Argieffoto ter illustrasie
Die Nasionale Persklub (NPC) het Woensdag bekend gemaak 2015 se nuusmaker van die jaar is die #FeesMustFall-veldtog.
Die Persklub kies jaarliks, sedert 1980, die nuusmaker of nuusgebeurlikheid wat die hooftrekke in plaaslike en internasionale media in die tydperk van ʼn jaar gedomineer het én die uitwerking daarvan.
Van die vorige nuusmakers sluit in: Renosterstropery, die Oscar Pistorius-verhoor, Charlize Theron wat die eerste Suid-Afrikaner was wat ʼn Oscar-toekenning gekry het vir haar rol in die fliek Monster, Thuli Madonsela, Jacob Zuma, Nelson Mandela en FW de Klerk. Die Persklub het beklemtoon die toekenning is op nuusdekking en -waarde gebaseer en nie noodwendig meriete nie.
“Ons ontvang nominasies en motiverings van ons landwye Persklub-lede, waarna ons uitvoerende komitee vergader en uit die nominasies ʼn nuusmaker kies,” het Jos Charle, die klub se voorsitter, in ʼn verklaring gesê.
“Die #FeesMustFall-veldtog het in 2015 nuushooftrekke oorheers en het ook ʼn groot uitwerking op die land gehad. Die komitee het eenstemmig besluit die veldtog is 2015 se nuusmaker. Daar is geen twyfel dat tersiêre onderig in Suid-Afrika nooit weer dieselfde gaan wees nie.”
Charle het gesê dit is veral die rol wat sosiale media in die veldtog gespeel het, wat veroorsaak het dat die veldtog alle mediaplatforms oorheers het. Dit het ook leiding gegee dat die #”Watookal”-MustFall wyd vir allerhande kwessies gebruik word.