Sibreena Da Costa met Jayden. Foto: Facebook
Klein Jayden da Costa, die eenjarige seuntjie van Ellisras wat erge brandwonde opgedoen het toe sy ouerhuis in Ellisras in ’n brand verwoes is, het Woensdagaand per helikopter by ʼn Pretoriase hospitaal aangekom.
Sibreena da Costa, Jayden se ma, het Donderdag aan Maroela Media gesê ná ʼn baie spanningsvolle dag is Jayden Woensdag uiteindelik van die Makweng-hospitaal in Polokwane na die Muelmed-hospitaal in Pretoria oorgeplaas. “Ek weet nie eens hoe laat ons hier aangekom het nie, maar dit was eers die aand. Ek het al die pad saamgevlieg van Polokwane af en die vlug was binne ʼn halfuur verby,” het sy gesê.
Foto: Facebook
“Jayden het die vlug baie goed hanteer en die mediese span by Muelmed het gereed gestaan om hom te ontvang toe ons land.”
Sy het gesê Jayden is in die waakeenheid by die hospitaal opgeneem en dokters was besig om met hom te werk. “Ons sal eers later by hulle hoor presies wat sy mediese toestand is, maar tot dusver gaan dit tien keer beter. Sy toestand is nog baie ernstig, maar hy is stabiel. Hy is in baie goeie hande,” het Sibreena verlig gesê.
Die Hero Burn Foundation wat die familie sedert die brand bystaan, het gesê Jayden veg teen verskeie infeksies en ontvang sterk antibiotiese en kortisoonbehandeling.
Jayden het nie ʼn mediese fonds nie en die familie het ʼn trustfonds gestig om met sy mediese onkoste te help. Meer inligting kan hier verkry word.
