Boer op Vrystaat-plaas vermoor

Opvolg: Rouxville-plaasmoord: Twee vas

ʼn Boer is koelbloedig op sy plaas in die Rouxville-omgewing in die Vrystaat vermoor terwyl sy vrou in ʼn kritieke toestand in die hospitaal is.

Sers. Yanga Ngcukana, woordvoerder van die polisie, het gesê hulle vermoed die egpaar is deur die loop van Donderdagaand in hul plaashuis aangeval. “Die boer is in die kop en bors geskiet. Hy het aan sy skietwonde beswyk.”

Volgens Ngcukana het plaaswerkers Vrydag omstreeks 8:30 op die egpaar afgekom. Hulle hande en voete was vasgebind. “Die vrou is ook in die kop geskiet. Sy is in ʼn kritieke toestand na ʼn hospitaal geneem.” Die moordenaars het met die egpaar se wit Toyota Hilux-bakkie gevlug. Dit is nie duidelik of enigiets tydens die voorval gesteel is nie.

Ngcukana het ʼn beroep gedoen op lede van die publiek wat moontlik inligting het oor die voorval om met hul naaste polisiestasie in verbinding te tree. Niemand is nog in verband met die voorval in hegtenis geneem nie.