Mmusi Maimane. Foto: DA
Mmusi Maimane het Donderdag gesê die Demokratiese Alliansie sal nie enige pogings om pres. Jacob Zuma se staatsrede volgende week te ontwrig, ondersteun nie.
Maimane het aan die Kaapstadse persklub gesê dit is onwaarskynlik dat Zuma ʼn duidelike plan sal uitstippel om die ekonomie te red of die res van die land se probleme aan te spreek, maar dit is belangrik om die parlement toe te laat om normaal te funksioneer sodat die uitvoerende raad aanspreeklik gehou kan word.
“Die toespraak sal waarskynlik nie enige lig werp op die ware stand van ons land nie, en geen duidelike plan om ons weer op koers te kry nie,” het hy gesê. “Ons kan eerder nóg aksieplanne, taakspanne en vae versekerings dat ons oop is vir besigheid, verwag. Dit is nietemin belangrik om te hoor wat die president volgende Donderdag te sê gaan hê. En dit is waarom die DA nie sal deelneem aan enige onwettige ontwrigting van die staatsrede nie.”
Maimane het gesê hulle sal toelaat dat die president praat, en dan dit wat hy gesê het, of nie gesê het nie, oordeel.