Jannie Stander. Foto: Facebook
Sers. Tshepiso Mashale, woordvoerder van die polisie, het aan Maroela Media gesê vier gewapende rowers het omstreeks 21:45 ʼn huis in Muldersdrift binnegekom waar ʼn man (47) en sy vrou (32) in die woonkamer gesit het.
“Toe die man hulle sien, het hy opgespring en is in die bolyf geskiet. Hy is op die toneel dood,” het Mashale gesê. Die rowers het op die vlug geslaan met die vrou se trouring, selfone, ʼn skootrekenaar en ʼn onbekende bedrag kontant. Die vrou is ongedeerd.
Krugersdorp Voice het die man intussen as Jannie Stander, eienaar van die Syringa MX Park in Muldersdrift, geïdentifiseer.
Terra Topia Dirt Bike-klub het op hul Facebook-blad hul medelye aan Stander se familie en vriende betuig en gesê sy dood is ʼn enorme verlies vir veldrenne in Suid-Afrika.