Egpaar wreed op plaas aangerand; man dood

ʼn Bejaarde man is dood en sy vrou ernstig beseer nadat hulle op hul plaas naby Dirkiesdorp in Mpumalanga oorval en erg aangerand is.

Sers. Gerald Sedibe, woordvoerder van die polisie, het aan Maroela Media gesê Johannes van Zyl (84) se liggaam is omstreeks 16:30 in die badkamer van die huis aangetref. Hy het ernstige kopwonde gehad nadat hy vermoedelik met krukke geslaan is.

Sy vrou, Charlotte (55), het die aanval oorleef, maar is ernstig beseer. Sy is na ʼn nabygeleë hospitaal gehaas.

“’n Werknemer van die egpaar, ʼn Swazilandse burger, is in verband met die aanval in hegtenis geneem,” het Sedibe gesê. “Die motief vir die moord is nog nie bekend nie en vorm deel van die polisie se ondersoek.”