ʼn Maatskappy wat aan die Gupta-familie behoort, het bevestig FNB het die maatskappy se bankrekeninge gesluit, kort nadat ʼn ander bank vroeër vandeesweek dieselfde gedoen het.
Oakbay Resources and Energy het Woensdag bevestig FNB het die rekeninge gesluit nadat Absa vroeër vandeesweek sy verbintenis met die maatskappy beëindig het. Dit is die nuutste in ʼn string reaksies teen Oakbay Resources te midde van bewerings dat die Gupta-familie ʼn invloed op pres. Jacob Zuma en die regering se sake het.
Nazeem Howa, direkteur van Oakbay Resources, het Woensdag in ʼn verklaring “hul teenstanders” uitgedaag om te bewys die maatskappy het iets verkeerd gedoen. Howa het gesê die maatskappy sal ʼn vergadering met Jacques Cilliers, hoof van FNB, reël om antwoorde te eis oor waarom Oakbay se bankrekeninge gesluit is.
Howa het bygevoeg die maatskappy is reeds besig om sy bankrekeninge na ‘n ander instansie te skuif. “Oakbay het geen rede vir FNB se besluit ontvang nie. Ons vind die tydsberekening van FNB se besluit verstommend, gegewe die feit dat Oakbay se rekeninge finansieel gesond is en ons al vir jare ʼn lojale en winsgewende kliënt is.”
Volgens Howa het Oakbay al meer as R10 miljard in Suid-Afrika belê en meer as 4 500 mense in diens geneem.
KPMG het Vrydag as Oakbay Resources se ouditeure bedank na die maatskappy vir meer as 15 jaar hul kliënt was.