Argieffoto: ER24
ʼn Sewejarige seun is Dinsdag deur ʼn hond aangeval toe hy saam met maats na ʼn winkel gestap het.
Chitra Bodasing, woordvoerder van ER24, het gesê die voorval het in New Germany, noord van Pinetown in KwaZulu-Natal, plaasgevind.
“Die seun was saam met maats by sy huis toe hulle besluit het om winkel toe te gaan,” het Bodasing gesê. “Die seun se ouer suster, vermoedelik 18 jaar oud, het die kinders vergesel.”
ʼn Hond het vermoedelik uit ʼn erf losgekom en die seun aangeval. Die hond het weggehardloop nadat die seun se suster en sy maats dit van hom afgetrek het.
Sy suster het hom huis toe gevat en hulp ontbied. Hy het ernstige bytwonde en krapmerke opgedoen en is met ʼn ambulans na ʼn nabygeleë hospitaal geneem vir mediese behandeling.
Die hond se ras is nie bekend nie.