verhoed om Amerika te betree”.

Trump se bevel het spesifiek Sirië uitgesonder met die mees aggressiewe verbod en persone van dié land word onbepaald verbied, insluitend diegene wat van die burgeroorlog wil wegvlug.

Die bevel kan egter nie enige aanvalle voorkom van Amerikaans-gebore ekstremiste wat reeds in Amerika is nie. Saoedi-Arabië, waar meeste van die 11 September-kapers vandaan kom, is ook nie by die verbod ingesluit nie.

Trump se reisverbod het tot talle betogings by verskeie van die land se internasionale lughawens gelei, insluitend John F Kennedy in New York en O’Hare in Chicago, asook fasiliteite in Minneapolis en Dallas-Fort Worth. Honderde persone het in San Francisco die strate buite die aankomssaal versper. Talle persone het ook by Portland, Oregon, betoog.

Twee van die eerste groep persone wat verbied is om die VSA te betree was Irakese met bande met die Amerikaanse weermag. Hameed Khalid Darweesh en Haider Sameer Abdulkhaleq Alshawi is deur immigrasiebeamptes aangehou toe hulle Vrydagaand by John F Kennedy-lughawe in New York geland het. Albei is Saterdagaand vrygelaat nadat hul prokureurs ingegryp het.

Diplomate van die sewe lande sal steeds in Amerika toegelaat word.

Argieffoto

ʼn 32-jarige vrou sterk aan in die hospitaal ná ʼn aanval op ʼn kleinhoewe Saterdagaand in Elandshoek net buite Rayton in Gauteng.

“Die vrou was alleen by die huis met haar nege maande oue baba en het omstreeks 20:50 sit en televisie kyk,” het konstabel Connie Moganedi, woordvoerder van die polisie, aan Maroela Media gesê. “Die deur was toe, maar nie gesluit nie, toe twee mans, vermoedelik middeljarig, die huis betree en ʼn vuurwapen op haar gerig het. Hulle het haar gedreig. Sy het probeer om om hulp te skree, maar is met die agterkant van die geweer geslaan en is aangesê om stil te bly.”

Volgens Moganedi het die vrou gesigbeserings opgedoen. Die vrou het harsingskudding opgedoen en haar wangbeen is moontlik beseer.

“Die aanvallers het ʼn selfoon en juwele gebuit, ʼn skoot afgevuur en van die toneel gevlug.”

Maroela Media verneem die twee aanvallers het in die rigting van Pumzile- informele nedersetting gevlug. “Niemand is nog in hegtenis geneem in verband met die voorval nie. Die polisie se ondersoek duur voort,” het Moganedi bygevoeg.

Moganedi het bevestig die baba is ongedeerd.

Lt.kol. Maqhawe Simon Dhladhla, Cullinan-stasiebevelvoerder, het die aanval ten sterkste veroordeel. Hy het die vrou besoek ná die aanval. “Geen steen sal onaangeraak bly om die gevoellose oortreders aan te keer nie en vergaderings met boere en inwoners sal deurlopend voortduur,” het hy gesê.

Hy moedig alle boere en plaasinwoners aan om saam met die polisie te werk om dié vreeslike voorvalle te voorkom en raai die gemeenskap aan om by die buurtwag of plaaslike gemeenskapspolisiëringsforums aan te sluit.

Stephan Harris (28) wat beseer is tydens ‘n onderonsie tussen inwoners in Bremerstraat, Pretoria (Best Care-paramedikus Xander Loubser het toestemming van Harris se gesin gekry om ‘n wasige foto van hom aan die media te verskaf vir publikasie.)

Minstens agt persone is beseer tydens ʼn onderonsie die afgelope naweek oor die oprig van nuwe plakkershuise langs Bremerstraat in Pretoria.

Frik van Wyk, DA-raadslid, het aan Maroela Media gesê die stadsraad het, sonder om die wyksraadslede of die plaaslike inwoners in kennis te stel, besluit om nuwe plakkershutte in die informele nedersetting op te rig. Daar is ʼn groep persone wat van Jeffsville- informele nedersetting, langs Atteridgeville, geskuif moes word nadat sinkgate in Jeffsville ingeval het.

“Die persone is eers in ʼn skoolsaal gehuisves, maar die eerste plakkershuise is toe Donderdagaand opgerig langs die bestaande informele nedersetting langs Bremerstraat,” het Van Wyk verduidelik.

