Argieffoto
Robert McKenzie, woordvoerder van die KwaZulu-Natalse nooddienste, het gesê die seuntjie en dogtertjie het saam met twee ander kleuters in die ongebruikte motor in Clermont gespeel toe hulle daarin vasgekeer geraak het.
Volgens McKenzie is dit nog nie duidelik wat gebeur het dat die vier kinders nie uit die motor kon kom nie. Die temperatuur in Durban was Dinsdag meer as 31 °C. McKenzie wou nie bespiegel oor die oorsaak van die twee kinders se dood nie, maar dit is waarskynlik dat hulle of ontwater of versmoor het, aangesien die motor se vensters toe was.
“Daar word beweer dat inwoners die kinders in die motor gesien het en hulle uit die warm voertuig gehaal en met hulle na die plaaslike gesondheidsentrum gejaag het,” het hy gesê. “Paramedici is ontbied, maar daar kon niks vir twee van die kleuters gedoen word nie. Die ander twee is na ʼn provinsiale hospitaal gehaas.”
McKenzie het gesê hy is nie seker of die kinders verwant is nie. Die polisie ondersoek die voorval.