Die plek op Tafelberg (links van Platteklip-ravyn) waar die vrou op 17 Maart 2016 ure lank aan haar valskermtou gehang het toe haar basissprong skeefgeloop het. Die kop in die agtergrond is Duiwelspiek (Foto: David Bruiners, AMS)
ʼn 31-jarige vrou is Donderdag van Tafelberg gered nadat sy ure aan ʼn tou moes hang toe haar sweefskermsprong skeefgeloop het.
“Die Wes-Kaapse nooddienstehelikopster is omstreeks 12:00 na die toneel ontbied,” het Vanessa Horn, woordvoerder van die Air Mercy-helikopterdiens, gesê. “Die vrou het ongeveer 09:00 die basissprong onderneem toe haar valskerm aan die rots vasgehaak het.”
Volgens Robert Daniels, woordvoerder van die departement, het die voorval links van Platteklip-ravyn plaasgevind.
Volgens Horn het die vrou ongeveer twee ure lank onderstebo aan ʼn rotslys aan een van die toue van haar valskerm gehang. Boonop het die winderige toestande begin vererger.
“Altesaam 10 reddingsbeamptes moes op die berg via die reddingshelikopter ontplooi word,” het Horn bygevoeg. Een van die reddingsbeamptes is ontplooi om die vrou se veiligheid op die berg te verseker terwyl ʼn toustelsel in plek gekry is om haar op te hys.
“Danksy wonderlike spanwerk is die vrou drie ure later tot bo-op die berg gehys waar die AMS-helikopter die pasiënt en reddingsbeampte van die berg gered het,” het sy verduidelik.
Die mediese span het die vrou ondersoek en sy het slegs ʼn geringe voetbesering opgedoen. “Sy het weggeloop van ʼn voorval wat baie maklik ʼn noodlottige ongeluk kon wees,” het Horn gesê.