Volgens hom was dit aanvanklik nie ʼn rassegeskil nie. “Nie die inwoners van die voorstad of die informele nedersetting is in kennis gestel van die ‘nuwe bure’ wat hulle sou kry nie en mense was veral besorg dat misdaad in die gebied sou toeneem indien nuwe huise in die gebied opgerig sou word.”

Van Wyk verduidelik hulle was Donderdag in ʼn raadsvergadering toe hulle van die verwikkelinge verneem het. “Ons kon egter nie die raadsvergadering dadelik verlaat nie, as gevolg van die koalisieregering met die EFF is dit nie duidelik wanneer ʼn stemmery in die vergadering sal plaasvind nie, en ons kan dus nie die saal verlaat tensy die vergadering verdaag het nie.”

Volgens hom was ʼn ANC-raadslid wel bewus van die oprig van die plakkershuise in die gebied.

Van Wyk sê hulle het met die burgemeester die LUR vir behuising in die raadsvergadering kontak gemaak en hulle versoek om die oprig van die plakkershuise op te skort. “Ons het vir hulle gevra ons wil net eers die situasie met die inwoners bespreek voor enige verdere stappe gedoen word of verdere plakkershuise opgerig word. Hulle het ons verseker dat hulle ʼn alternatief gekry het, maar dit was ʼn leuen.

“Tot ons onsteltenis het ons teen Vrydagoggend ontdek dat hulle nie ophou bou het aan die plakkershuise nie en die inwoners het al hoe nader beweeg aan die nuwe plakkershuise. Dit het baie spanning veroorsaak,” het Van Wyk verduidelik. “Teen die tyd wat ek die metropolisie kon ontbied was daar reeds ʼn klein oorloggie aan die gang. Die inwoners van die buurt en die informele nedersetting het toe reeds begin baklei.”

Hy sê hy het simpatie met die inwoners, want persone wat net tydelik in die oorspronklike informele nedersetting sou bly, is ses jaar later nog steeds daar. Volgens hom was die inwoners veral warm onder die kraag, omdat hulle voel hulle word mislei deur die regering.

Van Wyk het gesê een vrou is in hegtenis geneem nadat die polisie haar nie onder beheer kon kry nie. “Sy was baie emosioneel. Die polisie het haar gemaan om te kalmeer en gewaarsku dat hulle haar in hegtenis sou neem omdat sy besig is om verskeie wette te oortree, maar sy het nie bedaar nie. Hulle het haar daarna in hegtenis geneem.”

Hy het ook simpatie met die persone in die informele nedersetting. “Dis goeie mense wat daar bly. Dis die mense wat in ons huise en by ons vulstasies werk wat daar bly. Hulle versoek ons nou al ʼn geruime tyd om ligte aan te bring om misdaad in die aand te bekamp. Hulle was ook ontsteld oor die nuwe bure wat hulle skielik bygekry het, en besef ook dat dit ʼn nuwe kriminele element kan bring.”

Hy het bygevoeg die polisie het gesukkel om die inwoners onder bedwang te bring.

“Uiteindelik is daar tussen tien en elf nuwe plakkershuise opgerig.”

Xander Loubser van Best Care het aan Maroela Media gesê hulle het Vrydag agt persone behandel. Twee persone is vir skietwonde behandel. “Een persoon is in sy been geskiet en die tweede persoon is met ʼn rubberkoeël van die polisie geskiet,” het hy verduidelik. “Een voetganger is beseer toe ʼn taxi op hom afgejaag het. Dié voorval is nie afsonderlik van die geweld in die gebied nie. Verskeie persone is ook met bakstene aangeval.”

Een van die persone wat beseer is, is Stephan Harris (28) wat Vrydagaand na Kalafong-hospitaal geneem is nadat hy aangerand is. Harris is op asemhalingsondersteuning omdat hy longtrauma opgedoen het. “Vog wat uit sy oor kom, is ʼn aanduiding dat hy ernstige skedelfrakture opgedoen het,” het Loubser bygevoeg. Hy is steeds in ʼn ernstige toestand in die hospitaal.

Volgens Loubser het hulle Saterdag geen ongevalle gehad nie. “Die polisie het ʼn baie sterk teenwoordigheid in die gebied behou.”

Van Wyk was self ook Sondag in die gebied en het bevestig dat dit tans rustig is.

Maroela Media wag op terugvoer van die polisie.

Die Van Heerden-egpaar se gesteelde motor nadat hulle op hul plaas in Luckhoff in die Vrystaat aangeval is Foto: Verskaf

Twee persone, onderskeidelik 35 en 41 jaar oud, is Saterdagaand in Kimberley in die Noord-Kaap in hegtenis geneem in verband met ʼn plaasaanval in Luckhoff in die Vrystaat.

