Handelaar in hof vir ‘motordiefstal’

Die polisie in die Oos-Kaap het lede van die publiek wat motors by ʼn sekere motorhandelaar gekoop het, gewaarsku dat hulle dalk die motors sal moet teruggee nadat hy in hegtenis geneem is.

Kapt. Jackson Manatha, woordvoerder van die polisie, het gesê Kenny Kayle Mokoena (29) het na bewering nagenoeg 30 motors gekaap en aan mense oor die hele provinsie verkoop. Mokoena is in hegtenis geneem en voorlopig aangekla vir die diefstal van ses motors.

Volgens Manatha het Mokoena Dinsdag in die Butterworth-landdroshof verskyn. Die saak is tot 1 Maart uitgestel vir verdere ondersoek.

Mense wat by Mokoena ʼn voertuig gekoop het, word versoek om kapt. Mntunzima Nyengula by 082 779 7246 te bel.