Skermskoot uit die video
Die private ruimtemaatskappy SpaceX het Vrydag suksesvol sy Falcon 9-vuurpyl op ʼn platform in die see geland, ná die suksesvolle lansering van die Dragon-vragtuig na die Internasionale Ruimtestasie.
Die Dragon is Vrydag om 16:43 EST vanaf Cape Canaveral in Florida gelanseer. Dié vlug sal noodsaaklike vrag by die Internasionale Ruimtestasie aflewer.
Ná die lansering, kon die maatskappy daarin slaag om die Falcon 9- hoofaanjaer-vuurpyl op die platform in die Atlantiese Oseaan te land.
Die landing is ʼn noodsaaklike mylpaal vir die SpaceX, aangesien dit bewys dat die maatskappy sy vuurpyle op soliede grond en in die oseaan kan land.
Die Dragon-lansering is die eerste sedert die voorval in Junie 2015, toe ʼn Falcon 9-vuurpyl met ʼn Dragon-vragtuig drie minute ná lansering ontplof het.
Die landing op die platform is SpaceX se tweede suksesvolle lopie. Die maatskappy het in Desember 2015 suksesvol die vuurpyl ongeveer 9,6 km van waar dit gelanseer is, regop geland. Vier vorige pogings was onsuksesvol.
SpaceX se uitvoerende hoof is die voormalige Suid-Afrikaner Elon Musk. Hy is ook die breinkrag agter Tesla, wat elektriese motors vervaardig.
Congrats to the @SpaceX team & @ElonMusk! Way to stick the landing & send #Dragon to @Space_Station. https://t.co/TCJCQljJBZ
— NASA (@NASA) April 8, 2016