Paramedici by die baba. Foto: ER24
ʼn Pasgebore babaseun is Woensdag in ʼn stuk veld in Pietermaritzburg in KwaZulu-Natal gevind.
Volgens Chitra Bodasing, woordvoerder van ER24, het ʼn voetganger op die baba aan die onderkant van ʼn wal afgekom en die polisie ontbied. Die baba was met ʼn kombers toegegooi.
“Die baba was skaars ʼn paar ure oud en hy was koud. Hy het geen sigbare beserings gehad nie. Paramedici het dadelik begin om hom warm te maak.”
Die baba is na ʼn nabygeleë hospitaal geneem vir verdere behandeling en waarneming.
“Na wat vasgestel kon word, is die baba ʼn paar meter gelos van waar hy gebore is. Hy weeg net onder 3 kg.”
Die polisie ondersoek die voorval.