Argieffoto: Mildred Oliphant
Mildred Oliphant, die minister van arbeid, het plaas- en bosbouwerkgewers Saterdag gewaarsku om te voldoen aan die minimumloonregulasies, selfs tydens die droogte.
Oliphant het gesê sy is in kennis gestel die meeste plaas- en bosbouwerkgewers voldoen nie aan die minimumloonregulasies, wat onlangs verhoog is, nie. Die grootste rede wat werkergewers glo hiervoor aanvoer, is die droogte wat boere tans raak.
“Een van die voorwaardes wat aan boere gestel is as hulle droogtehulp van die regering ontvang, is om seker te maak werkers behou hul werk tydens die droogte,” het Oliphant se kantoor in ʼn verklaring gesê.
“Die minister wil werkgewers waarsku teen hierdie oneerlike praktyk, want dit is ʼn klap in die gesig van die droogtehulp wat die regering aan hulle bied,” het die departement gesê.
Die departement het ʼn beroep op werkers gedoen om die departement of Kommissie vir Versoening, Bemiddeling en Arbitrasie in kennis te stel as hulle nie voldoende betaal word nie.
Die departement het verder gewaarsku meer inspeksies gaan op plase en bosbou-instellings gedoen word en werkgewers sal voor die hof gedaag word as hulle nie aan die minimumloonvereistes voldoen nie.