Maroela Media het vroeër berig Rudolf van Heerden (79) sy vrou, Aletta (75), is op 26 Januarie omstreeks 09:00 op die plaas Avondsrus deur twee verdagtes oorval.

“Die egpaar was besig met hul daaglikse take op die plaas toe Aletta na die huis teruggekeer het,” het sers. Thabo Litabe, woordvoerder van die polisie, gesê. “Sy het opgemerk iets is vreemd by die huis en toe sy ingaan, het een van die mans dadelik gedreig om haar keel met ʼn skerp voorwerp af te sny.”

Die tweede aanvaller het opgedaag en die slagoffer op die grond vasgedruk en haar met ʼn tou vasgebind.

“Hulle het daarna vir Rudolf gewag om huis toe te kom. Hulle het hom aangeval en baie ernstig met ʼn koevoet aangerand terwyl hulle die kluis se sleutels en geld geëis het,” het Litabe bygevoeg. “Hulle het al die geld uit die kluis, insluitend ʼn jaggeweeg, juwele en ander waardevolle items gesteel voor hulle met die Van Heerdens se voertuig gevlug het.”

Die egpaar kon hulself loswikkel en is dadelik na Luckhoff-polisiestasie waar ʼn saak van huisroof aangemeld is. “Die polisie van Luckhoff en nabygeleë polisiestasies in die Vrystaat en die Noord-Kaap, insluitend van die boere in die omgewing, is dadelik gemobiliseer op soek na die verdagtes.”

Die egpaar se voertuig is op die grens tussen die Noord-Kaap en die Vrystaat gevind, ongeveer 35 km buite Luckhoff, waar dit van die pad afgery het.

“Die twee mans is by ʼn huis in Rodepan in Kimberley in hegtenis geneem. Hulle het van die gesteelde eiendom in hul besit gehad,” het Litabe bygevoeg.

Lt.genl. Lebeoana Tsumane, Vrystaatse polisiekommissaris, het gesê die aankeer van die verdagtes binne so kort tydjie is ʼn teken dat, “as ons saam werk, kan niemand net kom doen wat hy wil en die vrug van sy misdaad geniet nie”. “Dit moet ʼn baie duidelike bewys wees dat ons nie enige misdaad sal duld nie, veral nie teenoor bejaardes nie.”

Lees alle vorige berigte oor die Luckhoff-plaasaanval op Maroela Media.

Brig. Ellen Emmanuel (Foto: SAPD)

Die land se beste polisiestasie is een van die toekennings wat Vrydag tydens ʼn glansryke seremonie in Sun City tydens die vierde nasionale uitnemendheidstoekennings oorhandig is.

Die Brits-polisiestasie in Noordwes het met dié gesogte titel weggestap. “Dit was spanwerk. Ek is baie trots op my span,” het stasiebevelvoerder brig. Ellen Emmanuel gesê.

Die sukses van die stasie is gewortel in die beamptes se houding wanneer hulle voor probleme te staan kom. “Dit is hoe jy na ʼn probleem kyk. Dit is of die glas half vol of half leeg is. Ons beleef verskeie uitdagings, maar ons kan talle hindernisse oorkom,” het sy gesê.

Sy het bygevoeg sy moedig polisiebeamptes aan om met idees vorendag te kom wat misdaad kan bestry en dit lei tot groter motivering onder beamptes by die stasie. Die stasie kon kontakmisdaad met 11% laat daal en ernstige misdaad het met 10% gedaal.

Die stasie is vroeër as die beste in Noordwes aangewys met 92,86% en het ʼn vyfstergradering ontvang. Polisiebeamptes by die stasie is baie gemotiveerd en gedissiplineerd. In die 2015/16 finansiële jaar is altesaam 3 304 persone deur Brits-polisiebeamptes in hegtenis geneem.

Speurderkonstabel Julius Nkgoeng (Foto: SAPD)

Speurderkonstabel Julius Nkgoeng van die Letlhabile-polisiestasie naby Brits in Noordwes het op sy beurt met twee toekennings weggestap. Hy is as die beste speurder van die jaar aangewys in die vlak 5-7-kategorie vir sy toewyding tot sy werk, wat verseker dat misdadigers suksesvol vervolg word en lang vonnisse ontvang.

“Ek is baie bly ek het gewen. Daar is geen geheim nie, dis alles net harde werk en om aandag te skenk aan die klein besonderhede. Soms gaan noodsaaklike besonderhede verlore as mens nie daaraan aandag skenk nie. Maak nie saak hoe klein dit is nie. Mens moet ook geduldig wees,” het hy gesê.

