ANC Jeugliga-lid gee geboorte op bus

ʼn Oos-Kaapse afgevaardigde van die ANC Jeugliga (ANCYL) het Donderdag op pad na die party se nasionale verkiesingskonferensie op ʼn bus geboorte gegee aan haar baba.

Mvuzo Mxenge, ʼn streeksekretaresse van die ANCYL, het die voorval bevestig, maar wou geen verdere besonderhede verskaf nie. “In hierdie stadium is dit beter om die privaatheid van die nuwe ma te beskerm. Dit is ʼn sensitiewe saak en sal ook so hanteer word,” het sy gesê. “Al wat ek kan sê, is dat ons byna in Johannesburg was en die voorval het nie lank terug gebeur nie.”

Meer as 390 Oos-Kaapse afgevaardigdes het Woensdagmiddag vanaf agt punte regoor die provinsie vertrek. Die nuwe ma het deel gevorm van ʼn groep wat in Mthatha opgelaai is.

“Niemand was daarvan bewus dat sy binnekort moes kraam nie. As ons dit geweet het, sou ons haar gevra het om agter te bly,” het een van die afgevaardigdes wat op dieselfde bus was, gesê.