Argieffoto
ʼn 20-jarige man is tot 15 jaar tronkstraf in KwaZulu-Natal gevonnis nadat hy ʼn 15-jarige meisie voor haar groep vriende verkrag het.
“Die meisie het op 4 Desember 2014 saam met ander meisies van ʼn tradisionele seremonie in Mhlathuzane teruggekeer toe die man haar langs Sesabani-rivier van die groep weggeneem het,” het kol. Jay Naicker, woordvoerder van die polisie, gesê. “Hy het haar voor die hele groep verkrag.”
ʼn Saak van verkragting is die volgende dag by Eshowe-polisiestasie aanhangig gemaak.
Die meisie het berading ontvang en is vir ʼn mediese ondersoek gestuur.
“Die man, Mandiseni Sikhakhane, is in hegtenis geneem en was regdeur sy hofsaak in aanhouding. Hy is Woensdag tot 15 jaar tronkstraf gevonnis,” het Naicker bygevoeg.