Hy het gesê wanneer ʼn misdaad ondersoek word, moet ʼn speurder al die prosedures volg wat hulle geleer het tydens hul opleiding. “Dis om al die basiese dinge reg te doen,” het hy bygevoeg.

Hy het sewe skuldigbevindings vir sewe verskillende sake in die 2015/16 finansiële jaar verseker. Die sake wat hy ondersoek het sluit moord, verkragting, roof, gewapende roof, ontvoering en opsetlike saakbeskadiging in. Hy het 34 ernstige misdade ondersoek en kon 32 daarvan oplos.

Hy is ook die ondersoekbeampte in die saak van ʼn skoolmeisie wat in Letlhabile ontvoer is en verkool is ná ʼn beweerde liefdesgeskil. Twee vroue wat in verband met die voorval in hegtenis geneem is, se saak duur voort in die Pretoriase hooggeregshof. Die saak hervat op 29 Mei. Cynthia Mosupi en Sharon Twala word beskuldig van die ontvoering van Boitumelo Dlamini uit haar skool op 18 Junie 2015. Mosupi het Dlamini daarvan beskuldig dat sy in ʼn verhouding is met haar ekskêrel. Daar is petrol oor Dlamini uitgegooi en sy is aan die brand gesteek.

Nkgoeng het ook ʼn gehoortoekenning ontvang nadat mense, wat die geleentheid bygewoon het, vir hom gestem het as die algehele wenner in die individuele kategorie.

Lt.kol. MI van Aardt Foto: SAPD

Lt.kol. MI van Aardt, gebaseer by die polisie se nasionale kantoor, het die toekenning ontvang as die beste speurder in die vlak 8-12-kategorie. Hy is die bevelvoerder van ʼn span wat moord- en geregtelike doodsondersoeke by die nasionale ondersoek-eenheid ondersoek.

Hy het onder andere ʼn saak afgehandel van ʼn vrou wat in Orange Farm, Johannesburg, vermoor is. Dit het byna ʼn jaar lank geduur voor die vrou uitgeken is, as gevolg van haar beserings. Haar ouderdom is deur antropologie en ʼn tandheelkundige ondersoek bepaal.

Van Aardt het ʼn bladsy op sosiale media geskep vir bystand om haar uit te ken. Dit het gelei tot die inhegtenisneming van ʼn verdagte in verband met haar moord.

Hy het ook bystand gelewer in die appèlsaak tussen die staat en Oscar Pistorius.

Sien al die toekennings hier.

Argieffoto

Een vermeende rower is dood en ʼn lid van die gemeenskap en ʼn polisiebeampte is geskiet tydens ʼn rooftog by ʼn internetkafee Saterdagaand in Nigel, Gauteng.

Ao Tommie Tomlinson, woordvoerder van die polisie, het aan Maroela Media gesê die mans het op die internetkafee in die sentrale besigheidsdistrik toegeslaan. “Die polisie het op die toneel gereageer en een van die vermeende rowers is doodgeskiet. ʼn Lid van die gemeenskap is ook geskiet.”

Hy kon nie bevestig of die lid van die gemeenskap ʼn lid van die plaaslike gemeenskapspolisiëringsforum is nie.

“Een van die polisiebeamptes is skrams in sy been getref. Ons het ook een verdagte in hegtenis geneem,” het Tomlinson bygevoeg. “Twee persone het van die toneel gevlug.”

Volgens Tomlinson het polisiebeamptes beslag gelê op ʼn groot bedrag kontant, ʼn rekenaarboks, ʼn kluis, en klomp selfone wat van die klante geroof is. “Die twee persone wat gevlug het, het waarskynlik baie min, indien enigiets, gebuit.”

Die verdagte wat in hegtenis geneem is, sal binnekort in die hof verskyn.

Wonderboom-lughawe (Foto: Gauteng.net)

ʼn Privaat vliegtuig het Sondagmiddag ʼn noodlanding gedoen by Wonderboom-lughawe in Pretoria.

ʼn Woordvoerder van die lughawe, wat op voorwaarde van anonimiteit met Maroela Media gepraat het, het bevestig niemand is in die voorval beseer nie.

Die vliegtuig het opgestyg en die vlieënier het dadelik weer geland toe hy besef iets het skeefgeloop. Dit is nog nie duidelik wat die probleem veroorsaak het nie.

Volgens die woordvoerder het die vliegtuig geringe skade opgedoen.