Argieffoto: Reint Dykema
Lt. Nqobile Gwala, woordvoerder van die polisie, het gesê die 49-jarige Richard Vickers is deur twee gewapende aanvallers oorval en doodgeskiet. “Twee 9 mm-doppies is op die toneel gevind. Niemand is nog in hegtenis geneem nie. ʼn Saak van moord word ondersoek,” het Gwala gesê. Die voorval het op die plaas Tipperary plaasgevind.
ʼn Boer, wat ʼn paar plase van Tipperary af woon en op die toneel was, het aan Maroela Media gesê Vickers en sy vrou het omstreeks 19:45 gesit en rugby kyk toe Vickers buite gaan rook het. “Hy moes in hulle vasgeloop het. Sy vrou het net gehoor hy praat met iemand en toe volg twee skote. Sy het opgestaan en naby die voordeur sy voete sien uitsteek. Die moordenaars het toe in die huis ingekom en geld en vuurwapen geëis.” Vickers is in die rug en skouer geskiet.
Volgens die boer was daar nie vuurwapens in Vickers se huis nie en het sy vrou vir hulle geld gegee voordat hulle gevlug het. “’n Jong man wat in ʼn huis naby Vickers se huis loseer het gehoor wat aangaan en uitgehardloop en op die aanvallers losgebrand.” Die jong man en Vickers se vrou is nie beseer nie.
Die boer het aan Maroela Media gesê Vickers se broer, wat ook in die omgewing boer, was ook op die toneel. Vickers het volgens die boer nie op die plaas waar hy gewoon het geboer nie, maar was by boerdery betrokke. “Daar is verlede week ook ʼn ou oom en tannie aangeval en van wapens en geld beroof. Hier vind nogal baie rooftogte plaas. Daar was nou twee plaasaanvalle ʼn week uitmekaar.”