DA kla vrou aan oor ‘ape’-uitlating

Die DA het strafregtelike aanklagte aanhangig gemaak teen Penny Sparrow, die vrou wie se “ape”-uitlating op Facebook Maandag opslae gemaak het.

Maroela Media het vroeër berig ʼn herrie het op sosiale media losgebars nadat Sparrow in ʼn inskrywing op Facebook swart mense met ape vergelyk het en gesê het sy sal alle swart mense in Suid-Afrika voortaan as “ape” aanspreek.

Mmusi Maimane, leier van die DA, het op Twitter die vrou se uitsprake as beledigend beskryf en gesê sy moet strafregtelik vervolg word.

“Na aanleiding hiervan het die DA aanklagte van crimen injuria teen Sparrow aanhangig gemaak vir die oortreding van die waardigheid van alle Suid-Afrikaners en die vernedering van swart Suid-Afrikaners,” het die party gesê.

“Sulke houdings van giftige rassisme het absoluut geen plek in Suid-Afrika nie. Die DA in KwaZulu-Natal het daarom ook ʼn kennisgewing ingedien dat Sparrow se lidmaatskap opgeskort sal word en haar gedrag is verder na die Federale Regskommissie verwys om ondersoek te word. Rassiste is nie welkom in die DA nie.”