Argieffoto
ʼn Groot hoeveelheid van die hoendervleis, ter waarde van R128 miljoen, wat Zimbabwe verlede jaar van Suid-Afrika ingevoer het, is waarskynlik voorraad wat verval het.
Statistieke wat deur die Suid-Afrikaanse Inkomstediens (SAID) uitgereik is, maar nie in Harare berig is nie, het aangetoon dat dié uitvoer tussen Januarie en September 2015 “grotendeels onwettig” was.
Solomon Zawe, woordvoerder van die Zimbabwiese pluimvee-vereniging (ZPA), het aan The Source, ʼn nuusbron in Harare, gesê volgens SAID se data word daar gemiddeld 196 ton hoender maandeliks deur Zimbabwe ingevoer. “Dit verteenwoordig dus 8% van ons voormalige braaihoendermark en het ʼn reuse-invloed op ons bedryf.”
Zawe het bygevoeg plaaslike produsente word ook nadelig geraak deur goedkoop invoerprodukte van Brasilië.