Vrou oorval, verkrag op Tzaneen-plaas

Die polisie is warm op die spoor van twee gewapende rowers wat Woensdagoggend op ʼn plaas buite Tzaneen ingebreek en die huishulp oorval en verkrag het.

Marius Jacobs van Watchdog Tzaneen het aan Maroela Media gesê die rowers het omstreeks 09:00 toegang tot die plaas verkry deur die elektriese heining te knip. “So net na 09:00 het die krag afgegaan en die huishulp het die eienaar gebel om te sê die krag is af. Toe sy omdraai het hulle voor haar gestaan met ʼn vuurwapen in haar gesig,” het hy gesê.

Die rowers het glo die huishulp vasgebind en verkrag, waarna hulle die huis omgekeer het. Hulle het met ʼn sak items gevlug.

“Die huishulp kon daarin slaag om haarself los te wikkel en die eienaar van die plaas te bel. Die polisie was blitsig op die toneel en ʼn helikopter is gekry om na die verdagtes te soek. Die honde-eenheid is ook op die plaas om die verdagtes se spoor te kry.”

Jacobs kon nie bevestig of die huishulp beserings opgedoen het nie, maar het gesê paramedici was op die toneel en het haar hospitaal toe geneem. “Sy was verskriklik getraumatiseerd en het nie veel gesê nie,” het hy gesê.

Lt.kol. Moatshe Ngoepe, woordvoerder van die polisie, het die voorval bevestig en gesê hulle is nog besig met die ondersoek.